Адыгэ ЛIыхъужьхэм иджыри къахохъуэ

Урысей Федерацэм и Президент Путин Владимир Хэкум и хъумакIуэм и махуэм техуэу къэрал дамыгъэ лъапIэхэр ЛIыхъужьхэм Кремлым щаритащ. Апхуэдэ щIыхь къэзылэжьахэм яхэтщ Осетие Ищхъэрэ-Аланием щыщ адыгэ щIалэ, подполковник Джэрий Инал. 

«Урысейм и ЛIыхъужь» цIэ лъапIэр къызыфIаща ди лъэпкъэгъу щIалэр ­КъуэкIыпIэ дзэ округым и 5-нэ дзэпсо ­армэм и 57-нэ гвардие мотострелковэ бригадэ щхьэхуэм и ебгъэрыкIуэ гупым и командирщ.
ЛIыхъужьым и Дыщэ Вагъуэр абы ­къы­хуагъэфэщащ Запорожскэ фронтым и дзэ щIыпIэ нэхъыщхьэ дыдэхэм ящыщ Гуляйполь хуит къэщIыжыным­кIэ и къалэнхэр ехъулIэныгъэшхуэхэр иIэу зэрызэфIигъэкIам папщIэ.  Мэздэгу адыгэхэм къахэкIа щIалэщIэр Ставро­поль крайм и Курской районым хыхьэ Серноводское къуажэ цIыкIум къы­щалъхуащ, иужькIэ Мэздэгу Iэпхъуэжащ, абы дэт курыт школ №7-р къиухащ. Новосибирск дэт дзэ команднэ учили­щэ нэхъыщхьэр къиухри, Хабаровск крайм дзэ къулыкъум щыпэрыхьащ. 2022 гъэ лъандэрэ офицер щIалэщIэр дзэ Iуэху хэхам щыIэщ. Абы и япэ дамыгъэ лъапIэри - ЛIыгъэм и орденыр - Путиным Кремлым къыщритауэ щытащ 2023 гъэм. 
Урысейм и Президентым дзэ Iуэху хэхам хэт лIыхъужьхэм псалъэ гуапэ яж­риIащ я тхьэрыIуэм зэрыхуэпэжым, Урысейр зыхъума ди адэжьхэм я Iуэхум къы­зэрыпащэм щхьэкIэ. 
«ФIыщIэ фхузощI, пщIэ зыхуэсщI ныбжьэгъухэ, къэвгъэлъэгъуа хахуагъэм, фи тхьэрыIуэр зэрывгъэпэжым, ди ве­теран лъапIэхэм, илъэс зэхуэмыдэхэм Урысеишхуэр зыхъума псоми я IуэхущIафэхэр зэрывгъэкIуатэм папщIэ», - щыжиIащ Путиным УФ-м и ЛIыхъужьхэр Кремлым щыщагъэлъапIэ гуфIэгъуэ зэхыхьэм. - Урысейр и къэкIуэнум, щхьэ­хуитыныгъэм, пэжыгъэмрэ захуагъэмрэ щIозэу, а бэнэныгъэм псом япэ иту пэ­рытыр фэ фхуэдэ цIыху лъэщхэрщ, хахуэхэрщ, псэемыблэжхэрщ».
Осетие Ищхъэрэ-Аланием и Iэтащхьэ Меняйло Сергей и телеграм-каналым щехъуэхъуащ Джэрий Инал къэрал дамыгъэ лъапIэр къызэрыратамкIэ, Осетие Ищхъэрэр Урысейм и ЛIыхъужьымрэ абы и лIыгъэмрэ зэрыригушхуэр къыхигъэщу.