Уэрыш Мадинэ нэхъыфIхэм хабжэ

                   «Илъэсым и экспортер» урысейпсо саугъэтым и комиссэм иджыблагъэ наIуэ къищIащ Кавказ Ищхъэрэм и щIыналъэхэм ящыщу текIуэныгъэхэр зрата IуэхущIапIэхэр.

Ди гуапэ зэрыхъущи, «Мэкъумэш-промышленнэ комплексым и продукцэ хьэзырхэмкIэ илъэсым и экспортер нэхъыфI» зэпеуэм и 3-нэ саугъэтыр Къэбэрдей-Балъкъэрым и «Торговый Дом «Аква-Кристалл»-м къыхуагъэфэщащ. IуэхущIапIэм и унафэщI Уэрыш Мадини Iыхьэншэ хъуакъым – ар щытекIуащ «ЦIыхубз-экспортер нэхъыфI» зэхьэзэхуэм.

«Торговый Дом «Аква-Кристалл» заводым псыхэкIхэр, нарзаныпсыр, псы IэфIхэр щрагъэхъуэ. Абы и лэжьыгъэм IэкIуэлъакIуэу къыщегъэсэбэп иджырей технологиехэр, зэхэлъхьэкIэхэр икIи хущIэкъу зэпытщ фIагъ лъагэ зиIэ продукцэхэр утыку кърихьэну. Заводыр 2006 гъэ лъандэрэ мэлажьэ. 

Кавказ Ищхъэрэм и щIыналъэхэм ящыщу «Илъэсым и экспортер» урысейпсо саугъэтым щытекIуахэр мы гъэм фокIадэм Шэшэным и Грознэ къалэм щагъэлъэпIэнущ.

Фигу къэдгъэкIыжынщи, «Илъэсым и экспортер» урысейпсо саугъэтым и комиссэм хэтщ къэралым и министерствэхэм, ЭкспортымкIэ урысей центрым, ВЭБ.РФ-м, хьэрычэтыщIэхэм я зэгухьэныгъэхэм я лIыкIуэхэр икIи абыхэм зэхуэдэу къапщытэ хьэрычэт IэнатIэ мыинымрэ курытымрэ, промышленнэ IуэхущIапIэшхуэхэм я зэфIэкIхэр.

ХЬЭЩЫКЪУЕЙ Олег.