Ди лIыкIуэхэми я зэфIэкI ягъэлъагъуэ

Къэбэрдей-Балъкъэрым ерыскъымрэ ерыскъыхэкIхэмрэ елэжь и IуэхущIапIэ зыбжанэ хэтащ Мэзкуу къалэм мы махуэхэм щекIуэкIа «ПРОДЭКСПО 2024» 32-нэ дунейпсо гъэлъэгъуэныгъэм.

         Урысейм и къалащхьэм и «Экспоцентр»-м щрагъэкIуэкI зэхуэсым кърихьэлIащ ди къэралымрэ КъуэкIыпIэ Европэмрэ ерыскъыхэкIхэм елэжь я IуэхущIапIэ нэхъ ин дыдэхэр. Абыхэм ягъэлъэгъуащ цIыхур махуэ къэс зыхуей хъу ерыскъы псыхэкI къызэрыгуэкIхэри шхыныгъуэ нэхъ хэплъыхьа дыдэхэри.

         Апхуэдэуи абы утыку къыщрахьащ ерыскъы къабзэхэр, IэрыщI, химие пкъыгъуэхэр зыхэмылъхэри, муслъымэн диным и хабзэм тету ягъэхьэзырахэри, хамэ щIыпIэхэм я ерыскъы телъыджэхэри, спортсменхэм ирагъэшххэри, нэгъуэщIхэри.

         Къэбэрдей-Балъкъэрым щагъэхьэзыра ерыскъыхэкIхэр ягъэлъагъуэу Мэзкуу щыIащ мэрзей лIэужьыгъуэхэр зыщI «Фрутопьяно» IуэхущIапIэр,  пхъэщхьэмыщхьэхэм, хадэхэкIхэм япсхэр къыщIэгъэкIыным илъэсипщIым щIигъуауэ яужь ит «Лъэгъупыкъур», КъБР-м къыщагъэкIа бэдрэжанхэм томат къыхэзыщIыкI «Сириус-М»-р, и IэфIыкIэхэмкIэ цIэрыIуэ хъуа «ЖАКО»-р, псыIэфIхэкIхэр, нарзаныпсхэр зи продукцэ нэхъыщхьэ «Псынэр», лыхэкIхэм, джэдкъазылым елэжь «Миссиров Данял» уней IуэхущIапIэр.

         Республикэм и лIыкIуэхэр дунейпсо гъэлъэгъуэныгъэм щыIащ «Хьэрычэт мыинымрэ курытымрэ» лъэпкъ пэхуэщIэм ипкъ иткIэ. Абыхэм я зэфIэкIыр ягъэлъэгъуэнымкIэ щIэгъэкъуэн яхуэхъуащ  КъБР-м Экономикэ зыужьыныгъэмкIэ и министерствэр, «Си хьэрычэт IэнатIэ» центрым пыщIауэ лажьэ, КъБР-м экспортыр дэIыгъынымкIэ и центрыр.

                                                         ХЬЭЩЫКЪУЕЙ Олег.