Анэдэлъхубзэм дрегъэхьэхАруан щIыналъэм и щыхьэр Нарткъалэ курыт школ №6-м адыгэбзэмрэ литературэмрэ илъэс куэд лъандэрэ щезыгъэдж Къущхьэ Ритэ зи IэщIагъэм хуэIэижь, Iуэху зехьэкIэ пэрыт зиIэ лэжьакIуэщ. ЩIэблэм щIэныгъэ куу яриту, сабийхэр фIым, дахагъэм хуиущийуэ и IэнатIэр ныкъусаныгъэншэу ирехьэкI Къущхьэм. «Акъылыр ящэркъым, къащэхуркъым - зрагъэгъуэт» адыгэ псалъэжьыр и гъуэгугъэлъагъуэу сабийхэм ядолажьэ Ритэ. Зэхэдз имыщIу ар зэхуэдэу егугъуу ядолажьэ нэхъ сабий жыджэрхэми еджэным къыщыкIэрыхухэми. Аращ абы и еджакIуэхэм ящыщ куэд анэдэлъхубзэмрэ лъэпкъ литературэмрэ хуабжьу щIыдихьэхыр. Къущхьэм и гъэсэнхэр езым хуэдэу жыджэрхэщ, щIэныгъэщIэхэм я лъыхъуакIуэщ, къэхутакIуэ ныбжьыщIэхэщ. Абы сабийхэр къызэрыдихьэхыр бгъэдэлъ щIэныгъэ куум и закъуэкъым, атIэ и хьэл-щэн зэпIэзэрытымкIи, Iурылъ адыгэбзэ къабзэмкIи еджакIуэ цIыкIухэр етхьэкъу. И гъэсэнхэр и гъусэу Ритэ щIэх-щIэхыурэ хэтщ школпсо, куейпсо, республикэ зэпеуэхэм, увыпIэфIхэри къыщехь. - Адыгэбзэм, литературэм хуэнэхъуеиншэ еджакIуэ цIыкIухэр си мащIэкъым. Ахэр яфIэфIу хэтщ ди щIыпIэми, щIыналъэми анэдэлъхубзэмкIэ къыщызэрагъэпэщ зэпеуэ зэмылIэужьыгъуэхэм. Хэтым и мызакъуэу, увыпIэфIхэри къыщахь, - жеIэ Ритэ. – Апхуэдэу, илъэс блэкIахэм си гъэсэнхэр ехъулIэныгъэ яIэу зыхэта зэхьэзэхуэ зэмылIэужьыгъуэхэм ящыщщ «ФIыщэу узолъагъу, си Хэку дыщэ!» республикэпсо зэпеуэр, Адыгэхэм я дунейпсо махуэм хуэгъэпса «Адыгэхэр я щIыгум щопсэуж» республикэпсо фестивалыр, нэгъуэщI школ, район зэпеуэхэр, республикэпсо хэкурыдж конференцхэр. И дерсхэм къадэкIуэу, Ритэ школым къыщызэригъэпэщащ икIи щрегъэкIуэкI «Адыгэ хабзэр», «Удэзыхьэх грамматикэр» гупжьейхэр. Абыхэм йокIуалIэ егъэджакIуэм и гъэсэнхэм я процент 35-м нэсыр. А бжыгъэхэри щыхьэт тохъуэ Къущхьэм и Iуэху зехьэкIэ пэрытым. - Къущхьэ Ритэ и дерсхэр дапщэщи къызыхуэтыншэу зэхэгъэуващ, егъэджэныгъэ-гъэсэныгъэм и мардэ псори къыщылъытауэ, егъэджэныгъэм и Iэмал пэрытхэр лэжьыгъэм къыщигъэсэбэпу. ЩIэныгъэ куу зыбгъэдэлъ егъэджакIуэр сытым дежи хущIокъу и Iуэху зехьэкIэр зэрыригъэфIэкIуэным, и Iэзагъым зэрыхигъэхъуэным, - жеIэ Аруан щIыналъэм хиубыдэ курыт школхэм адыгэбзэмрэ литературэмрэ щезыгъэджхэм я методикэ зэгухьэныгъэм и унафэщI Тхъуэст ФатIимэ. - Ар и зэфIэкIхэмкIэ, и Iуэху зехьэкIэ пэрытымкIэ ядогуашэ къыдэлажьэхэм, адрей егъэджакIуэхэм яхуэщхьэпэн чэнджэщхэр яретыф. Интернетым и Iэмалхэр къигъэсэпурэ, Ритэ ирегъэкIуэкI щIыналъэ зэмылIэужьыгъуэхэм ящыщ сабийхэр зэпызыщIэ дерсхэр. Апхуэдэ лэжьэкIэ мардэри хохьэ сабийхэр анэдэлъхубзэм нэхъри дезыгъэхьэх Iэмалхэм. - НыбжьыщIэхэр уи дерсым дебгъэхьэхын папщIэ, уэ ар фIыуэ пщIэуэ абыхэм я пащхьэ укъиувэныр мащIэщ. ЩIэныгъэ куум щIыгъун хуейщ иджырей зэрырагъаджэ Iэмалхэр, - жеIэ Ритэ. - Апхуэдэу еджакIуэхэм дазэрыдэлажьэ щIыкIэхэри зэмылIэужьыгъуэ зэрытщIыным дыхущIокъу. Урок къызэрыгуэкIхэм хыдоухуанэ джэгукIэ-къэхутэныгъэхэр, зэпеуэхэр, гупу зы Iуэху къииным елэжьыныр, абы къытхуигъэув къалэнхэр зэфIэтхыныр, нэгъуэщIхэри. Ритэ дапщэщи жыджэру хэтщ илъэс куэд лъандэрэ ди республикэм щекIуэкI «Си бзэ - си псэ, си дуней» фестиваль-зэпеуэм. «АдыгэбзэмкIэ иджырей дерс» унэтIыныгъэм, «Методикэ лэжьыгъэ нэхъыфI» зэпеуэм пашэ зэрыщыхъуам къапэкIуэу, зэфIэкI лъагэ зыбгъэдэлъ егъэджакIуэм къыхуагъэфэщащ КъБР-м Егъэджэныгъэмрэ щIэныгъэмкIэ и министерствэм, Аруан щIыналъэм егъэджэныгъэмкIэ и IэнатIэм къабгъэдэкI щытхъу, фIыщIэ тхылъхэр. А Iуэхугъуэхэм къадэкIуэу егъэджакIуэ пашэр щIэх-щIэхыурэ ирагъэблагъэ ныбжьыщIэхэм я олимпиадэ, зэпеуэ лэжьыгъэхэр къэзыпщытэ гупым. Апхуэдэу Ритэ хэтщ адыгэ литературэмкIэ къыдэкI зэреджэ тхылъхэм я рецензентхэм. Зи лэжьыгъэм гурэ псэкIэ бгъэдэт Къущхьэ Ритэ дохъуэхъу и хъуэпсапIэхэр къехъулIэну, мурадыщIэхэм ялъэIэсыну ди гуапэщ. Апхуэдэ егъэджакIуэ IэкIуэлъакIуэхэр дызэримымащIэм гушхуэныгъэ къытхелъхьэ. Ауэ щыхъукIэ, абыхэм я нэIэм щIэту балигъ гъащIэм хыхьэ ди щIэблэри зэфIэкI лъагэ зиIэ, мурадыфIхэр зи плъапIэ цIыху зэрыхъунуми шэч хэлъкъым. ТАМБИЙ Линэ.
Поделиться:
Читать также:
27.04.2024 - 16:12 →
ЩIыуэпсым хэт пэлъэщыфар?!
27.04.2024 - 14:59 →
Лъагъуныгъэмрэ зэгурыIуэмрэ я къарур
27.04.2024 - 14:07 →
Шы гъэхъуным теухуа хабзэщIэ
27.04.2024 - 12:26 →
Бжэ зэIухахэм я махуэ
27.04.2024 - 12:18 →
Гугъуехьыр пщIэншэ хъуакъым
|