Къэбэрдей-Балъкъэрым курыт щIэныгъэ щрагъэгъуэт и IуэхущIапIэхэм щIэс ныбжьыщIэхэм «Сириус» егъэджэныгъэ центрым гъуазджэмкIэ къыщызэрагъэпэщ пэхуэщIэ зэмылIэужьыгъуэхэм хэтыну, абыхэм я зэфIэкIхэр щагъэлъэгъуэну, я щIэныгъэм щыхагъэхъуэну Iэмал яIэщ.
Егъэджэныгъэ центрым зэбгритыкIа хъыбарым ипкъ иткIэ гъуазджэ щIэныгъэхэмкIэ гъатхэм зэхишэну дерсхэр макъамэм, кхъуэщын гъэжыкIэм, псыр икIи дагъэр зи лъабжьэ лапхъэ зэхуэмыдэхэм епха сурэт щIыкIэм ятеухуауэ щытынущ. Ауэ а дерсхэм хыхьэну ныбжьыщIэхэр зэхьэзэхуэхэм хуэхьэзырын икIи пхыкIын хуейщ. Апхуэдэу макъамэ унэтIыныгъэр къыхэзыхахэм ягъэзащIэ уэрэдыр е кърагъэкI пшыналъэр видеом тешауэ, сурэтыщIхэмрэ скъарыщIхэмрэ я IэщIагъэм сурэт техауэ къызэгъэпэщакIуэхэм я деж ягъэхьын хуейщ. КъищынэмыщIауэ, зэпеуэхэмрэ гъэлъэгъуэныгъэхэмрэ хэтамэ, абыхэм къызэрыщыхэжаныкIамкIэ щыхьэт тхылъхэр ягъэхь хъунущ.
Кхъуэщын гъэжынымрэ дагъэ лапхъэкIэ сурэт щIынымрэ теухуауэ «Сириус» центрым зэхигъэува программэм тету лэжьыгъэхэр зыщIынум хъыбарегъащIэр мазаем и 7 пщIондэ къызэгъэпэщакIуэхэм я деж ягъэхьын хуейщ.
«Кхъуэщын гъэжынымкIэ щIэныгъэр» зи фIэщыгъэ курсым хыхьэну еджакIуэ ныбжьыщIэхэм папщIэ лъэщапIэ псо къызэрагъэпэщащ. Мыбыхэм щхьэкIэ утыку щхьэхуэ ягъэувынурэ ятIагъуэм зэрелэжь, ар зэрызэхапщэ икIи зэрагъэгъущ, иужькIэ зэрагъажьэ щIыкIэхэм ехьэлIауэ видеогъэлъэгъуэныгъэ щхьэхуэхэр ирагъэкIуэкIынущ. Ар зэфIэкIа нэужь, кхъуэщынгъэкIыргъхэм бгъэдагъэтIысхьэнурэ ялъэгъуамрэ зэхахамкIэ дэтхэнэми IэнатIэрэ лэжьыгъэ хэхахэр иратынущ. ЯтIэм зэрелэжь щIыкIэхэм щыгъуазэхэми зи щыпэхыхьэхэми я зэхуэдэу щытынущ курсыр - ныбжьыщIэхэм щхьэхуэ-щхьэхуэу я ехъулIэныгъэхэмрэ щыщIэныгъэхэмрэ ирагъэлъагъуу ядэлэжьэнущ. Еджэныгъэ пIалъэм къриубыдэу ныбжьыщIэхэм къащIэнущ ятIагъуэм Iэмэпсымэ зэгъэпэщахэр къызэрыхащIыкI щIыкIэр, абыхэм яIэ нэщэнэхэр, Кавказым щыпсэу лъэпкъхэм, псом хуэмыдэу адыгэхэмрэ балъкъэрхэмрэ, я IэщIагъэм къытещ уней дамыгъэхэр зыхуэдэр, абыхэм я бзэр. НыбжьыщIэхэр игъэгъуэзэнущ Урысейм и кхъуэщыныщIэхэм я зэгухьэныгъэм и унафэщI Поверин Александр.
Дагъэ лъапхъэкIэ сурэт щIыныр IэщIагъэ щхьэхуэ ирокъу. Ар ирагъэкIуэкIынущ Репин Илья и цIэр зэрихьэу Бытырбыху къалэм дэт Гъуазджэ академием и егъэджакIуэхэм. Япэ тхьэмахуэм ныбжьыщIэхэм тхылъымпIэм тхыпхъэ халъхьэфу, абы плъыфэ ирату зрагъэсэнущ. Гулъытэ хэха игъуэтынущ «гризайлькIэ» зэджэ сурэт щIыкIэм. ЯпэщIыкIэ зы плъыфэкIэ сурэт ящIынурэ, теплъэгъуэм и пкъыгъуэхэм я инагъ-цIыкIуагъыр зэралъытынущ. КъыкIэлъыкIуэ тхьэмахуэм еджакIуэхэм цIыхур къэзыухъуреихь дунейр ящIыфу, нэгъуэщIу жыпIэмэ натюрморт жыхуаIэр, тхылъымпIэм тращIыхьу загъэсэнущ. Абы иужькIэщ цIыхум и нэгур къызэрыщ, плъыфэ зэмылIэужьыгъуэхэр зыхэлъ портретым зыщратынур.
Абы къищынэмыщIауэ, центрым щхьэхуэу щызэхэтынущ телъхьэгъуэбэу зэхэту псы лапхъэм сурэт къызэрыхащIыкI щIыкIэм теухуа дерсхэр. Мы дерсхэм хэлъыну егъэджэкIэр гъэщIэгъуэн дыдэщ: егъэджакIуэхэмрэ еджакIуэмрэ зэпэщысу а зы теплъэгъуэр ящIынущ, иужькIэ щхьэж ейм еплъурэ зэпкърахынущ, и фIым е и дагъуэм трагъащIэурэ сурэт щIыкIэ лIэужьыгъуэм хэлъ щэхухэм ныбжьыщIэхэр хуагъэсэнущ.
Макъамэм хуэунэтIа дерсхэр щызэхашэнур накъыгъэ мазэрщ, ауэ мазаем и 14 пщIондэ хъыбарегъащIэхэр къызэгъэпэщакIуэхэм я деж ягъэхьын хуейщ.
Дерсхэм кърагъэблэгъащ макъамэм пыщIа лэжьакIуэ цIэрыIуэхэр. Абыхэм ирагъэкIуэкIыну мастер-классхэм къызэщIиубыдэнущ утыку итыкIэмрэ зыIыгъыкIэмрэ къищынэмыщIауэ, закъуэу уэрэд жыIэнымрэ гупым хэту уэрэд жыIэнымрэ я щэхухэр, макъыр къызэрырагъэкIым, зэрыдрашейр, пшыналъэм и лъагагъ-лъахъшагъ елъытауэ джийм епха пкъыгъуэхэр зэрагъэлажьэр, макъамэм и теориер, уэрэдымрэ пшыналъэмрэ я гъэдэхэкIэм ехьэлIа гъуазджэр.
Курсхэм къыхэкIа лэжьыгъэ нэхъыфIхэр «Сириус» егъэджэныгъэ центрым щагъэлъэгъуэнущ, ныбжьыщIэхэми еджэныгъэр къызэрырахьэлIамкIэ щыхьэт тхылъхэр иратыжынущ. ЕджапIэ нэхъыщхьэ щыщIэтIысхьэкIэ, ахэр абыхэм къахуэщхьэпэжынущ.
