Алинэ иратхэ Гиннесс и тхылъым

ЦIыхубз альпинистхэм ящыщу и ныбжькIэ псом нэхърэ нэхъыщIэу метр мини 8-м щIигъу я лъагагъыу дунейм тет къурш 14-ми я щхьэщыгум япэу ихьар Къэбэрдей-Балъкъэрым и хъыджэбз пажэ ­Пекъу Алинэщ. Абы и зэфIэкI къы­зэ­рымыкIуэр иджыблагъэ ихуащ Гиннесс и тхылъым, рекордхэр иратхэу щыIэм.

Абы теухуа хъыбар  Алинэ къритхащ соцсетхэм езым щиIэ и напэкIуэцIхэм. Пекъум зэрыжиIамкIэ, абы и рекордхэр официальнэу къалъытащ дуней псом щынэхъ лъагэ бгыхэм я щыгум дэкIынымкIэ программэр игъэзэщIа нэужь. 
«Иджы, сэ официальнэу сратхащ рекордхэмкIэ Гиннесс и тхылъым, я лъагагъкIэ метр мини 8-м щIигъу ­къурш 14-ми япэу дэкIа бзылъхугъэ альпинистхэм ящыщу псом нэхърэ сынэхъыщIэу сыкъалъытэу», - щи­т­хащ Алинэ соцсетым. 
Къыхэдгъэщынщи, ди адыгэ пщащэм хузэфIэкIар Урысей Федерацэм и альпинистхэм, цIыхухъухэми цIы­хубз­хэми, иджыри къэс зыми лъэкIакъым. Ди къэралым и тхыдэми ар щыяпэщ. Альпинист цIэрыIуэ Богомолов Сергей къурш 13-м я щыгум щхьэщыхьащ, епщыкIуплIанэм хунэсакъым. Абыи щхьэусыгъуэ зыбжанэ иIэщ, и ныбжьри хэту: ар илъэс 75-м щIигъуащ. 
Пекъу Алинэ бгы нэхъ лъагэ дыдэу къалъытэхэм дэкIын щыщIидзар 2023 гъэм и мэлыжьыхьырщ икIи зэман кIэщIым къриубыдэу хузэфIэкIащ ­къурш уардэ 14-ми и лъэр щигъэувын. Альпинистхэм я дежкIэ ехъулIэныгъэм и ехъулIэныгъэжщ ар. Апхуэдэ зыхузэфIэкIауэ дуней псом тетыр цIыху 41-рэщ, Алини яхэту. 
КъищынэмыщIауэ, ди адыгэ пщащэм къищта а къуршхэм ящыщу 10-р Гималаим щыIэщ: Джомолунгмэ (Эверест) (метр 8848-рэ), Канченджангэ (8586-рэ), Лхоцзе (8516-рэ), Макалу (8485-рэ), Чо-Ойю (8201-рэ), Дхаулагири (8167-рэ), Манаслу (8156-рэ), Нанга-Парбат (8126-рэ), Аннапурнэ (8091-рэ), Шишабангмэ (8027-рэ). 
Адрейхэр Индиемрэ Китаймрэ я зэпыхьэпIэм деж щыIэ Каракорум ­къуршхэм яхохьэ: Чогори е К2 (8614-рэ), Гашербрум 1 (8080-рэ), Гашербрум 2 (8035-рэ), Броуд-Пик (8051-рэ). 
Мыдрейуэ, псом япэу къурш 14-ри зэщIэзыгъэхьэфар Италием щыщ альпинист цIэрыIуэ Месснер Райнхольдщ. Ар къыщыхуар 1970 - 1986 гъэ­хэрщ. ЦIыхубзхэм ящыщу Алинэ ипэ­кIэ ар зэхузэфIэкIар цIыхуищщ. Норвегием и альпинисткэ Харилэ Кристин, гъуэгугъэлъагъуэ Тенджен-ламэ и гъу­сэу 2023 гъэм къурш 14-ми дэкIащ. 
Пекъу Алинэ хузэфIэкIащ 2023 гъэм къурш 11-м дэкIыну, иужьрей 3-р 2024 гъэм къищтащ. ГъэщIэгъуэнращи, япэ илъэсым псоми ящхьэщыхьэнут ар, ауэ альпинистхэр бгым дэкIыну ­хуит щащI пIалъэр (я шынагъуэншагъэм теухуауэ) и кIэм нэсати, къэмыувыIэу хъуакъым. КъыкIэлъыкIуэ илъэ­сым хъыджэбз ерыщым псори зэщIигъэхьащ.