КъаIэтащ цIыхухэм я гукъыдэжыр

Хэку зауэшхуэм ТекIуэныгъэ Иныр къызэрыщахьрэ илъэс 79-рэ зэрырикъур ягъэлъапIэу накъыгъэм и 9-м Налшык къалэм и ипподромым шыгъажэ щекIуэкIащ. Метр 1000, 2000 зи кIыхьагъ гъуэгуанэхэр зэпычынымкIэ абы щызэпеуащ шы къабзэ лъэпкъыфIхэр, хьэрып шыфIхэр. Псори зэхэту ахъшэ саугъэту а махуэм ягъэджэ­гуащ сом мелуани 6,9-рэ. 

Шууейхэр щIэбэнащ Налшык Зауэ щIы­хьым и къалэ къызэрыфIащам, Урысейм и лIыхъужьхэмрэ 115-нэ шуудзэм хэтахэмрэ, дзэ Iуэху хэхам и зауэлIхэм я щIыхькIэ, Хэку ­зауэшхуэм и зэманым Ищхъэрэ флотым и ­командующэу щыта Головко Арсений, Совет Союзым и ЛIыхъужьхэу Яхэгуауэ Михаилрэ Байсултанов Алимрэ, Абхъазым и ЛIыхъужь генерал Сосналы СулътIан сымэ я фэеплъу ягъэува саугъэт щхьэхуэхэм. 
А псом ящхьэжу шыгъажэм щагъэджэгуащ «ТекIуэныгъэм и саугъэтыр». Абы къыщыжащ илъэсищ зи ныбжь шы къабзэ лъэп­къыфIхэр икIи зэпачащ метр 1600-рэ зи кIыхьагъ гъуэгуанэр. Мыбдежым япэ увыпIэр щиубыдащ Пэнжокъуэ Рустам, ­«Тацит» шымкIэ. Ахъшэ саугъэтыр, абы къритащ Къэбэрдей-Балъкъэрым и Iэтащхьэ КIуэкIуэ Казбек. 
Нобэрей шыгъажэр къызэзыгъэпэщахэу Урысей Федерацэм Мэкъумэш хозяйствэмкIэ и министерствэмрэ «Росипподромы» IуэхущIапIэмрэ республикэм и УнафэщIым фIы­щIэ яхуищIащ Налшык къалэр къэралым и шыгъажэ нэхъыщхьэхэр щрагъэкIуэкI щIыпIэ зэрыхъуамкIэ. 
«Шууей нэхъыфIхэмрэ шы лъэпкъыфIхэм-рэ я зэфIэкI щагъэлъэгъуэну ди республикэм къеблэгъэн папщIэ, дэ адэкIи дыхьэзырщ абы щхьэкIэ зыхуеину псори къызэдгъэпэщыну», - жиIащ КъБР-м и Iэтащхьэ КIуэкIуэ Казбек. 
Мы гъэм и япэ шыгъажэр Налшык щыщрагъэкIуэкIа накъыгъэм и 1-м хуэдэуи, нобэрей махуэри уэлбанэрилэу щытащ, ауэ абы щхьэкIэ къэнакъым цIыху куэд абы къекIуэ­лIэн, уеблэмэ, зэрыжаIэу, тIысыпIэхэр яхурикъуртэкъым. Шыгъажэ гъэщIэгъуэнхэмрэ ар зэпагъэуа нэужь утыкур зыгъэбжьыфIа артистхэмрэ къэфакIуэ гупхэмрэ цIыхухэм я гукъыдэжыр къаIэтащ. 
А псом къадэкIуэу, зыри пэмыплъауэ, а махуэм Налшык щыхьэщIащ УФ-м щIыхь зиIэ и артист Маршал Александр. Iэгуауэ инкIэ ­кърагъэблэгъа артист цIэрыIуэм уэрэд зыбжанэ игъэзэщIащ икIи къызэхуэсахэр къигъэгугъащ ди къалащхьэм концерт щитыну къытригъэзэжыну. 
Фигу къэдгъэкIыжынщи, мы гъэм Налшык и ипподромым шыгъажэу 17 щрагъэкIуэкIынущ. Абыхэм ящыщщ фокIадэм и 6 - 7-хэм ди деж щызэхэтыну урысейпсо дербир. «Дерби-2024» урысейпсо саугъэтышхуэмрэ «Iуащ­хьэмахуэ и Кубок» саугъэтымрэ къэхьыным хуэунэтIа шыгъажэхэм, зэи къэмыхъуауэ, сом мелуан 50 щагъэджэгунущ.