Нэпсеягъэр емыкIу?

Насыпыр зыхэлъэгъуапхъэр ахъшэракъым, атIэ абы и куэдагъырщ. А Iуэхум щыхьэт тохъуэ «Жылагъуэ Iуэху еплъыкIэ» фондым иригъэкIуэкIа къэхутэныгъэр. Социологхэм къызэрахутамкIэ, иужьрей зэманым урысейм и цIыхухэр хущIэкъу хъуащ, егъэлеяуэ гугъу ехьми, Iэмал зэриIэкIэ, ахъшэ нэхъыбэ къызэралэжьыным. Зи пщIантIэпс хьэлэлкIэ мылъкушхуэ зэзыгъэпэщахэм, нэхъапэхэми хуэмыдэжу, пщIэшхуэ хуащI.
Урысейм и цIыхухэм я процент 58-м зыкъаумысыжащ, Iэмал зэриIэкIэ, мылъку нэхъыбэ зэрагъэпэщыным зэрыхущIэкъумкIэ. КъызэрыщIэкIымкIи, мылъкущIэкъухэм я нэхъыбэр (процент 77-р) зи ныбжьыр илъэс 30 иримыкъуа щIалэгъуалэрщ. НэхъыжьыIуэхэм ящыщу апхуэдэ нэпсейхэм я бжыгъэр процент 53-рэ мэхъу.
Урысейм и цIыхухэм ящыщу процент 47-м къалъытэ цIыхур нэхъыбэ къызэрилэжьыным иужь итын хуейуэ. Ахъшэпсэхэр фIыуэ ялъагъуртэкъым процент 30-м. Иджыпсту процент 59-м пщIэ зыхуащIыр мылъку зиIэхэращ. Процент I9-м нэпсейхэр яфIэфIкъым.
«Мылъкур хьэдрыхэ здэпхьыфынукъым», - жаIэ. Пэжу пIэрэ ар? Хьэуэ, нэхъыбэм я еплъыкIэр апхуэдэкъым. Къэхутэныгъэм къызэригъэлъэгъуамкIэ, процент 37-м къалъытэ къулей ухъун папщIэ псом нэхърэ нэхъыщхьэр улэжьэфу ущытыныр арауэ. Процент 35-м лэжьыгъэр фIыуэ плъагъуныр ягъэнэхъапэ. Процент 26-м мылъку къэлэжьыныр хуагъакIуэ акъылымрэ щIэныгъэмрэ, процент 23-м ар къалъытэ насыпырыхьу, процент 2I-м ерыщагъэ пхэлъыным, процент 20-м Iуэхум утегушхуэфыным трагъащIэ. Языныкъуэхэми къыхагъэщащ уи къарур уи фIэщ хъужыныр, хьэрэм умышхыныр, зэфIэкI убгъэдэлъыныр. МащIэ дыдэм къалъытащ нэпсейхэм, гущIэгъуншэхэм, цIыхугъэншэхэм нэхъ тыншу мылъку зэрагъэпэщыфу.