Адыгэ тхыпхъэхэм дехьэх

Адыгэ щэнхабзэм, гъуазджэм дихьэх, лъэпкъ тхыдэр зылъытэ бзылъхугъэщ Табыхъу - Сэрахъэ Заринэ. И IэщIагъэкIэ имиджмейкерщ, фэилъхьэгъуэхэр екIуу зыгъэщIэращIэ IэпэIэсэщ, торт дахэхэр зыщI бзылъхугъэщ. 

 Заринэ куэдым яцIыху торт IэфI гъэщIэрэщIахэр зэрыпщIымкIэ. Мультфильм цIэрыIуэхэм хэт лIыхъужьхэр, удз гъэгъа дахэхэр, хъыджэбз цIыкIухэм зызрагъэщхьын яфIэфI тхьэIухудхэр, апхуэдэуи адыгэ тхыпхъэхэмрэ сурэтхэмрэ – зэмылIэужьыгъуэщ бзылъхугъэм тортым трищIыхь теплъэхэр. 

- Псори къыщежьар си анэм деж. Ар езыр IэпщIэлъапщIэщи, зэIусэм псэ хилъхьэм хуэдэщ, сурэт ищIын фIэфIщ, IэфIуи мэпщафIэ. И щIалэгъуэм щыгъуэ си анэм тортхэр ищIырт, 90 гъэхэм псоми гурыхь ящыхъуауэ щыта «День-ночь» жыхуаIэ тортыр псом нэхърэ нэхъыфIу къехъулIэхэм ящыщт, зыхэслъхьэ щымыIэт и «Наполеон» - ри. 

Сэ езым торт сщIыуэ щыщIэздзар сабийм щхьэкIэ сыдэтIысхьэжа нэужьщ. Лэжьэныр зэпызыгъэу анэ куэдым зэфIэкI гуэрхэр къызыкъуах хабзэкъэ атIэ! Сэри си анэм и щапхъэр си гъуазэу къэзгъэунэхужа зэфIэкIщ ар, - жеIэ езым абы теухуауэ. 

 Фэилъхьэгъуэхэм сурэтхэмрэ тхыпхъэхэмрэ екIуу трещIыхь Заринэ. Абы щIэдзапIэ хуэхъуа гупсысэри къыджиIащ:

- Япэу щыгъыным тхыпхъэ щытесщIыхьам щыгъуэ къызгурыIуащ абы егъэлеяуэ сызэрыдихьэхыр. СызыIэпишащ. Зэгуэрым, си ныбжьэгъур къыщалъхуа махуэу, мурад сщIат си IэкIэ сщIа гуэр тыгъэ хуэсщIыну. Аращ абыи и щIэдзапIэр. Иджы сфIэфI дыдэу, си псэм зигъэпсэхуу, щIэщыгъуэу зыгуэр хэслъхьэху нэхъри си гур игъэпабгъэу солэжь, - жи. 

Заринэ жеIэ и IэщIагъэм теухуауэ зыкъыхуэзыгъазэхэр зэрымымащIэр. Абы къегъэлъагъуэ и дэтхэнэ лэжьыгъэми и псэм щыщ зэрыхилъхьэр, ар цIыхухэм зэрызыхащIэр. 

- Зыкъысхуэзыгъазэхэр арэзы сщIыным егъэлеяуэ согугъу. Абыхэм си IэкIэ сщIауэ яIэрыхьэр, торт е щыгъын ирехъу, ялъэгъуа нэужь я гукъыдэжым зэрызиIэтым уасэ иIэкъым си дежкIэ. ЗыгуэркIэ къызэгугъуэкI гуэр къыспэщIэхуэу щытми, ар зэзмыгъэщIауэ, и кIэм екIуу нэзмыгъэсауэ псэху сиIэнукъым. Сыгумызагъэщ абы теухуауэ, - жеIэ бзылъхугъэм. 

Имиджмейкер Iуэхутхьэбзэм и щэхухэр Москва зэрыщиджар абы куэду сэбэп къыщохъу и IэпэIэсэнми, тортхэр щигъэщIэращIэкIи. 

Тортхэм, фэилъхьэгъуэхэм Заринэ трищIэ сурэтхэм, дамыгъэхэм, тхыпхъэхэм куэду яхэтщ адыгэм ди тхыдэр, лъэпкъ гупсысэр къэзыгъэлъагъуэхэр. Псалъэ Iущхэри адыгэбзэкIэ тетхауэ гу лъыботэ. 

- Лъэпкъ гупсысэ хэлъу зыгуэр щысщIэм деж абы сегъэпIейтей. Сэ егъэлеяуэ срогушхуэ лъэпкъ сыкъызыхэкIам, абы и щэнхабзэр солъытэ, и хабзэ-бзыпхъэм сыдехьэх. Сыхэкупсэщ. Адыгэ тхыпхъэу сэ къэзгъэсэбэпхэр къыщыхэскIэ, куэдым саходэ. Сыту жыпIэмэ, дэтхэнэ дамыгъэми мыхьэнэ щхьэхуэ иIэщ. Адыгэ тхыпхъэхэмрэ дамыгъэхэмрэ гупсысэ куу ящIэлъщ. Си Iэдэжщ сытым щыгъуи сэбэп къысхуэхъу тхылъыр – Накуэ Феликс и «Тхыпхъэр». 

Заринэрэ Аланрэ я бынхэр лъэпкъ щэнхабзщэм щIапIыкI, анэдэлъхубзэм пщIэ хуащIу ягъасэ. 

- Пщащэр цIыкIущ, иджыри гъэфIэнщ. ЩIалэхэр адыгэ хабзэм и мардэм тету дгъэсэн папщIэ си щхьэгъусэми сэри тлъэкI къэдгъанэркъым. Дыхуейщ, «лъэпкъ» псалъэм мыхьэнэуэ иIэр зыхащIэну, пэжым тетыну, - жеIэ.