Къуажэдэсхэр зыщыгуфIыкIа спорт утыку

Бахъсэн щIыналъэм хыхьэ Бахъсэнёнкэ къуажэм иджыблагъэ къы­щызэ­Iуа­хащ спорт утыку Iэ­хуитлъэ­хуитышхуэ. Ар яухуащ «Къуажэ щIыпIэхэм сыт и лъэны­къуэкIи зегъэужьын» къэрал пэхуэщIэм ипкъ иткIэ икIи абы хуэдэ республикэм нобэкIэ щыIэкъым. 

Адрей спорт утыкухэм ар къащхьэщокI и ­инагъ къудеймкIи - псори зэхэту метр зэбгъузэнатIэ 800 мэхъу. Ухуэныгъэм трагъэкIуэдащ къэралми щIыналъэми я бюджетхэм къыхэкIыу сом мел­уани 7,7-рэ.
Иджы къуажэдэсхэм Iэмал ягъуэтащ абдеж спортми зыщыхуагъэсэну, я нэгуи зыщрагъэужьыну. Сыту жыпIэмэ, спорт утыкушхуэм хохьэ футбол «цIыкIум» и губгъуэр, волейболымрэ баскетболымрэ, стIолыщхьэ теннисым щхьэкIэ утыкухэр, сабий джэгупIэхэр. А псоми IэрыщI «алэрыбгъур» хуэфIу илъщ.
Апхуэдэуи абы хэтщ турник зэхуэмыдэхэр, спорт тренажерхэр, гимнастикэмкIэ Iэмэпсы­мэхэр, кIапсэм утету къыщыпкIухьын щIыпIэхэр, нэгъуэщIхэри. А псом къадэкIуэу, машинэ гъэувыпIэ ящIащ, метр зэбгъузэнатIэ 350-рэ ирагъэубыду. 
ЦIыху мини 8,8-рэ зыдэс Бахъсэнёнкэ къуажэм тыгъэфI хуэхъуащ ар икIи жылэдэсхэр щыгуфIыкIащ я узыншагъэм хуэщхьэпэу я зэманыр щагъэкIуэн щIыпIэ яIэ зэрыхъуам. 

Лэжьыгъэхэм  йоужьэрэкI

«Къалэ цIыкIу­хэм­рэ тхыдэ мыхьэнэ зиIэ къуа­жэ щIыпIэ­хэм­рэ» фIэ­щыгъэр зэ­рихьэу 2024 гъэм екIуэ­кIа урысейпсо зэ­хьэ­зэ­хуэм щы­те­кIуа, «Псым Iэп­лIэ къыуешэкI» пэхуэщIэр ягъэзэщIэн щы­щIадзащ Шэджэм щIыналъэм. Къэбгъэлъа­гъуэмэ, Къэбэрдей-Балъкъэрым и пэхуэщIэ нэхъ ин дыдэхэм ящыщщ ар. ЗэIузэпэщI ящIыну кърахьэжьа щIыпIэр псори зэхэту метр зэбгъузэнатIэ 19846-рэ мэхъу. 

Ар ирикIуэнущ Шэджэм псым и Iуфэм икIи Шэджэм къалэм и стадионым бгъурыхьэнущ. ПэхуэщIэм къызэрыщыгъэлъэгъуамкIэ, абы машинэ гъэувыпIэхэри иIэнущ, щыIэ мардэхэм тету щIыпIэр жэщым къызэщIагъэнэхуэнущ.
НобэкIэ щIыпIэм лъэс лъагъуэхэр къыщыхагъэщхьэхукI, плиткэхэр щралъхьэ, гъуэгубгъухэр мывэхэмкIэ кърагъэбыдэкI, джэгупIэхэр, спорт утыкухэр щаухуэ. 
Апхуэдэуи, дызэрыт илъэсым и кIэхэм ирихьэлIэу лэжьыгъэхэр псори зэфIэкIа иужь а щIыпIэм игъуэтыну архитектурэ теплъэ цIыкIум и Iыхьэ гуэрхэми иджыпсту йогугъу.