Махуэшхуэми ЛIыхъужьми я щIыхькIэ

ТекIуэныгъэ Иныр илъэс 80 зэрырикъум теухуауэ Къэрэшей-Шэрджэсым и Усть-Джегута къалэм щекIуэкIащ ныбжьыщIэхэм дзюдомкIэ я зэхьэзэхуэ. Ар и фэеплъу щытащ Урысейм и ЛIыхъужь Каракетов Юнус. Зэхьэзэхуэм хэтащ Урысей Ипщэрэ Кавказ Ищхъэрэмрэ я бэнакIуэхэр, 2006 - 2008 гъэхэм къалъхуауэ.

Къэбэрдей-Балъкъэрым и командэм зэхьэзэхуэм ехъулIэныгъэфIхэр щызыIэригъэхьащ - медалитху абы къыщихьащ. Я хьэлъагъ елъытауэ зыхэта гупхэм щытекIуащ Iэрыпщэ Къантемыр, Къущхьэ Темырлан, Костахов Марат сымэ. Пщыбий Иналрэ Къашыргъэ Мухьэмэдрэ ещанэ хъуащ.

Ди командэр зэхьэзэхуэм хуагъэхьэзыращ Джэданэ Залым, Иванов Дмитрий, Апхудэ Анзор, Сэралъп Олег, Куп Эдуард сымэ.

Къуажэгъухэм я фэеплъ

Iуащхьэмахуэ щIыналъэм алыдж-урым бэнэкIэмкIэ и зэхьэзэхуэ зэIуха Гундэлэн къуажэм щекIуэкIащ. Ар теухуат ТекIуэныгъэ Иныр илъэс 80 зэрырикъум икIи а жылэм щыщу Хэку зауэшхуэм хэкIуэда я къуажэгъу 800-м я фэеплъу щытащ. Абы щызэпеуащ республикэм и бэнакIуэхэр, 2009 - 2012 гъэхэм къалъхуауэ.

Я хьэлъагърэ ныбжьымрэ елъытауэ зыхэта гупхэм щытекIуащ Пщыунэ Дамир (кг 41,5-рэ), Этезов Эмир (кг 46-рэ), Хуртуев Темырлан (кг 51-рэ), Мэршэнкъул Темыр (кг 62-рэ), Урчуков Къурмэн (кг 66-рэ), Долатов Кемран (кг 80), Теппеев Жэмал (кг 92-рэ),  Лэкъун Саид (кг 29-рэ), Кульчаев Марат (кг 35-рэ), Байказиев Къурмэн (кг 38-рэ), Тау Къантемыр (кг 42-рэ), Чочуев Имран (кг 46-рэ), Булахов Артур (кг 52-рэ), Батыр Астемыр (кг 59-рэ), Молэ Ахьмэд (кг 63-рэ), Рэмэзан Iэдэм (кг 25-рэ), Рэмэзан Хьэмид (кг 27-рэ), Велякин Самир (кг 30), Уэзынджокъуэ Темырлан (кг 33-рэ), Гулиев Абдулыхь (кг 36-рэ), Гулиев Мухьэмэд (кг 39-рэ), Жарашуев Жамболэт (кг 43-рэ) сымэ.

Щытхъу яIэу къагъэзэж

Азием и Кубокыр ашихарэ-каратемкIэ къэхьыным хуэунэтIауэ Узбекистаным и къалащхьэ Ташкент щекIуэкIа зэхьэзэхуэм хэтащ къэрал 14-м я спортсмен лъэщхэр. Хэгъэрейхэр къэдмыщтэу, ахэр къикIат Туркменистаным, Къэзахъстаным, Таджикистаным, США-м, Пакистаным, Шри-Ланкэм, Чехием, Афганистаным, Японием, Къыргъызым, Урысей Федерацэм, Ираным, псори зэхэту цIыху 400-м щIигъу.

ЗэIущIэхэр зэрекIуэкIымрэ къызэгъэпэщакIуэхэм я лэжьыгъэмрэ кIэлъыплъыну Японием къикIауэ абы щыIащ Ашихарэ-каратемкIэ дунейпсо федерацэм и лIыкIуэ, «Шихан-Дай» дамыгъэр зиIэ Хироши Уенэ.

Урысей Федерацэм и командэ къыхэхам хэту Ташкент щыIащ Къэбэрдей-Балъкъэрым и щIалэ зыбжанэ икIи абыхэм ящыщу тIум медалхэр къахьащ. «Кумите» лIэужьыгъуэмкIэ, илъэс 14 - 15 зи ныбжьхэм я деж етIуанэ щыхъуащ Уянов Ахъмэт. А лIэужьыгъуэ дыдэмкIэ, ауэ илъэс 16 - 17 зи ныбжьхэм я деж дыщэ медаль къыщихьащ Бетрожь Дамир. Абы нэмыщI, техникэ нэхъыфI зэхьэзэхуэм къызэрыщигъэлъэгъуам папщIэ ди щIалэм саугъэт щхьэхуэ къратащ.

 Апхуэдэуи Шахмурзаев Щыхьмырзэ турнирым и судья нэхъыфIу къалъытащ.

Зэхьэзэхуэ нэужьым Хироши Уенэ егъэджэныгъэ-методикэ зэIущIэхэр иригъэкIуэкIащ икIи абы щызэпкърихащ судьяхэм я лэжьыгъэм пыщIа Iуэхугъуэхэмрэ ашихарэ-каратем и техникэхэмрэ. Абдежми мастер цIэрыIуэм щытхъукIэ къыщыхигъэщащ Къэбэрдей-Балъкъэрым и спортсменхэм я зэфIэкIымрэ зэхьэзэхуэхэм зэрызыхуагъэхьэзыр щIыкIэмрэ.

Ди щIалэхэр зэIущIэхэм хуагъэхьэзыращ Сэбаншы Мурат, Мэкъуауэ Алан, Шахмурзаев Щыхьмырзэ сымэ.

АЛБЕРДЫКЪУЭ Iэмин.