Тохъутэмыщ Мухьэмэд аргуэру япэ йощ

2 июня, 2024 - 15:39

 «2024 гъэм и мафIэсгъэункIыфI нэхъыфI» еплъыныгъэ-зэпеуэ ще­­­кIуэкIащ Анзорей къуа­жэм щыIэ Ма-фIэс-къегъэлакIуэ къудамэ №14-м и хэщIапIэм. Абы хэтащ Къэ­бэрдей-Балъкъэрым мафIэ­сым пэщIэт-къегъэ­ла­кIуэ и IэнатIэм и къудамэхэм я лэжьа­кIуэ­хэр.

Зэпеуэр щекIуэкIым къалъытащ къэрэгъулхэм я унафэщIхэмрэ абы­­хэм я нэIэ щIэт гуп­хэм хэтхэмрэ я лэ­жьы­гъэм зэры­хуэIэижьыр, я   доку­мен­тацэхэр зэратхыр, я къарууфIагъэр.
Теорие Iыхьэм я къу­лы­къум къигъэув мардэхэм зэрыхуэхьэзы­рыр упщIэ-жэуап щIыкIэм тету къагъэлъэ­гъуащ. Къэрэгъулхэм я унафэщIхэр зэхьэзэхуащ мафIэсгъэункIыфIым и щыгъынхэр нэхъ псынщIэу зыщытIэгъэнымрэ перекладинэм зыщыIэтынымкIэ.
КIэух Iыхьэм автоцистернэр трагъэуващ псы щрагъахъуэ щIыпIэм икIи псыр хуаутIыпщащ къэхъуа хуэдэ мафIэсыр ягъэункIыфIыну яужь итхэм. Зэпеуэм хэтахэм къагъэлъэгъуащ я IэщIагъэм фIыуэ зэ­ры­хуэхьэзырыр.
Илъэс ипэкIи хуэдэу, псоми ефIэкIри, бжьыпэр иу­быдащ мафIэс-къегъэлакIуэ часть №20-м (Къубэ-Тэбэ) и къэрэгъулым и унафэщI Тохъутэмыщ Мухьэмэд. ЕтIуанэ, ещанэ увыпIэхэр къахьащ ПСЧ-14-м и къэрэгъулхэм я унафэщIхэу Иуан Тимуррэ Къардэн Анзоррэ. 
БАХЪСЭН  Азэмэт.

  • 17 просмотров
Поделиться: