Процент 21-м щIигъукIэ нэхъыбэ

Къэбэрдей-Балъкъэрым и промышленнэ индексыр, 2023 гъэм щыIа бжыгъэхэм елъытауэ, процент 21,4-кIэ хэхъуащ нэгъабэ. Ар и щыхьэтщ республикэм и промышленность IэнатIэм иужьрей илъэсхэм хэпщIыкIыу зэрызиужьамрэ экономикэм зэхъуэкIыныгъэфIхэр зэрыщекIуэкIымрэ.

Къапщытэж лъэхъэнэм къриубыдэу республикэм и экономикэ IэнатIэхэм я индексхэр къэдгъэлъагъуэмэ, щIыуэпс хъугъуэфIыгъуэхэр къыщIэхынымкIэ проценти 101,9-кIэ хэхъуащ, продукцэхэр къыщIэзыгъэкIхэм, абыхэм елэжь IэнатIэхэм – проценти 132,3-кIэ, псыкIэ къызэзыгъэпэщхэм, къагъэсэбэпар Iузышхэм, кIэрыхубжьэрыхухэр зэщIэзыкъуэхэм, уэрамхэр, пщIантIэхэр зэлъыIузыххэм проценти 101,0-кIэ я индексхэм хагъэхъуащ. ЭлектрокъарукIэ, газкIэ, хуабэкIэ къызэзыгъэпэщ, хьэуар зыгъэкъабзэ IэнатIэхэм процент 91,5-м деж къыщынащ зэкIэ.

Щхьэхуэу къыхэгъэщыпхъэщ продукцэхэр къыщIэзыгъэкIхэм, абыхэм елэжь IэнатIэхэм я зэфIэкIым фIыуэ зэрыхагъэхъуар. Хэхъуэ инхэр къагъэлъэгъуащ псыхэкIхэр къыщIэзыгъэкIхэм. Мыбдежым ахэр щехъулIащ процент 200,4-кIэ. ГъущIым елэжьхэм, гъущIхэкIхэр къыщIэзыгъэкIхэм (машинэхэмрэ обрудованэхэмрэ хэмыту) – проценти 160,0-рэ яIэщ, машинэхэмрэ обрудованэхэмрэ къыщIэзыгъэкIхэр (нэгъуэщI гъущIхэкIхэр хэмыту) процент 211,7-м нэсащ.

А псом къадэкIуэу, я продукцэхэм и куэдагъым хэзыгъахъуэ IэнатIэхэм Iэмал ягъуэт цIыхухэм лэжьыгъэ IэнатIэщIэхэр къыхузэIуахыну, инвестицэ ахъшэ я IэнатIэм къыхашэну.