ХьэфI

Iуэтэж

Си  адэшхуэм и хьэм БобкIэ еджэрт. Ар зыкIэ хьэфIти!  Дадэ фIэкIа Iуэху иIэтэкъым, икIи къридзэртэкъым. Арат  унафэщIу къилъытэр.

Еуэри, си адэшхуэр и унагъуэм и гъусэу къалэм  Iэпхъуэжат, дауи,  хьэри къыздащтащ. Ахэр зэрыIэпхъуэрэ куэд мыщIэу, си адэшхуэм  и гур узу сымаджэщым ягъэгъуэлъати,    Боб цIыкIуи кIуэдат. Куэд мыщIэу, ахэр  щыпсэуа унэм я гъунэгъу бзылъхугъэр къакIуэри къыджиIащ:

- Фи хьэм зыгуэр и лажьэ сфIощI, пырхъуэм деж зимыгъэхъейуэ тесщ, ар зыуэ гущIыхьэу мэпщIэури, гъыуэ фIэкIа зэрыпщIэн щыIэкъым. Шхын хузохьри, схуишхыркъым. КхъыIэ, зыгуэркIэ сэбэп фыхуэхъуфынумэ, фыдэIэпыкъу, сеплъмэ, си гур мэуз.  

Дэ занщIэу къыдгурыIуащ Iуэхур зытетыр.  Хьэм  фIыуэ илъагъу  цIыхур  щимылъагъум, ар къуажэ унэм щыIэ къыфIэщIри, езыри кIуэжауэ арат. Щимыгъуэтым, нэщхъей хъуат.

Си адэ къуэшыр лъакъуэрыгъажэкIэ кIуэщ, хьэр  къишэжри,   имыгъэзэжын хуэдэу, кIапсэ къищтэри ирипхат. Хьэм зыри тхуишхтэкъым. Хьэгъуэм итIысхьэжауэ  макъ къимыгъэIуу илът, зэзэмызэ къызэрыхэщэIукIыр зэхэпх мыхъумэ. Зыгъэпсэхугъуэ  махуэм дэ зэрыунагъуэу дадэ деж щIэупщIакIуэ дыкIуэну мурад тщIащ, хьэри тфIэгуэныхь хъури къыздэтщтат.  Дадэ дызэрыкIуар къыщищIэм, сымаджэщым и япэ къатым езыр къехащ. Хъыбарым хэту, и хьэм и гугъу хуэтщIащ. Дадэ  щхьэгъубжэм бгъэдыхьэрэ плъэмэ, Боб  щIыхьэпIэм деж щысщ,  сымаджэщым щIыхьахэр къыщыщIэкIыжынум йожьэри.

- А си хъыджэбз, зыхуигъэзащ абы и пхъум, - зы дакъикъэкIэ  хьэр мыбдеж къыщIагъэхьэну пIэрэ?

Си адэ шыпхъу Шурэ зыхуей пхызыгъэкIхэм ящыщт. Дауи,  дохутырым    зихъунщIащ, ауэ Шурэ иригъэдащ.

Шурэ щIэкIри, дадэ и хьэ гъэфIэныр хьэпщэхъумкIэ иIыгъыу къыщIишащ. Апхуэдиз цIыху зэрилъагъуу, хьэр шынэри, щIым зытриубгъуащи, зигъэхъеиркъым, цIыхухэм Iуэхур зытетыр къащыгурыIуэм, зэбгрыкIуэтри, хьэм дадэ къилъэгъуащ.

Абы зы гуфIэкIэ иIэти!..

Ар дадэ бгъэдэлъадэри,   уигу щIэмыгъункIэ Iэмал имыIэу  къугъун щIидзащ, итIанэ  зыщимыгъэнщIу ебзеящ.. Псоми я нэпсыр къекIуат, дохутырри хэту.

Унэм къыщыдгъэзэжым Боб къыпхуэцIыхужынтэкъым, абы гуфIэу ди хъуреягъыр къижыхьырт, ди япэ ищым, къигъэзэжурэ  дыкъэсыжащ.  

         Мис абдеж щыщIэдзауэ, а хьэм зихъуэжащ. Пщэдджыжьым еттыр  къэмынэIауэ ишхырт, итIанэ сымаджэщымкIэ жэрти, дадэ и щхьэгъубжэр зыхуэзэм деж  щысу ар къыщIэкIыху ежьэрт.

Сыхьэтыр тIум  дадэ хущхъуэ кърахьэлIэн хуейти,  ахэр   зэбгъэдэкIыжырт, хьэми и гур псэхужауэ унэм къигъэзэжырт.

Интернетым къитхащ.

ЗэзыдзэкIар Щомахуэ Залинэщ.