Джэдгъэфхэ я унагъуэщIэ

Ди газетеджэхэм фIыуэ яцIыху Шэрэдж Ищхъэрэ ­къуажэм щыщ Джэдгъэф Мухьэрбийрэ абы и унагъуэ дахэмрэ. Мухьэрбий «Адыгэ псалъэм» щIэх-щIэхыурэ къытхуотхэ, къуажэдэсхэм я щыIэкIэ-псэукIэм дыщигъэ­гъуа­зэу. Республикэм жур­налрэ газету къыщыдэкIым Iэ тредзэ, зы кIапи къимыгъанэу щIиджыкI зэпыту къогъуэгурыкIуэ а нэхъыжьыфIыр. Иджыблагъэ Джэдгъэфхэ гуфIэгъуэшхуэ яIащ - Мухьэрбий и къуэрылъху Залымджэрий унагъуэ иухуащи, ныбжьыщIитIым я хьэгъуэ­лIыгъуэр щапхъэ зытрахым хуэдэу зэрекIуэкIар вжетIэ­жыну, гуфIэгъуэр унагъуэм дэтIыгъыну ди гуапэщ.

Адыгэ щIэблэ дахэм фIыкIэ къахэжаныкIауэ, щIэныгъэм и лъагъуэм тету лъэпкъыцIэр зыIэтхэм ящыщщ Джэдгъэф Залымджэрий. Абы ныбжьы­ш­хуэ имыIэми, Урысей Федерацэми къэрал щIыбми и цIэр щигъэIуну, еджагъэшхуэхэм гу залъригъэтэну хунэсащ. 
Нарткъалэ и 2-нэ курыт еджапIэм щIэсыху къалэ, щIыналъэ, республикэпсо, дунейпсо зэпеуэу зы блимыгъэкIыу хэтащ ар, псоми япэ увыпIэхэр ­щиубыду. А лъэхъэнэм зригъэгъуэта ­ехъулIэныгъэхэмрэ ЕГЭ-мкIэ къихьа бжыгъэ лъагэхэмрэ я фIыгъэкIэ, УФ-м и Президентым деж щыIэ Финанс университетым ди щIыналъэм къыбгъэдэкIыу 2018 гъэм щIагъэ­тIыс­хьауэ щытащ Джэдгъэ­фыр. Залымджэрий хиша лъагъуэм емыпцIыжу и еджэ­ныгъэм къыпищащ икIи зэпеуэ, конференц зэхуэмыдэхэм хы­хьэмэ, япэ увыпIэхэр зыIэригъэхьэурэ, Урысейм къыщацIыхуащ.
2021 гъэм Сочэ къалэм щекIуэкIа, Финанс шынагъуэншагъэмкIэ япэ дунейпсо олимпиадэм Джэдгъэфым япэ увыпIэр къыщихьри, бакалав­риатыр къызэриухыу, магистратурэм зэрыщIэтIысхьэфыну Iэмалыр къихьэхуат абы. А зэпеуэм хэтащ Белоруссием, Къэзахъстаным, Къыргъызста­ным, Урысейм, Таджикистаным, Тыркуменистаным, Узбекистаным щыщ ныбжьыщIэ 300-м щIигъу. А псоми ефIэкIат ди щIалэр. 
Къыхэгъэщыпхъэщ университетыр къэзыухахэр 2022 гъэм мэкъуауэгъуэм и 2-м Кремлым ирагъэблэгъауэ зэрыщытар, абы­хэм Джэдгъэфри зэрахэтар. А пшыхьым цIыхуибгъум я цIэ къыщраIуат, я ехъулIэныгъэмрэ еджэкIэмкIэ щапхъэу къахьу. Абы щыгъуэ Залымджэрий къыхуагъэфэщат «Студент нэхъыфI дыдэ» цIэ лъапIэр икIи абы и дипломыр ­къритыжат УФ-м и Казначейст­вэм и унафэщI Артюхин Роман. 
Магистратурэри къиухыжащ, еджэнымрэ лэжьыгъэмрэ зэдихьурэ къулыкъу зыбжанэ ­ихъуэжащ, драгъэкIуэтейуэрэ. Иджы ар щолажьэ Москва областым Мэкъумэш хозяйствэмкIэ и министерствэм къэпщы­тэныгъэхэмкIэ и къудамэм и унафэщIу. 
Ныбжь дахэм нэса щIалэ­щIэм лэжьыгъэмрэ щIэныгъэмрэ зримыгъэтхьэкъупэу, и къару, зэман, гуащIэ псори абы щхьэузыхь хуимыщIу, и чэзум унагъуэ зэриухуам уегъэгуфIэ. Гуапэ мыхъуу къанэркъым ап­хуэдэ лэжьыгъэ хьэлъэ зэры­пэрытыр зыкIи зэран къыхуэмыхъуу, Залымджэрий и щIэныгъэм къыпищэмэ нэхъ къищтэу аспирантурэм зэрыщIэтIысхьари. 
Езым хуэфэщэну щхьэгъусэ екIу хуэхъуа пщащэ щэныфIэр, тхьэIухудыр, губзыгъэр Бамбэтхэ ящыщщ, и цIэр Каринэщ. А тIум я хьэгъуэлIыгъуэм хэтыну, адыгэ хабзэмрэ щэнымрэ зыщагъэгъуэзэну Джэдгъэфхэ къахуеблэгъат ­Залымджэрий щеджа университетым и проректорымрэ диплом лэжьыгъэр къыдэзыгъэ­хьэзыра егъэджакIуэмрэ. Къи­щынэ­мы­щIа­уэ, щIалэр щыла­жьэ министерствэм и лIыкIуэ, къыдеджа и ныбжьэгъу гупи хэтащ хьэгъуэ­лIыгъуэм.
- Мыпхуэдэ хабзэ дахэрэ берычэту ерыскъы щаIэта хьэгъуэлIыгъуэрэ си гъащIэм с­лъэгъуакъым. Адыгэхэм хуэ­дэу хьэщIэм пщIэ, гулъытэ хуэзыщI лъэпкъ зэи срихьэлIакъым. Сэ мызэ-мытIэу Залымджэрий сыщIыгъуу Къэбэрдей-Балъкъэрым сыщыхьэ­щIащ, шхын IэфI куэди щысшхащ, ауэ нобэ ди нэгу щIэкIа хабзэ дахэхэм хуэдэ дунейм тету сщIэххакъым. 
Бамбэтхэ Владимиррэ Неллирэ япхъу щэныфIэр, ­къуп­щхьэ гуащэм хуэдэу Каринэ тхьэIухудыр КъБКъУ-м архитектурэмкIэ и къудамэр къиухащ, хабзэ, гъэсэныгъэ дахэ зыхэлъщ. Дохъуэхъу а Iуэху­гъуэр лъэпкъитIми гуфIэгъуэ кIыхь яхуэхъуну, я нэхъыжьхэм я жьауэ куэдрэ щIэтын щIэблэ насыпыфIэ хъуну, Залымджэрийрэ Каринэрэ я цIэр фIы­кIэ къраIуэу куэдрэ зэхэтхыну.