Кхъухьлъатэзехуэ

Кхъухьлъатэзехуэ цIэрыIуэ Мазэхъу Владимир 1929 гъэм щIышылэм и 6-м Краснодар крайм къыщалъхуащ. Ар къыщыхъуащ Тохъутэмыкъуей жылэм. 1948 гъэм ВВС-мкIэ Краснодар спецшколыр къиухащ. Абы щегъэжьауэ хэтащ СССР-м и дзэ узэдахэм. 1950 гъэм Балашов къыщиухащ авиацэмкIэ кхъухьлъатэзехуэхэм я дзэ училищэ нэхъыщхьэр. 1954 гъэм лейтенант нэхъыжь хъуащ. 1954 гъэм кхъухьлъатэзехуэ IэнатIэм пэрыуващ, граждан авиацэмкIэ Москва и управленэм и кхъухь щхьэхуэм и командиру. 1960 гъэм СССР-м Авиацэ промышленностымкIэ и министерствэм кхъухьлъатэзехуэхэм я школыр къыщиухащ. 1960 гъэм щегъэжьауэ лэжьащ граждан авиацэмкIэ къэрал щIэныгъэ-къэхутэныгъэ институтым и кхъухьлъатэзехуэу. ИужькIэ, институтым авиацэмкIэ и эскадриль щхьэхуэм и унафэщI ящIащ. 1957 гъэм СССР-м граждан авиацэмкIэ и академиер къиухащ. Бе-32, Л-410, Як-40, Ан-10, Ту-124, Ту-134, Ту-154, Ил-18, Ил-62, Ил-86 кхъухьлъатэ лIэужьыгъуэхэм исащ. Уэгум итащ сыхьэт мин 11-м щIигъукIэ. Мазэхъу Владимир итхащ кхъухьлъатэм ехьэлIа щIэныгъэ лэжьыгъэхэр. Граждан авиацэм и къэрал щIэныгъэ-къэхутакIуэ институтым и методикэ советым, кхъухьлъатэхэм я зэпэщыныгъэр къэлъытэнымкIэ советым хэтащ.

Кхъухьлъатэзехуэм Париж щыкIуам къыхуихуащ «Боинг-747», «Боинг-767» «А-300» кхъухьлъатэ лъэщхэм я кабинэхэр къипщытэну. Париж къикIыу Москва къэлъэтэжауэ щытащ «Локхиде-Тристаре» кхъухьлъатэмкIэ. «Каравелла», «Nord 262» кхъухьлъатэхэмкIэ Iэзэу лъэтащ. Совет Союзым и лъэIукIэ «Томпсон» франджы фирмэм ищIа «Ил – 86» тренажёр-кхъухьлъатэр нэсу къипщытащ, франджы IэщIагъэлIхэм ягъэщIагъуэу.Абы щыгъуэ Франджым и кхъухьлъатэзехуэ-гъэунэхуакIуэ бгъэхэIур къыхалъхьат абы.

1957 гъэм «СССР-м щIыхь зиIэ и кхъухьлъатэзехуэ-гъэунэхуакIуэ» цIэ лъапIэр къыхуагъэфэщащ. «Совет Союзым и ЛIыхъужь», «Социалист Лэжьыгъэм и ЛIыхъужь» цIэхэр къыфIащащ. 1990 гъэ пщIондэ кхъухьлъатэзехуэу, граждан авиацэм и институтым шынагъуэншагъэр къыщызэгъэпэщынымкIэ и центрым и унафэщIу лэжьащ. 1973 гъэм Лъэпкъхэм я зэныбжьэгъугъэм и орденыр, 1981 гъэм - Лениным и орденыр, 1990 гъэм Октябрь Революцэм и цIэкIэ щыIэр къыхуагъэфэщащ Мазэхъум.

2015 гъэм накъыгъэм и 15-м Тахтамукай жылэм дэт курыт еджапIэ езанэм фIащащ Мазэхъу Владимир и цIэр. ЕджапIэм и блынми фIалъхьащ абы и фэеплъ пхъэбгъур. Къыщыхъуа жылэм дэтщ кхъухьлъатэзехуэм и фэеплъ. Москва ЛIыхъужьхэм я аллеем итщ адыгэ кхъухьлъатэзехуэ цIэрыIуэ Мазэхъу Владимир и фэеплъ.