Псоми зэхуэдэу кърахьэлIэркъым

Гъэмахуэмрэ бжьыхьэмрэ зызыгъэпсэхуну хуейхэм я зэхэзекIуэгъуэ зэманщ, гъуэгуанэ кIыхь щызэпач щыIэу. Ищхъэрэ щIыналъэхэм щыпсэухэр ИпщэкIэ къокIуэ. Иужьрей зэманым Урысейм и Ищхъэрэ, КъуэкIыпIэ лъэныкъуэхэм дунеяплъэ кIуэхэм я бжыгъэри нэхъ мащIэкъым … АрщхьэкIэ къагъэсэбэп транспорт лIэужьыгъуэ щхьэхуэхэр зэмызэгъ щыIэщ.

Куэд гугъу ирегъэхь кинетоз (морская болезнь) щытыкIэм. Гъуэгуанэм и кIыхьагъми емылъытауэ, ахэр зэуэ гуIей-щхьэIей къохъу. Апхуэдэ щытыкIэр къатезыгъэпсынщIэ щапхъэ зыбжанэ дыщагъэгъуэзащ а Iуэхум хуэлажьэ дохутыр щIэныгъэлIхэм.

ФIыуэ зывгъэпсэхуауэ, жейкIэ фрикъуауэ гъуэгу фытехьэ, арыншамэ, щытыкIэр нэхъри екIэкIуэнущ. Дагъэ зыщIэлъ, шхын гъэгъуар е гъэжьар, гунэщIыр фэзэгъынукъым. Фежьэным сыхьэт-сыхьэтитI хуэдиз иIэу ерыскъы псынщIагъуэ фшхы, пхъэщхьэмыщхьэ, хадэхэкI щIыгъуу - ар псом нэхърэ нэхъыфIщ.

Сыт хуэдэ транспортми иIэщ кинетоз зиIэхэм нэхъ езэгъ тIысыпIэ. Кхъухьлъатэм - дамитIым я зэхуакум хуэзэхэр. Автобусым - щхьэгъубжэм бгъэдэт япэ, етIуанэ тIысыпIэхэр, гупэр гъуэгум хуэгъэзауэ. Кхъухьым ипэмкIэ фымыкIуэ - ар сыт щыгъуи нэхъ щIеупскIэ, машинэ псынщIэкIэ гъуэгу фытехьэмэ, япэ тIысыпIэр нэхъ фэзэгъынущ.

Гъуэгум къыщыздэфщтэ пхъэщхьэмыщхьэпсхэр, лимон Iыхьэ зыхэлъ псы къабзэ. Газ зыхэтыр хъунукъым. Ар зэуэ лъатэм епхъуэнурэ, нэхъри нэхъ гуIеиж фищIынущ. Псом хуэмыдэу сэбэпщ бэрэтIинэм, лимоным, тIамым я эфир дагъэхэм я ткIуэпс пэрылъэщI бэлътокум тефкIэу абы фепэмыныр. Сыр зыщIэлъ IэфIыкIэхэри зэранкъым, IэфIыщэми гур къригъэкIуэнущ. Кинетоз зиIэхэм папщIэ хущхъуэгъуэ щхьэхуэхэри щыIэщ, ауэ ахэр дохутырым и чэнджэщ хэлъу зэфхьэлIэмэ нэхъыфIщ. Хущхъуэгъуэхэм аллергие хузиIэхэм папщIэ IэмалыщIэхэр щыIэщ. Абыхэм ящыщ зыщ акупунктур Iэпщэхъухэр. Iэпщэм хуэзэу абы хэгъэуIуа пкъыгъуэм щхьэм нигъэс хъыбарым теухуауэ, гу къекIуэр зэуэ кIащхъэ мэхъу. Апхуэдэщ артефакт нэгъуджэхэр. Абыхэм я къэухьхэм дэт псы зэмыфэгъухэм къапих плъыфэхэм нэм илъагъур зы пIэм иту, щIимыупскIэу иIыгъщ. Абы къыхэкIыу щхьэр уназэркъым, гури къекIуэркъым. Губгъуэ джэдгыным, бэрэтIинэм, тимьяным я дагъэхэр зэрыт къэрэндащ щхьэхуэхэри къагупсысащ, епэмын фIэкIа хуэмейуэ, щытыкIэр къащигъэпсынщIэу.