Къэбэрдей-Балъкъэрым и «Вымпел» спорт комплексым щекIуэкIащ «PWL Нальчик 74» зыфIаща дунейпсо зэхьэзэхуэ. Абы хэтащ бэнакIуэхэм я профессиональнэ лигэм щыщхэр. Ди щIыналъэм щыщхэм нэмыщI, абы я зэфIэкI къыщагъэлъэгъуащ Тыркум, Венгрием, Румынием, Къэзахъстаным, Узбекистаным, Египетым, США-м, Таджикистаным, Къыргъызым, Азербайджаным я спортсменхэм.
Зэхьэзэхуэр теухуат килограмм 74-рэ зи хьэлъагъхэм я деж щыбанэхэм я профессиональнэ лигэм и бгырыпхыр зезыхьэ, Олимп джэгухэм я чемпион Сидаков Заурбэч ар къыIэщIахын папщIэ абы пеуэнур хэтми зэхэгъэкIыным. Псори зэхэту спортсмен 16 щIэбэнащ апхуэдэ щIыхьым.
Зэпеуэхэм ипэ къихуэ махуэм журналистхэм къытIущIащ спортсменхэмрэ къызэгъэпэщакIуэхэмрэ. Пресс-конференцыр къызэIуихащ УФ-м Спорт бэнэкIэмкIэ и федерацэм и менеджер нэхъыщхьэ, бэнакIуэхэм я профессиональнэ лигэм и унафэщI-гъэзэщIакIуэ Федоров Юрий.
«Си гуапэщ профессиональнэ лигэм и зэхьэзэхуэ Къэбэрдей-Балъкъэрым зэрыщедгъэкIуэкIыр, ар щызэхэтыну комплексыр сыт и лъэныкъуэкIи зэрызэпэщыр. Налшык къалэм япэу щызэхуэтшэсу аращ килограмм 74-рэ зи хьэлъагъ бэнакIуэ нэхъ лъэщхэр икIи ахэр хущIэкъунущ Олимп джэгухэм я чемпион, лигэм и бгырыпхыр зыIэщIэлъ Сидаков Заурбэч пэувынухэм хагъэхьэным.
Абы нэмыщI, дыхуейщ алыдж-урым бэнэкIэм и дахагъхэр спортым дихьэххэм едгъэлъагъуну. Утыкум къитшэнущ Къэбэрдей-Балъкъэрым щыщ бэнакIуэхэу а спорт лIэужьыгъуэмкIэ къэралым щыпашэхэм яхэтхэри», - жиIащ Федоровым.
Олимп джэгухэм я чемпион, КъБР-м и Парламентым и УнафэщIым и къуэдзэ Къардэн Мурат къыщыпсалъэм къыхигъэщащ ди республикэм щекIуэкIыну мы зэпеуэм мыхьэнэшхуэ зэриIэр.
«ФIыщIэ ин яхузощI зэпеуэм кърихьэлIа хьэщIэ псоми, щIыпIэ жыжьэ къикIахэм, США-м и лIыкIуэхэри яхэту. Абы къегъэлъагъуэ спортым гъунапкъэ лъэпкъ зэримыIэр, цIыхухэр зэрызэпищIэр, зэныбжьэгъугъэр зэригъэбыдэр.
Мы лигэм и япэ зэпеуэхэр Дагъыстэным, иужькIэ Осетие Ищхъэрэ – Аланием щекIуэкIащ, иджы ар Къэбэрдей-Балъкъэрым къытхуеблэгъащ. Республикэм и цIыхухэри спорт зэгухьэныгъэхэм щыщхэри абы пэплъащ ар къахуэмыгъэс жыхуаIэм хуэдэу. Шэч къытесхьэркъым зэпеуэхэр псоми гукъинэж зэращыхъунум», - къыхигъэщащ Къардэным.
Мыпхуэдэ зэхьэзэхуэ инми ди республикэр зэрыхуэхьэзырым щыгуфIыкIыу къэпсэлъащ КъБР-м Спорт бэнэкIэмкIэ и федерацэм и унафэщI Мер Арсен. Абы жиIащ бэнакIуэхэм я профессиональнэ лигэм и зэIущIэ ди щIыналъэм щебгъэкIуэкIыным жэуаплыныгъэшхуэ зэрыпылъыр, спортсмен нэхъ лъэщ дыдэхэр абы зэрыхэтынур, ди спортсмен ныбжьыщIэхэм апхуэдэ зэпеуэхэр ялъагъуныр зэрыуасэншэр.
Алыдж-урым бэнэкIэмкIэ екIуэкIыну зэIущIэхэм теухуауэ къэпсэлъащ УФ-м щIыхь зиIэ и тренер Къардэн Анзор.
«Ди классикхэм IэмалыфI дыдэ яIэщ я унэ щыIэжу утыку къихьэну, я зэфIэкIхэр щагъэлъэгъуэну, сыту жыпIэмэ, абы сыт щыгъуи къару лей къыпхелъхьэ, нэхъыбэм утрегъэгушхуэ. Гъуэныбэ Iэуес, Локьяев Жамболэт, КIэмпIарэ Марат сымэ бэнакIуэ нэхъыфI дыдэхэм хабжэ икIи зэфIэкI лъагэхэр зэраIэр ди къэралми дунейпсо утыкушхуэхэми щагъэлъагъуэ зэпытщ илъэс къэс. Ди цIыхухэми Iэмал яIэнущ а бэнэкIэ лIэужьыгъуэм и дахагъыр нэсу зыхащIэну», - жиIащ абы.
Зэхьэзэхуэм хэтыну бэнакIуэхэм захуигъазэу УФ-м щIыхь зиIэ и тренер ЗэкIуий Арсен жиIащ килограмм 74-рэ зи хьэлъагъхэм я деж щыбанэхэм щыуагъэ ящIэкIмэ къазэрыхуэмыгъур икIи мыпхуэдэ зэпеуэхэм дэтхэнэ зы баллым и уасэми хуэдитIкIэ зэрыхэхъуэр.
«БэнакIуэхэм зэхьэзэхуэ хьэлъэ къапэщылъщ. Сыхуейщ, фэбжь къыхамыхыу, я зэфIэкIхэр здынэсыр ягъэлъэгъуэну, пэжу, ерыщу зэпэщIэтыну», - жиIащ ЗэкIуийм.
Спортсменхэми къыхагъэщащ зэныбжьэгъугъэмрэ зэгурыIуэныгъэмрэ япэ зэрырагъэщыр. Апхуэдэуи, фIыщIэ ящIащ Налшык гуапэу къызэрыщрагъэблэгъам, зыхуей-зыхуэфIхэмкIэ нэсу къызэрызэрагъэпэщам щхьэкIэ.
ЦIыху куэдым я кIий-гуо макъхэм щIэту, гуащIэу екIуэкIа зэIущIэхэм я финалым щызэхуэзащ ди бэнакIуэ ЗэкIуий Анзоррэ США-м къикIа спортсмен Вебстер Кэннонрэ. Ди гуапэ зэрыхъуащи, зэпэщIэтыныгъэм и бжыгъэр 4:3-уэ Анзор текIуащ икIи Iэмал иIэ хъуащ БэнакIуэхэм я профессиональнэ лигэм и бгырыпхым щхьэкIэ Сидаков Заурбэч хуэзэну.
Осетин щIалэм а бгырыпхыр къыщихьауэ щытащ мы гъэм гъатхэпэм Ташкент щекIуэкIа зэхьэзэхуэм - Сидаковым ар къыIэщIигъэкIащ дуней псом и чемпион япон бэнакIуэ Такахаши Кота.
ЗэрытщIэжщи, Ярыгиным и Кубокыр къыщихьым ЗэкIуий Анзор осетин щIалэр хигъэщIауэ щытащ. Апхуэдэ текIуэныгъэкIэ иджыри дыпщогугъ, Анзор!
