Псы къыщIэшыпIэ зэрыIыгъыр

Бахъсэн щIыналъэм, Бахъсэн къалэри хэту, мы махуэхэм лэжьыгъэшхуэ щрагъэкIуэкI ­Зеикъуэ, ХьэтIохъущыкъуей Ищхъэрэ, Ислъэ­мей, ПсыкIэху, Бахъсэнёнкэ, Бахъсэн, Дыгулыбгъуей жылэхэр псори зэпыщIауэ псы къабзэкIэ къэзэгъэпэщыным ехьэлIауэ. Абы щхьэкIэ псори зэхэту бжьамий километр 79-рэ яукъуэдиинущ. 

Лэжьыгъэхэм иджыпсту щоужьэрэкI Бахъ­сэн къалэм Угнич и цIэр зезыхьэ и уэрамым: бжьамийхэр зыдалъхьэну щIыр датIыкI.
Фигу къэдгъэкIыжынщи, Бахъсэн псы къы­щIэ­шыпIэ зэрыIыгъыр ухуэн хуейуэ къыхэ­зылъхьар Къэбэрдей-Балъкъэрым и Iэтащхьэ КIуэкIуэ Казбекщ, Урысей Федерацэм и Президент Путин Владимир 2019 гъэм щыхуэзам щыгъуэ. ИужькIи, УФ-м и Правительствэм къэралым и щIыналъэхэм зегъэужьынымкIэ и комиссэм и президиумым и зэIущIэми щыдаIы­гъащ Бахъ­сэн щIыналъэм щыпсэухэр псыкIэ къызэгъэпэщыным хуэунэтIа пэхуэщIэр. УФ-м и Правительствэм и УнафэщIым и къуэдзэ Хуснуллин Марат и унафэкIэ къыхуаутIыпщынущ абы текIуэдэну мылъкур. 
Бахъсэн псы къыщIэшыпIэ зэрыIыгъыр яухуэ «Кавказ Ищхъэрэ федеральнэ округым зегъэу­жьын» программэм ипкъ иткIэ. ПэхуэщIэм псы къабзэкIэ къызэригъэпэщынущ ищхьэIуэкIэ зи гугъу щытщIа жылэхэм я цIыху мини 100-м нэблагъэ.