Къэбэрдей-Балъкъэрым и Къэралыгъуэм и махуэм и щIыхькIэ, КъБР-м и Парламентым дыгъуасэ щагъэлъэпIащ республикэм и лэжьакIуэ пажэхэр.
Зэхуэсыр къыщызэIуихым, КъБР-м и Парламентым и УнафэщI Егоровэ Татьянэ къыхигъэщащ республикэм щыпсэухэм я дежкIэ махуэшхуэм и мыхьэнэр илъэс къэс нэхъ ин икIи нэхъ куу зэрыхъур.
- Урысей Федерацэм и авто-ном щIыналъэу къызэрагъэпэщу, Къэбэрдей-Балъкъэрым къэралыгъуэ зэригъуэтар ди республикэм и тхыдэм и лъэхъэнэщIэу къэплъытэ хъунущ икIи а Iуэхум къыдэкIуащ ди экономи-кэ, щэнхабзэ, социальнэ зыужьыныгъэхэр, - жиIащ Егоро-вэм. - Шэч хэмылъуи, блэкIа илъэс пщIы бжыгъэхэм Къэбэрдей-Балъкъэрым ехъулIэныгъэшхуэхэр зригъэгъуэтащ. Ди нэхъыжьхэм я щапхъэр я гъуазэу, нобэ республикэм и цIыху-хэм пащэ а IуэхугъуэфIхэм. КъБР-м и Парламентым къедгъэблэгъахэм я фIыщIэ хэлъщ Къэбэрдей-Балъкъэрым и тхыдэщIэр бэIутIэIуншэу ухуа зэрыхъум. Дэтхэнэми и лэжьыгъэр зэрыщхьэпэр къигъэлъагъуэу къызолъытэ щIыналъэм и хабзэубзыху орган нэхъыщхьэм и дамыгъэр нобэ зэрыхуагъэфэщам. Ди пэшым щIэсщ дохутырхэр, цIыхухэм я псэукIэр езыгъэфIакIуэхэр, щэнхабзэм, спортым, туризмэм, экономикэм я лэжьакIуэ пажэхэр. Ахэр я гуащIэ емыблэжу махуэ къэс иужь итщ зыпэрыт IэнатIэм зэрызрагъэужьыным, ди лъахэр, ди къэралыр зэрырагъэфIэкIуэным. Пэжщ, дэтхэнэри IэщIагъэ хэха иIэжу мэлажьэ, ауэ языхэзми и къалэныр егъэзащIэ Хэкум хуэпэжу, псэемыблэжу. ФIыщIэ фхузощI апхуэдэ Iуэху бгъэдыхьэкIэ фызэриIэм щхьэкIэ. Республикэм и махуэмкIэ си гуапэу сынывохъуэхъу ехъулIэныгъэщIэхэр фиIэну, фи унагъуэхэр зэIузэпэщу псэуну.
КъБР-м и Парламентым и ЩIыхь тхылъыр цIыху 30-м иратащ. Абыхэм ящыщт республикэм парламентаризмэм зегъэужьыным, законхэр убзыхуным хэлъхьэныгъэ зэрыхуащIым къыхэкIыу дамыгъэр зыхуагъэфэща, КъБР-м и Парламентым Экономикэ политикэмкIэ, зыужьыныгъэмрэ хьэрычэт IуэхумкIэ и комитетым и унафэщI Iэпщэ Зауррэ ЕгъэджэныгъэмкIэ, щIэныгъэмрэ щIалэгъуалэм я IуэхухэмкIэ и комитетым хэт Киреевэ Надеждэрэ.
Егъэджэныгъэ IэнатIэм зегъэужьыным зэрыхэлIыфIыхьым папщIэ, ягъэлъэпIащ Къэбэрдей-Балъкъэр къэрал мэкъумэш университетым ветеринарнэ медицинэмкIэ и кафедрэм и профессор Пыл Iэуес, Налшык къалэм и лицей №2-м и егъэджакIуэхэу Харебашвили Циалэрэ (тхыдэмрэ обществознаниемрэ езыгъэдж) ШытIу Инессэрэ (урысыбзэмрэ урыс литературэмрэ).
Апхуэдэуи КъБР-м и Парламентым и ЩIыхь тхылъыр хуагъэфэщащ щIыпIэ унафэр зехьэнымкIэ IэнатIэм, КъБР-м Лэжьыгъэмрэ социальнэ дэIэпыкъуныгъэмкIэ и министерствэм социальнэ Iуэхутхьэбзэхэр яхуэщIэнымкIэ и центрым, ЛэжьыгъэмкIэ, цIыхухэм IэнатIэ егъэгъуэтынымрэ защIэгъэкъуэнымкIэ республикэ IуэхущIапIэм, КъБР-м ЛэжьыгъэмкIэ и къэрал инспекцэм, физическэ щэнхабзэмрэ спортымкIэ и IэнатIэм я лэ-жьакIуэ щхьэхуэхэр.
Къыхэгъэщыпхъэщ КъБР-м и Парламентым и ЩIыхь тхылъыр зыхуагъэфэщахэм зэрахэтыр лэжьыгъэм и ветеран Джатокъуэ Казбек, УФ-м и Къэрал Думэм и депутат Геккиев Заур и дэIэпыкъуэгъу Суйдым Оксанэ сыми.
КъБР-м и Парламентым и УнафэщIым и ФIыщIэ тхылъыр хуагъэфэщащ цIыху 11-м. Абыхэм ящыщщ КъБР-м Егъэджэныгъэмрэ щIэныгъэмкIэ и министерствэм епха школ-интернат №1-м и лэжьакIуэхэу Маргуэ ФатIимэ, Уэрыш Маринэ, Щоджэн Светланэ сымэ. ФIыщIэ тхылъыр иратащ республикэм и щэнхабзэм, экономикэм, псэупIэ-коммунальнэ IэнатIэм, туризмэм зезыгъэужьхэм.
БАГЪЭТЫР Луизэ.
