ТекIуэныгъэр къыхуагъэфащэ

КъБКъУ-м ПравэмкIэ, экономикэмрэ финансхэмкIэ и институтым и «Юриспруденцэ» унэтIыныгъэм и 4-нэ курсым щеджэ Шыгъушэ ФатIимэ илъэс къэс екIуэкI ЩIэныгъэ лэжьыгъэхэмкIэ урысейпсо зэпеуэм и федеральнэ Iыхьэм текIуэныгъэ къыщихьащ.

Зэхьэзэхуэр Суд приставхэм я федеральнэ къулыкъущIапIэм зэхишащ ЮстицэмкIэ урысейпсо къэрал университетым щIыгъуу. Хабзэ зэрыхъуам тету, абы я зэфIэкI щагъэлъагъуэ Урысейми хамэ къэрал­хэми щызэфIэува суд пристав ­IэнатIэм и къежьапIэм, зэрызиужьам, IэнатIэр иджырей мардэхэм тету зэрылажьэм теу­хуауэ къэхутэныгъэ лэжьыгъэхэр езыгъэкIуэкI ныбжьы­щIэхэм. Зэхыхьэм илъэс куэдкIэ Урысейм и ФССП-м деж щыIэ Жылагъуэ советым и уна­фэщIу щыта Чичканов Валерий и цIэр зэ­рехьэ.
ЩIыналъэм щекIуэкIа зэхьэ­зэхуэм къыщыхаха лэжьыгъэ нэхъыфIхэр федеральнэ утыкум ирахьащ, къэпщытакIуэ  гу­пым хэт IэщIагъэлIхэр хэ­п­лъэ­ри, лэжьыгъэ нэхъыфIхэр ­ягъ­э­белджылащ.
Шыгъушэ ФатIимэ япэ увы­пIэр къыщихьащ «Урысейм Суд приставхэм я институтым зэрызыщиужьам и тхыдэ» унэ­тIыныгъэм. Абы и къэхутэныгъэм (Къэбэрдей-Балъкъэр АССР-м суд актхэр щагъэзащIэ и органхэр зэрызэфIэувамрэ зэры­заужьамрэ (1922 - 1991 гъэхэм): совет лъэхъэнэм щыIа щIыналъэ щхьэхуэныгъэмрэ зэманым къигъэув къалэнхэмрэ) щIэныгъэрылажьэхэм пщIэшхуэ къы­хуащIащ. Студентыр игъэхьэзыращ Уголовнэ хабзэмкIэ, процессымрэ криминалистикэмкIэ кафедрэм и доцент, юридическэ щIэ­ныгъэхэмкIэ кандидат Хъар­зынэ Виолетэ.
Къэхутэныгъэр теухуащ совет лъэхъэнэм Къэбэрдей-Балъкъэр АССР-м суд унафэхэр залымыгъэкIэ зэрыщагъэзащIэ системэр къыщызэгъэпэщынымрэ зегъэужьынымрэ. Авторым зэпкърихащ союзпсо суд реформэмрэ щIыпIэхэм гъэзэ­щIа­кIуэ властыр зэры­щы­зэфIэувамрэ зэрызэ­пы­щIар, щIы­налъэ щхьэхуэныгъэми ­гулъытэ хэха хуищIащ. Лэжьыгъэм къыщыгъэлъэгъуащ социально-экономикэ щыты­кIэхэм, жылагъуэр лъэпкъ куэду зэрызэхэтым, республикэм и щэнхабзэ щхьэхуэныгъэхэм елъы­тауэ суд актхэр зэрагъэзащIэм хэлъа зэхъуэкIыныгъэхэр, лъэхъэнэм къигъэувхэмрэ ахэр къызэрызэранэкI Iэмалхэмрэ къэхута хъуащ.

Iэрыс Iэсият.