Кремлым ирагъэблагъэ щыхъуакIэ…

КъБКъУ-м уэрэдымрэ къафэмкIэ и «Амикс» уэрэджыIакIуэ гупым хэта, Темыркъан Юрэ и цIэр зезыхьэ Сабий музыкэ школ №1-мрэ Налшык къалэм и гимназие №14-мрэ я гъэсэн Куэцэ Идар и ныбжьым емылъытауэ макъамэм ехьэлIауэ къалэн куэд пщэ­рылъ зыщещIыж икIи зэфIэкI инхэр къегъэлъагъуэ.

И ныбжьыр илъэсиплI фIэкIа щымыхъум, Идар макъыфI зэриIэм, нотэм техуэу уэрэд зэрыжиIэм и адэшхуэм гу лъитащ икIи «Амикс» театрым и унафэщI, и ныбжьэгъу Къул Амир и деж зимыгъэгувэу ишащ. А зэманым гупым хэт нэхъыщIэхэм я ныбжьыр илъэси 7-8 хъурт. И макъым едаIуэри, хагъэхьэну мурад ящIащ. ЯпэщIыкIэ Идар Къул Ланэрэ Амиррэ, иужьым япхъу Даянэ дэлэжьащ. ЩIалэ цIыкIур зэпеуэ куэдым пашэ зэрыщыхъуам абыхэм я фIыгъи хэлъщ. Макъамэм зэфIэкI инхэр щызэзыгъэхъулIэ, республикэм и цIэр фIыкIэ зыгъэIу Куэцэ Идар мы зэманым я гъэсэнщ Гараевэ Полинэрэ Кононовэ-Навицкая Иринэрэ, актёр Iэзагъэм хуэзыгъасэхэу Уманец Михаилрэ Тэмазэ Лиуанрэ.
Къэбэрдей-Балъкъэрым икIа, зи хьэрхуэрэгъухэм ефIэкIыу къалъыта Куэцэ Идар Николаевым и музыкэ академием къызэригъэпэща «Пщэдджыжь вагъуэ» дунейпсо зэпеуэ зэIухам япэ увыпIэр 2019 гъэм къыщихьащ, къэпщытакIуэ гупым щыщхэм бал нэхъыщ­хьэхэр къыхуагъэфащэри. КъыкIэлъыкIуэу ар мы гъэм и зэфIэкI щеплъыжащ «Голос. Дети» зэпеуэм.
- Идар хуабжьу къызэлъэIурт «Голос. Дети» нэтыным  и тхылъхэр  езгъэхьыну. Сабий мин бжыгъэхэр зыщIэлъэIу программэм ухэхуэну зэрымытыншым къыхэкIыу ар згъэкIуатэрт, игу щрилъхьакIэ Iэмал имыIэу зэгуэр абы и зэфIэкI зэрыщеплъыжынур къызгурыIуэми. Иужьым арэзы сытехъуэри, и тхылъхэр езгъэхьащ икIи мыгувэу проектым драгъэблэгъащ. Идар абы щыжиIащ Доницетти Гаэтано и «Любовный напиток» оперэм хэт Неморино и ариер. Ар Паваротти Лучано и репертуарым щыщщ, - игу къегъэ­кIыж Идар и анэ Мадинэ. - Бастэрэ Крид Егоррэ я гупэр къы­хуагъэзами, Идар Гагаринэ Полинэ и гупыр къыхихащ, классикэ уэрэдхэр проектым зэрыщыжиIэм къыхэкIыу. Иужь Iыхьэм Идар Бойкэ Даниилрэ Омирбайулы Сагынрэ я гъусэу Сафинэ Алессандрэ и «Luna» уэрэд дахэр ягъэзэщIащ. Къэзахъстаным щыщ Омирбайулы Сагын проектым щытекIуами, Идар гуапэ щыхъуащ цIыху куэд и телъхьэу зэрыщытар. Ар зэпеуэм нэхъри ипсыхьащ икIи мурад ищIащ къэмыувыIэу и зэфIэкIым хигъэхъуэну, и цIэр нэхъ жыжьэ щигъэIуну.
Жанр зэмылIэужьыгъуэхэм - академие вокал, эстрадэ, кроссовер, нэ­гъуэщI лIэужьыгъуэхэми и зэфIэкI щоплъыж уэрэджыIакIуэ щIалэр. Зыдэплъей артистхэм ящыщщ Кудайберген Димаш, Фабиан Ларэ, Адель, Пинк, нэгъуэщIхэри. Налшык и Сабий музыкэ школым Ти­товэ Людмилэ и деж фортепианэм зыщыхуегъасэ. ИнджылызыбзэкIэ итх уэрэдхэм макъамэхэр щIилъхьэурэ фортепианэкIэ егъэзащIэ. Уэрэд жыIэным къыщыдэхуэхэм деж, Идар усэ, тхылъ къеджэну, ятIэ гъэжьам зыгуэрхэр къыхищIыкIыну фIэфIщ. Макъамэр япэ иригъэщми, курыт еджапIэми закъыкIэримыгъэхуу щоджэ. АбыкIэ щапхъэщ техникэ щIэныгъэхэм я доктору, профессору щыта и адэшхуэр.
КъыжыIапхъэщ, Идар нэхъапэIуэхэми макъамэ зэхыхьэ куэдым па­шэ зэрыщыхъуар. УэрэджыIакIуэр щытекIуащ усэ, прозэ къеджэ­нымкIэ «Зажигаем новые звёзды» V дунейпсо фестиваль-зэпеуэм (Cочэ), Крутой Игорь и академием къызэригъэпэща «Академия талантов» урысейпсо фестивалым (Краснодар), «Твой голос» дуней­псо фестиваль-зэпеуэм (Москва), «Радуга над Нальчиком» дунейпсо зэхьэзэхуэм (Налшык), «World Art Games» (Испание), «Золотой голос России» дунейпсо фестивалым (Москва), нэгъуэщI зэхьэзэхуэхэми. Куэцэ Идар Кремлым и Уардэунэм ирагъэблагъэри, накъыгъэм и 9-м ирихьэлIэу къызэрагъэпэща «Спасибо за верность, потомки» махуэшхуэ концертым хэтащ. Абы Кунгуров Евгенийрэ Ибрагимов Ренатрэ я гъусэу игъэзэщIащ «Бессмертный полк» уэрэдыр. Агутин Леонид Сочэ мыгувэу щригъэкIуэкIыну зэхуэсми хэтыну ирагъэблагъэри, мастер-классхэр, зэIущIэ гъэщIэгъуэнхэр, зэпеуэ щIэщы­гъуэхэр къыпоплъэ.
Макъамэр зи псэм хэлъ щIалэ цIыкIум иджыри ехъулIэныгъэ инхэр зыIэригъэхьэну, и вагъуэр куэдрэ блэну ди гуапэщ!

ТЕКIУЖЬ Заретэ.
Поделиться: