Бжыгъэхэм къагъэлъагъуэ

30 июня, 2026 - 10:22
2026 гъэм и щIышылэм – мэлыжьыхьым Къэбэрдей-Балъкъэрым и промышленнэ индексыр проценти 112,3-рэ хъуащ. Республикэм и экономикэм щыщ IэнатIэхэм къагъэлъэгъуа зэфIэкIхэр зэпэщхьэхуэу къатщтэмэ: щIыуэпс хъугъуэфIыгъуэхэр къыщIэхынымкIэ IэнатIэм – процент 94,1-рэ, продукцэхэр къыщIэзыгъэкIхэм, абыхэм елэжь IэнатIэхэм – проценти 111,3-рэ, электрокъарукIэ, газкIэ, хуабэкIэ къызэзыгъэпэщ, хьэуар зыгъэкъабзэ IэнатIэхэм - процент 113,0-рэ, псы яхуэзыутIыпщхэм, къагъэсэбэпар Iузышхэм, кIэрыхубжьэрыхухэр зэщIэзыкъуэхэм, уэрамхэр, пщIантIэхэр зэлъыIузыххэм - проценти 132,3-рэ къагъэлъэгъуащ. 
Къапщытэж пIалъэм къриубыдэу нэкулъ лIэужьыгъуэхэм, гъэшым, крупам, маргариным, тхъуцIынэм, кхъуеймрэ кхъуейлъалъэмрэ, йогуртым, шхум, шатэм, Iусыпхъэм, IэфIыкIэм, нарзаныпсым, зэрылажьэ щыгъыным, кIэстумым, щэкIхэкIым, пыIэм, лъэпэдым, унэлъащIэм ирахьэлIэ цIыкIуфэкIухэм, абдж птулъкIэм, гъущIым къыхэщIыкIа продукцэм, лэжьыгъэм къыщагъэсэбэп Iэмэпсымэхэм, рентген аппаратхэм, унэлъащIэм, медицинэ Iэмэпсымэхэм я куэдагъым хагъэхъуащ. 
Электрокъарурэ хуабэу къалэжьари нэхъыбэщ. 
Апхуэдэу щыхъукIи лым, пхъэщхьэмыщхьэ-хадэхэкI консервым, сэхуран дагъэм, хьэжыгъэм, псыIэфIым, пыченэм, тепIэнщIэлъыным, вакъэм, картоным къыхэщIыкIа ашычым, кислородым, пластмассэм, пластмассэм къыхэщIыкIа ашычхэмрэ коробкэхэмрэ, пластмассэм къыхэщIыкIа бжэ-щхьэгъубжэм, абдж банкIхэм, бетоным, асфальт-бетон зэхэщIам, чырбышым, кабель продукцэм, автотранспортым ирахьэлIэ пкъыгъуэхэм кIэрыхуащ. 
2026 гъэм и япэ мазиплIым къриубыдэу республикэм щаIэтащ псэупIэу 1050-рэ, абы щыщу унагъуэхэм – 1040-рэ. ФэтэрыщIэу псори зэхэту 1883-рэ яухуащ. Нэгъабэ и апхуэдэ пIалъэм щыIа бжыгъэхэм нэхърэ процент 27,4-кIэ нэхъ мащIэщ ар. Абы щыщу унагъуэхэм яухуащ метр зэбгъузэнатIэу мини 138,8-рэ. 2025 гъэм и щIышылэм - мэлыжьыхьым щыIа бжыгъэхэм нэхърэ процент 41,3-кIэ нэхъ мащIэщ ари. 
Фэтэр куэду зэхэт псэупIэхэр зыухуэ IуэхущIапIэхэм яIэтар метр зэбгъузэнатIэ мин 49,5-рэ хъуащ. Нэгъабэ и апхуэдэ пIалъэм яхузэфIэкIар метр зэбгъузэнатIэ мин 23,0-рэщ.
Къуажэ щIыпIэхэм щаухуащ псэупIэу псори зэхэту метр зэбгъузэнатIэ мин 96,1-рэ е илъэс блэкIам и иджы хуэдэ зэманым яхузэфIэкIам нэхърэ процент 39,0-кIэ нэхъ мащIэ. 
Къапщытэж пIалъэм къриубыдэу Къэбэрдей-Балъкъэрым и мэкъумэш. фермер, уней IуэхущIапIэхэмрэ унагъуэхэмрэ зэхэту къалэжьащ мэкъумэш продукцэу сом мелард 11,6-рэ и уасэ е 2025 гъэм и щIышылэм – мэлыжьыхьым щыIа бжыгъэхэм проценти 101,7-кIэ хуэкIуэу. 
Республикэм и мэкъумэшыщIэхэр гъатхасэм йоужьэрэкI. НобэкIэ мэкъумэш IуэхущIапIэхэм жылэхэр гектар мин 17,4-м халъхьащ. Нэгъабэ и апхуэдэ пIалъэм яхузэфIэкIам нэхърэ проценти 3,4-кIэ нэхъ мащIэщ ар. Абы щыщу гектар мини 6,2-м тращIащ хьэцэпэцэмрэ джэш хъуреймрэ (нартыхур хэмыту). Нартыху жылапхъэм ирагъэубыдащ гектар мини 5,6-рэ, сэхураным – гектар мин 1,1-рэ, хадэхэкIхэм – гектар мин 1,2-рэ.
2026 гъэм накъыгъэм и 1-м ирихьэлIэу республикэм и мэкъумэш, фермер, уней IуэхущIапIэхэмрэ унагъуэхэмрэ Iэщ щхьэ бжыгъэу яIыгъам (кхъуэмрэ джэдкъазымрэ къищынэмыщIа) кIэрыхуащ, нэгъабэ и апхуэдэ пIалъэм щыIа бжыгъэхэм елъытауэ икIи ахэр хъуащ: Iэщышхуэу – мин 273,3-рэ. Нэгъабэ и апхуэдэ пIалъэм ар мин 280,1-рэ хъууэ щытащ. Абы щыщу жэмыр – мини 141,7-рэ (мини 144,1-рэ), мэлымрэ бжэнымрэ – мин 427,7-рэ (мин 450,0-рэ). Апхуэдэу щыхъукIи, фIыуэ хэхъуащ кхъуэ бжыгъэм - мини 2,0-рэ, джэдкъазым – мелуани 5,0-рэ. 
Республикэм Iэщрэ джэдкъазу псори зэхэту щаIыгъым щыщу Iэщышхуэм и процент 72,2-р, абы щыщу жэмым и процент 67,5-р, кхъуэм и процент 99,2-р, мэлымрэ бжэнымрэ я процент 46,8-р, джэдкъазым и процент 37,0-р унагъуэхэм яйщ. 
2026 гъэм и япэ мазиплIым КъБР-м и мэкъумэш, фермер, уней IуэхущIапIэхэмрэ унагъуэхэмрэ зэхэту къалэжьащ лырэ джэдкъазылу (псэууэ шэчауэ) тонн мин 35,7-рэ икIи нэгъабэ и апхуэдэ пIалъэм щыIа бжыгъэхэм нэхърэ процент 1,1-кIэ нэхъыбэщ ар. Гъэшу къашащ тонн мини 147,0-рэ (процент 1,7-кIэ нэхъыбэщ), джэдыкIэу кърахащ мелуан 63,9-рэ (проценти 2,4-кIэ нэхъыбэщ). 
Мэкъумэш IуэхущIапIэхэм зы жэмым хуэзэу гъэшу къыщIашащ килограмм 2I22-рэ (2025 гъэм и щIышылэм – мэлыжьыхьым – килограмм 2109-рэ). ДжэдыкIэу 66-рэ зы джэдым хуэзэу кърахащ (нэгъабэ – 59-рэ).
ХЬЭЩЫКЪУЕЙ Олег.
  • 14 просмотров
Поделиться: