«Ozon»-м ди деж къыщыщIагъэкIахэри щащэ

31 марта, 2025 - 12:31
Къэбэрдей-Балъкъэрым щылажьэ «Зэхьэзэхуэр зи лъабжьэ экономикэ лъэщ», «Дунейпсо кооперацэмрэ экспортымрэ» лъэпкъ пэхуэщIэхэм япэ иткIэ ди щIыналъэм и IуэхущIапIэхэм къэрал дэIэпыкъуныгъэ ягъуэт икIи абы Iэмал къарет «Урысейм щащIащ» пэхуэщIэм хэтыну. Абы и фIыгъэкIэ, интернетыр къэзыгъэсэбэп сату щIыпIэхэм «Къэбэрдей-Балъкъэрым щащIащ» фIэщыгъэр зэрихьэу я продукцэхэр щагъэлъэгъуэф. 
«Урысейм щащIащ» апхуэдэ сату щIыпIэм щащэр ди къэралым къыщыщIагъэкIа ерыскъыхэкIхэмрэ хьэпшыпхэмрэщ. Абы щагъэлъагъуэр ди щIыналъэхэм фIагъ лъагэ зиIэ я продукцэхэрщ икIи, щIыпIэ властхэм я дэIэпыкъуныгъэм и фIыгъэкIэ, а Iуэхутхьэбзэм пщIэ щIатыркъым. Иджыпсту интернеткIэ сату зыщIхэм къэралым и щIыналъэхэм ящыщу 28-м я хьэпшып, ерыскъыхэкI лIэужьыгъуэу мелуанитIым щIигъу щэхуакIуэхэм хуагъэлъагъуэ.
Апхуэдэ сату щIыпIэхэм ди республикэми щIэупщIэ щаIэщ. ЖыпIэнурамэ, цIыхухэм кърагъэхьа хьэпшыпхэмрэ ерыскъыхэкIхэмрэ къыщыIахыж щIыпIэу 200-м щIигъу ди щIыналъэм щыIэщ. Абыхэм къыщыгъэлъэгъуащ КъБР-м и хьэрычэт IэнатIэ мащIэмрэ курытымрэ хэту, уней IуэхущIапIэу, я щхьэ хуэлэжьэжхэу 600-м я продукцэхэр, 2024 гъэм псоми зэхэту сом меларди 2,4-рэ и уасэ зэрагъэкIуэкIащ. 
  «2024 гъэм хуэдэу, мы гъэми пытщэнущ «Урысейм щащIащ» фIэщыгъэм щIэту щIыналъэхэм я бизнесыр дэтIыгъыным ехьэлIа Iуэхухэм. Псалъэм къыдэкIуэу, ди къэралым къыщыщIагъэкIа хьэпшыпхэмрэ ерыскъыхэкIхэмрэ я бжыгъэмрэ лIэужьыгъуэмрэ нэхъыбэ щытщIащ интернет сату щIыпIэхэм икIи ахэр нэхъ къэцIыхугъуафIэ зэрыхъуным дегугъуащ. 
Ди пэхуэщIэм хэт хъунущ IуэхущIапIэ инхэри цIыкIухэри, нэхъыщхьэр - ахэр зыщыщ щIыналъэхэм къыщыщIагъэкIауэ щытын хуейщ я продукцэхэри», - жиIащ «Ozon»-м и къудамэм и унафэщI Гончаревич Владимир. 
ХЬЭЩЫКЪУЕЙ Олег.
  • 20 просмотров
Поделиться:

Читать также:

13.02.2026 - 16:35 → ЩIэблэм нэхъапэ щыIэкъым
13.02.2026 - 12:55 → ГъащIэ щыIамэ арат
12.02.2026 - 18:39 → Гъуэгу лэжьыгъэхэр
12.02.2026 - 12:26 → Радиом и Iэмалхэр
12.02.2026 - 11:11 → ЗэгурыIуэныгъэр япэ ирагъэщу