Бахъсэн щIыналъэм щыхъыбархэр

 «ГъащIэм хуэщIа инфраструктурэ» лъэпкъ пэхуэщIэм хыхьэ «Къалэдэсхэм я псэукIэр егъэфIэкIуэн» къэрал проектым ипкъ иткIэ Бахъсэн щIыналъэм и Зеикъуэ къуажэм и жыг хадэ цIыкIур къызыхуэтыншэу зэрагъэпэщыжын щIадзащ. Абы метр зэбгъузэнатIэу метр 500-м щIигъу еубыд икIи, пэхуэщIэм къызэрыщыгъэлъэгъуамкIэ, цIыхухэр куэду щызэхуэс щIыпIэм иджырей теплъэ иратынущ.

Лэжьыгъэхэм хыхьэу жыг хадэ цIыкIур къагъэкъэбзащ, зекIуапIэхэм асфальтыщIэ тралъхьащ, сабийхэм я джэгупIэхэр яубзыху. ИужькIэ, лъэс лъагъуэхэм плиткэхэр иралъхьэнущ, уэздыгъэхэр щыпадзэнущ, тетысхьэпIэхэр, кIэрыхубжьэрыху идзыпIэхэр, спортым хуэщIа Iэмэпсымэхэр щагъэувынущ, сабий джэгупIэр зэпэщ ящIынущ. Лэжьыгъэхэр дызэрыт илъэсым зэфIагъэкIынущ.

Бахъсэн щIыналъэм и Къубэ-Тэбэ къуажэм псы къабзэкIэ жылэр къызэгъэпэщыным хуэунэтIа лэжьыгъэшхуэ щокIуэкI мы махуэхэм. Ар ягъэзащIэ «ГъащIэм хуэщIа инфраструктурэ» лъэпкъ пэхуэщIэм хыхьэ «Коммунальнэ инфраструктурэр егъэфIэкIуэн» къэрал пэхуэщIэм ипкъ иткIэ.

УхуакIуэхэм а лэжьыгъэхэм хуэщIа техникэр кърашэлIауэ бжьамийхэр зыдалъхьэну щIыр датIыкI, псори зэхэту километр 13-м нэблагъэ и кIыхьагъыу. Абы къыдэкIуэу, полимерым къыхэщIыкIа бжьамийхэр зэпагъавэ. Ахэр щаукъуэдиинущ къуажэм и уэрам нэхъыщхьэхэм: Къалмыкъым и цIэр зезыхьэм, Комсомольскэм, Степнойм, Надречнэм.

Апхуэдэуи, псыр уэру къыдэкIуеиным хуэщIа чэщанэ, бжьамийхэм якIэлъыплъыфын, ахэр зэрагъэпэщыжын папщIэ, гъущIымрэ бетонымрэ къыхэщIыкIа псыкъуийхэр ухуакIуэхэм ягъэувынущ. Лэжьыгъэхэр 2027 гъэм зэфIагъэкIын мурад щыIэщ икIи абы иужькIэ къуажэдэсхэм псы къабзэ зэпымыууэ яIэрыхьэу щытынущ, жаIащ IэщIагъэлIхэм.

Бахъсэн къалэм Шымэзокъуэмрэ Беслъэнеймрэ я цIэхэр зезыхьэ и уэрамхэр къызэхуэтыншэу зэрагъэпэщыж мы махуэхэм. Псори зэхэту километри 3-м нэблагъэ я кIыхьагъщ абыхэм . Лэжьыгъэхэр ирагъэкIуэкI «Къэбэрдей-Балъкъэр Республикэм и транспорт IэнатIэр егъэфIэкIуэн» къэрал программэм къыхэкIа субсидиемкIэ. НобэкIэ ухуакIуэхэм километри 2 хуэдизым асфальтыщIэ тралъхьащ.

Беслъэнейм и уэрамым курыт еджапIэ №2-р, Щауэ Iэхьед и цIэр зезыхьэ спорт школыр тетщ икIи цIыкIухэм я шынагъуэншагъэр къызэрагъэпэщу лъэс лъагъуэхэр хаукъуэдикIынущ, зыхуеи хуагъэзэнущ.

Иджыпсту асфальтыр щытралъхьэ уней лъапсэхэр здэщыIэ щIыпIэм хуэзэу. ИужькIэ уэрамитIми гъуэгу дамыгъэхэр щагъэувынущ, зэхыхьэпIэ-зэхэкIыпIэхэр къыщыхагъэщхьэхукIынущ, иджырей уэздыгъэхэр щыпадзэнущ. Ахэр зэфIагъэкIынущ мы гъэм фокIадэм ирихьэлIэу.

Бахъсэн къалэм хьэрычэтыщIэхэмрэ муниципалитетымрэ я ахъшэкIэ «футбол цIыкIум» папщIэ топджэгу губгъуэ щаухуэ, псори зэхэту метр зэбгъузэнатIэ 1113-рэ хъууэ.

ЛэжьакIуэхэм «IэрыщI алэрыбгъурыр» губгъуэм иралъхьакIэщ, тренерхэм я пэшхэри яухуащ. Иджы къапэщылъщ зытIэщIыпIэхэмрэ зыщагъэпскIыж пэшхэмрэ зыхуей хуагъэзэну, уэздыгъэ абыхэм щIашэну.

Щауэ Iэхьед и цIэр зезыхьэ спорт еджапIэм и тренер Бахъуэ Мурат зэрыжиIамкIэ, стадионым зыщагъэсэфынущ сабийуэ 100-м щIигъум, мы гъэм фокIадэм ирихьэлIэуи лэжьэн щIидзэнущ.

  МЭРШЭН Батыр.