Спорт хъыбархэр

ГъущIапщэ Альберт дыжьын медаль къехь

Урысей Федерацэм щIыхь зиIэ и тренер Аксенов Александр боксымкIэ и фэеплъу Краснодар крайм и Витязевэ къуажэм урысейпсо зэхьэзэхуэ щекIуэкIащ.

Абы щызэпеуащ илъэс 15 - 16 зи ныбжь спортсменхэр икIи япэ увыпIищыр къэзыхьахэм Iэмал ягъуэтащ УФ-м пашэныгъэр къыщыхьыным хуэунэтIауэ етIанэгъэ зэхэтыну зэхьэзэхуэм зыкъыщагъэлъэгъуэну.  Псори зэхэту Витязевэ щызэуащ боксери 165-м нэблагъэ.

Къэбэрдей-Балъкъэрым и гъэсэну зэпеуэм цIыхуиплI щыIати, абыхэм ящыщу ГъущIапщэ Альберт етIуанэ увыпIэр къихьащ. Ди щIалэр щызауэр килограмм 54-рэ зи хьэлъагъхэм я дежщ, и тренерыр Куэшмэн Аслъэнщ.

УФ-м и командэ къыхэхам хагъэхьэ

Урысей Федерацэм дзюдомкIэ пашэныгъэр къыщыхьыным хуэунэтIа зэхьэзэхуэ Рязань къалэм щекIуэкIащ. Абы щызэпеуащ бэнакIуэ 62-рэ, я ныбжькIэ илъэс 21-м щIимыгъуауэ. МахуиплIкIэ зэхаша зэIущIэм хэта дзюдоистхэр медаль комплекту 16-м щIэбэнащ.

Къэбэрдей-Балъкъэрым и командэм щыщу килограмм 55-рэ зи хьэлъагъхэм я деж зыкъыщызыгъэлъагъуэ Уэрыш Къантемыр етIуанэ увыпIэр къихьащ икIи УФ-м спортымкIэ и мастерым и мардэр игъэзэщIащ.

Я хьэлъагъ елъытауэ зыхэта гупхэм Уэзы Iэдэм (кг 66-рэ), Соблыр Атмир (кг 73-рэ), Уэсмэн Алихъан (кг 55-рэ) домбеякъ медалхэр къыщахьащ.

5 - 6-нэ увыпIэхэр яубыдащ КIуж Къантемыррэ (кг 60) ТекIуж Астемыррэ (кг 81-рэ).

Япэ увыпIихыр къэзыхьэхар къэралым и командэ къыхэхам, зи ныбжьыр илъэс 21-м щIимыгъуахэр зыхэтым, хагъэхьащ.

Ди командэр зэхьэзэхуэм хуагъэхьэзыращ Джэданэ Залым, Махуэ Олег, Ки Руслан, Дзухэ Беслъэнрэ Залымрэ.

КЪАНШЫУЕЙ Алим.