Iуэхур судым нэмыс щIыкIэ

Газыр къэзыгъэсэбэпхэм яхуэутIыпщыным пыщIауэ «Газпром»-м Налшык къалэм щиIэ IуэхущIапIэм и пресс-IэнатIэм къызэритамкIэ, унагъуэхэмрэ IуэхущIапIэхэмрэ Iуэхутхьэбзэу хуащIам къыпэкIуэн хуея ахъшэр нэсу къызэрамытам къыхэкIыу щIыналъэм и судхэм 2923 гъэм тхылъ 36838-рэ яхуигъэхьащ, абыхэм ехьэлIа унафэ къригъэщтэн мурадкIэ. ЩIыхуэу абыхэм яхузэтрихьар сом меларди 2-рэ мелуан 804-рэ хъурт.

Хъыбар зэрыщыIэмкIэ, судхэр арэзы техъуащ «Газпром»-м и щIыхуэу сом меларди 2-рэ мелуани 198-рэ зытелъхэм ятыжын зэрыхуейм икIи абы теухуа унафэ къащтащ. Абы ипкъ иткIэ, унагъуэхэм сом мелуан 449-рэ, IуэхущIапIэ зыгъэлажьэхэм сом мелуан 963-рэ япшыныжащ. 
«Газпром»-м и щIыналъэзэхуаку IуэхущIапIэм и пщэрылъ къалэнхэр Iуэхутхьэбзэ зыхуищIхэм я деж къанэ щымыIэу щегъэзащIэ икIи щогугъ зыдэлажьэхэми апхуэдэ бгъэдыхьэкIэхэр ядилъагъуну, зэгурыIуэныгъэхэм къыщыгъэлъэгъуахэр и пIалъэм ягъэзэщIэну. 
«ЩIыхуэ къызытехуа унагъуэхэр судым еттын ипэ къихуэу дэ ахэр къыхудоджэ, зэгурыIуэныгъэ къыдащIылIэу, я Iуэху зэрыхуэхъум хуэдэу, мащIэ-мащIэурэ, ахъшэр зытрагъэкIыжыну. Апхуэдэу ящIмэ, абыхэм яхуэдутIыпщ газым пытчыркъым. 2023 гъэм апхуэдэ зэгурыIуэныгъэу минихым щIигъу унагъуэ щхьэхуэхэм ятщIылIащ», - къыхигъэщащ «Газпром»-м Налшык къалэм щиIэ къудамэм и унафэщI Вэрокъуэ Залым.