ГъуэгуфI шынагъуэншэхэр

Прохладнэ щIыналъэм и Къэрэгъэш къуажэм Хэку зауэшхуэм текIуэныгъэ къыщызыхьахэм я цIэкIэ щыIэ уэрамыр, зы километрым щIигъу зи кIыхьагъыр, зэрагъэпэщыж мы махуэхэм. А лэжьыгъэм пэрыхьащ КъБР-м и Iэтащхьэ КIуэкIуэ Казбек къуажэдэсхэм я лъэIур ядиIыгъа нэужь.

Лэжьыгъэм хыхьэу, гъуэгу щхьэфэр тратхъунщIыкIри, и лъабжьэр ягъэбыдащ, иужькIэ асфальтрэ бетонрэ зэхэщIауэ абы и кIыхьагъкIэ тралъхьэжащ, мывэхэмкIэ кърагъэбыдэкIащ, лъэс лъагъуэхэр щыпхашащ, иджырей уэздыгъэхэр щыпадзащ.

Къэухьэхэмрэ гъуэгу дамыгъэхэмрэ иджыпсту ягъэув, зэхыхьэпIэ-зэхэкIыпIэхэр къыхагъэщхьэхукI.

Лэжьыгъэ псори мыгувэу зэфIагъэкIынущ.

Бахъсэн щIыналъэм и Куба, Псыхъурей, Кременчуг-Константиновскэ къуажэхэр зэпызыщIэ автомобиль гъуэгури къызыхуэтыншэу зэрагъэпэщыж. Абы хеубыдэ километри 2,8-рэ зи кIыхьагъ, Кременчуг-Константиновскэм и Садовэ, Советскэ уэрамхэр. Абы тетщ социальнэ мыхьэнэ зиIэ ухуэныгъэхэр: курыт еджапIэ, сабий сад, щIыпIэ администрацэм и хэщIапIэ, ЩэнхабзэмкIэ унэ, нэгъуэщIхэри.

Иджыпсту ирагъэкIуэкI лэжьыгъэм хыхьэу гъуэгущхьэм асфальтыщIэ тралъхьащ, къэухьхэр, гъуэгу дамыгъэхэр щагъэуващ, зэхыхьэпIэ-зэхэкIыпIэхэр къыщыхагъэщхьэхукIащ, уэздыгъэхэр щыпадзащ.

Лэжьыгъэхэр зэфIагъэкIынущ дызэрыт илъэсым и кIэхэм.

Лэскэн щIыналъэм хыхьэ Ташлы-Тала къуажэм и уэрам нэхъыщхьэми гъуэгу лэжьыгъэхэм щоужьэрэкI. Километрищым щIигъу зи кIыхьагъым тетщ сабий сад, курыт еджапIэ, пощт, сымаджэщ, къуажэ администрацэм и хэщIапIэ, нэгъуэщIхэри.

НобэкIэ асфальтыжьыр тратхъунщIыкIащ, абы и лъабжьэр зэтес ящIри, ягъэбыдащ, уэздыгъэ пкъохэр щагъэуващ. Иджыпсту псы ежэхыпIэхэр хуащI. Ар зэрызэфIэкIыу, гъуэгущхьэм асфальтыщIэ тралъхьэнущ, лъэс лъагъуэхэри хуащIынущ, гъуэгу дамыгъэхэр ягъэувынущ.