Къуажэхэм зегъэужьыныр япэ ирагъэщ

«Къуажэхэм сыт и лъэныкъуэкIи зегъэужьын» лъэпкъ пэхуэщIэм и фIыгъэкIэ 2019 - 2023 гъэхэм къриубыдэу Къэбэрдей-Балъкъэрым и жылэхэм ящыщу 18-м я автомобиль гъуэгуу 19 къагъэщIэрэщIэжащ е щIэуэ яукъуэдиящ. Абыхэм псоми зэхэту километр 26,5-рэ я кIыхьагъщ. 
Зи гугъу тщIы гъуэгухэр къуажэдэсхэм я псэукIэм дежкIэ мыхьэнэшхуэ зиIэ защIэщ. Абыхэм хэти амбулаторэхэм, школхэм, сабий садхэм, спорт комплексхэм, н. къ. ухуашэ, языныкъуэхэри мэкъумэш IуэхущIапIэхэм хуокIуэ, жылэхэр псыкIэ къызэгъэпэщыным пыщIа ухуэныгъэхэм йокIуалIэ, къэрал гъуэгухэм хыхьэжхэри яхэтщ. Ахэр псори къызыхуэтыншэу зехьэным и мыхьэнэр, дауи, гурыIуэгъуэщ. 
Къэралымрэ республикэмрэ я бюджетхэм къыхэкIыу а лэжьыгъэм трагъэкIуэдам и куэдагъыр псори зэхэту сом мелуан 609-м щIегъу. 
«Къуажэхэм сыт и лъэныкъуэкIи зегъэужьын» лъэпкъ пэхуэщIэм пыщIа лэжьыгъэхэр ди республикэм щызыунэтIыр Къэбэрдей-Балъкъэрым Мэкъумэш хозяйствэмкIэ и министерствэрщ.