ЦIыкIухэр ягъэгуфIащ

Республикэм и Iэтащхьэ КIуэкIуэ Казбек и хъыбарыбэ напэкIуэцIым щытепсэлъыхьащ Къэбэрдей-Балъкъэрым Херсон областым хыхьэ Голопристанскэ, Скадовскэ щIыналъэхэм щыпсэу сабийхэм зэрызащIигъэкъуам. 

Зэман зыбжанэ хъуауэ, ди республикэм псапащIэ IуэхукIэ ­защIегъакъуэ Херсон областым хиубыдэ Голопристанскэ, Скадовскэ округхэм щыщ сабийхэм. 
«Къуэш пэлъытэ тхуэхъуа щIыналъэхэм япэ классым щыщIэтIысхьэ школакIуэхэм папщIэ, Къэбэрдей-Балъкъэрым щыпсэухэмрэ щIалэгъуалэмрэ я къарукIэ еджакIуэ хьэпшыпхэр дгъэхьэзыращ, - етх КIуэкIуэ Казбек. - ШколакIуэр зыхуэныкъуэну псори зыдэлъ плIэидзэ 400 яIэрыдгъэхьэжащ сабийхэм. Портфелхэм дэтлъхьащ еджакIуэм имыIэу мыхъуну хьэпшыпхэр: тетрадхэр, къалэмхэр, къэрэндащ фIыцIэхэмрэ зэмыфэгъухэмрэ, сурэт зращIыхьыну альбомхэр, линейкэхэр, тхылътелъхьэхэр, ­къинэмыщIхэр. ЦIыкIухэм дохъуэхъу ехъулIэныгъэ яIэу еджэну!» 
Республикэм и Iэтащхьэм и унафэкIэ лэжьыгъэр къызэзыгъэпэщар КъБР-м ЩIалэгъуалэ IуэхухэмкIэ и министерствэрщ.