Химиер – щIэщыгъуэу

Сабийхэмрэ ныбжьыщIэхэмрэ творчествэмкIэ я унэм щекIуэкIащ «Химическэ пкъыгъуэхэм я зэжьэхэуэ» зыфIаща пшыхь щIэщыгъуэр. Ар ягъэхьэзыращ творчествэмкIэ унэм егъэджэныгъэ гуэдзэнымкIэ и лэжьакIуэ Гъубжокъуэ Любоврэ «ЩIэныгъэм хущIэкъухэм папщIэ химие» зэгухьэныгъэм хэтхэмрэ. 
Пшыхьым щагъэлъэгъуащ химическэ пкъыгъуэхэм (элемент) гъэщIэгъуэну яхэлъхэр, ахэр езыхэр зэрызэпыщIар, химием ди гъащIэм щиубыд увыпIэр егъэлеяуэ зэрыиныр. «ЩIэныгъэм хущIэкъухэм папщIэ химие»-м хэтхэм химие пкъыгъуэ щхьэхуэхэм я фIэщыгъэхэр зытет билетхэм къыхахыурэ щхьэж къыIэрыхьахэр къызэпкърихащ, абы теухуауэ къахутахэм тепсэлъыхьащ, щапхъэхэри къахьащ. Пшыхьым хэту къызэрагъэпэщащ гупсысэм зезыгъэужь джэгукIэ гъэщIэгъуэнхэри. Ахэр ехьэлIат Менделеевым и таблицэм.
Пшыхьым и хьэщIащ КъБКъУ-м проектхэмрэ еджапIэ нэхъыщхьэм хуэгъэхьэзырынымрэ IэщIагъэ къыхэхынымкIэ и къудамэм и унафэщI Насып Артур, филологие щIэныгъэхэмкIэ доктор Куянцевэ Еленэ, экономикэ щIэныгъэхэмкIэ кандидат Касьяновэ Тамарэ, Сабийхэмрэ ныбжьыщIэхэмрэ творчествэмкIэ я унэм и унафэщIым егъэджэныгъэмрэ методикэ лэжьыгъэхэмкIэ и къуэдзэ Пщыкъуэ Анютэ, творчествэмкIэ унэм художественнэ гъэсэныгъэмкIэ и къудамэм и унафэщI Хьэрэдурэ Лидие. Абыхэм псалъэ гуапэкIэ зыхуагъэзащ къызэгъэпэщакIуэхэм, зыхэта Iуэхур щIэщыгъуэ зэращыхъуар, абы Iэмал имыIэу къыпыщэн зэрыхуейр къыхагъэщащ.