«ГъащIэм хуэщIа инфраструктурэ» лъэпкъ пэхуэщIэм хыхьэ «Коммунальнэ инфраструктурэр егъэфIэкIуэн» къэрал программэм ипкъ иткIэ Тэрч щIыналъэм и Терекскэ къуажэм и уэрамхэм псы къабзэ зэрыкIуэ и бжьамийхэр къыщагъэщIэрэщIэжащ.
Къару куэд зытекIуадэ лэжьыгъэхэр жылэм и уэрамхэм щекIуэкIащ. Псалъэм къыдэкIуэу, бжьамийхэр зыдалъхьэну щIыр датIыкIащ, псы къабзэ къызыщIашыну щIыпIэр яубрууащ, псыкъуийхэр ягъэуващ, бжьамийхэр зэрызэрыубыдахэр къапщытащ, нэгъуэщI Iуэхугъуэхэри зэфIагъэкIащ.
Псори зэхэту километр 21-рэ зи кIыхьагъ бжьамийхэр яукъуэдиин ипэкIэ кIэнауэхэм пшэхъуэрэ мывэ кIэщхърэ зэхэлъу дакIутащ. Ахэр езыхэр къызыхэщIыкIар иджырей материалщ: зыри къыщымыщIу илъэс 50-кIэ щIы щIагъым щIэлъыфынущ. Апхуэдэуи, псыкъуийуэ 107-рэ псы къыщIэшыпIэу I-рэ ягъэуващ, метр 200 хуэдиз и кууагъкIэ ехыу.
Терекскэ къуажэм дэсхэр нэхъапэм псы къабзэкIэ гугъу ехьу щытащ, бжьамийхэр жьы зэрыхъуам къыхэкIыу, ар къащыIэрымыхьэ къыщыхъуи щыIэу. Иджы цIыху мини 2-м щIигъум псы къабзэ зэпымыууэ яIэрыхьэнущ.
Нэхъыщхьэр – щIыналъэм зегъэужьынырщ
Тэрч щIыналъэ администрацэм и Iэтащхьэ Хъущт Аслъэнбий иджыблагъэ иригъэкIуэкIащ районым ЩIыпIэ самоуправленэмкIэ и советым и зэIущIэ икIи абы щытепсэлъыхьащ нэгъабэ зэфIагъэкIахэмрэ мы гъэм къапэщылъ къалэнхэмрэ.
ЗэIущIэм къыщыхагъэщащ Тэрч щIыналъэм и зыужьыныгъэм хуэгъэпса унэтIыныгъэ нэхъыщхьэхэр, бюджетыр, къэрал программэхэмрэ лъэпкъ пэхуэщIэхэмрэ зэрагъэзэщIар. Псом хуэмыдэу, къытеувыIащ щIыпIэ инфраструктурэр егъэфIэкIуэнымкIэ, социальнэ IэнатIэмрэ псэупIэ-коммунальнэ хозяйствэмрэ дэIыгъынымкIэ зэрыщехъулIэм.
Псалъэм къыдэкIуэу, бжыгъэхэм къызэрагъэлъэгъуамкIэ, унэтIыныгъэ нэхъыщхьэхэмкIэ Тэрч щIыналъэм зэпIэзэрыту зиужь зэпытщ. Районым и бюджет зэхэтыр сом мелард 1-рэ мелуан 738-рэ хъуащ. Апхуэдэу щыхъукIи, абы и процент 70-р трагъэкIуэдащ социальнэ мыхьэнэ зиIэ Iуэхугъуэхэм.
Тэрч щIыналъэм и экономикэм хэлъхьэныгъэфI хуэзыщI мэкъумэш IэнатIэм продукцэу къыщIигъэкIащ сом мелард 17 и уасэ. ПромышленностымкIэ IэнатIэми хэхъуэхэр къигъэлъэгъуащ икIи езым къалэжьа продукцэу сом меларди 3,3-рэ и уасэ Iурагъэшащ.
Хъущт Аслъэнбий къыхигъэщащ республикэр къадэIэпыкъуу щIыналъэм щылажьэ лъэпкъ пэхуэщIэхэмрэ къэрал программэхэмрэ цIыхухэм я псэукIэр егъэфIэкIуэнум ехьэлIауэ абыхэм къыщыгъэлъэгъуа Iуэхугъуэ куэд зэрызэфIагъэкIар. Абыхэм хохьэ, Терекскэ къуажэм псы къабзэ зэрыкIуэ, жьы хъуа и бжьамийхэр зэрызэрахъуэкIар, Тэрч къалэм еджакIуэ 800-м хуэщIа школыщIэ, Дей къуажэм амбулаторэщIэ зэрыщаухуар, Тэрч къалэмрэ Новая Балкария жылэмрэ цIыхухэр куэду щызэхуэс я щIыпIэхэр зэIузэпэщ зэращIар, ЩIалэгъуалэ центрыр къызэрагъэщIэрэщIэжар, щIыналъэ, муниципиальнэ автомобиль гъуэгуу, псори зэхэту километр 16-хъууэ, къызыхуэтыншэу зэрызэрагъэпэщыжар, нэгъуэщIхэри.
Апхуэдэуи, щхьэхуэу тепсэлъыхьащ егъэджэныгъэмкIэ, узыншагъэр хъумэнымкIэ, щэнхабзэмкIэ, спортымрэ щIалэгъуалэ политикэмкIэ яхузэфIэкIахэмрэ абыхэм зегъэужьынымкIэ нобэ щIапхъэхэмрэ.
Гулъытэншэу къагъэнакъым дзэ Iуэху хэхам хэтхэмрэ абыхэм я унагъуэхэмрэ дэIэпыкъуныгъэ ирагъэгъуэтым теухуа Iуэхугъуэхэр.
Тэрч щIыналъэм къыпэщылъ къалэнхэм щытепсэлъхьым Хъущтым къыхигъэщащ районым зэпIэзэрыту зиужьынымрэ цIыхухэм я псэукIэр егъэфIэкIуэнымрэ псом нэхъыщхьэу зэрыщытыр.
ЗэIущIэм и лэжьыгъэм хэтащ КъБР-м егъэджэныгъэмрэ щIэныгъэмкIэ и министр Езауэ Анзор, КъБР-м и Парламентым и депутатхэу Хьэрэдурэ Заурбий, Лъэужь Ахьмэд, Бахъсэнокъуэ Залым сымэ, Тэрч районым и прокурор Лукьянов Артем сымэ, нэгъуэщIхэри.
