ЦIыхубэм яхуэгъэза псалъэ

Налшык мы зэманым щагъэзащIэ Къэбэрдей-Балъ­къэрым и усакIуэхэм ятеухуа Iуэху щхьэпэ. Головком, ЩоджэнцIыкIум, Къуэныкъуейм, Ашурэм, Кировым, Вовчок, нэгъуэщIхэми я цIэхэр зезыхьэ уэрамхэм я автобус къэувыIэпIэхэм деж адыгэ, балъ­къэр литературэхэм я классикхэм я усэхэр зытет абджыпсхэр щагъэуващ.

УФ-м и ТхакIуэхэм я зэгухьэныгъэм и щIыналъэ къудамэм и унафэщIхэм къыхалъхьа жэрдэмыр къыдаIыгъащ Налшык къалэ администрацэмрэ къалэм зегъэужьынымкIэ «Платформа» арт-залымрэ. Иджы ­къа­лэдэсхэмрэ республикэм ди хьэщIэхэмрэ Iэмал яIэ­щ Къэбэрдей-Балъкъэрым и усакIуэ цIэры­Iуэхэу ЩоджэнцIыкIу Алий, КIыщокъуэ Алим, Кулиев Къайсын, Къэ­шэж Иннэ, Зумакуловэ Танзиля, Отаров Ке­ри­м, нэ­гъуэщI­хэми я IэдакъэщIэкIхэм зыщагъэгъуэзэну. Щэнхабзэ, литературэ щIэинхэм нэхъыбэ щы­гъэ­гъуэ­зэным гу­лъытэ зэрыхуащIым мыхьэнэшхуэ иIэщ. Узыщы­гу­фIы­кIынщ къалэм и автобус къэувыIэ­пIэ­хэр зэрагъэдахэри. 
Къэбэрдей-Балъкъэрым и дахагъэр, и хабзэхэр къызыхэщ усэхэм щIэблэр щIапIыкI я щIыналъэр фIыуэ ялъагъуну, дызэрыгушхуэ цIыху щэджащэхэм щыгъуэ­зэн зэрыхуейм тращIыхьмэ. УсакIуэхэм цIыхубэм зэ­рызыкъытхуагъазэ псалъэхэр уасэншэщ.