И щIыналъэм уэрэд тыгъэ хуещI

КъБР-м щэнхабзэмкIэ щIыхь зиIэ и лэжьакIуэ, КъБКъУ-м уэрэдымрэ къафэмкIэ и «Амикс» театрым и художественнэ унафэщI, композитор, режиссёр Къул Амир уэрэдымрэ къафэмрэ зэфIэкI щызиIэ щIалэгъуалэм илъэс зыбжанэ хъуауэ ядолажьэ. Къул Амир итхащ икIи макъамэр щIилъхьэжащ и «Амикс» театрым игъэзащIэ «Кабардино-Балкария» уэрэдыр, Къэбэрдей-Балъкъэрым и къэралыгъуэр илъэси I00 зэрырикъум триухуар. Къул Амир социальнэ сайтхэм щызэбгригъэкIащ махуэшхуэр щагъэлъапIэм ирихьэлIэу и уэрэдыр цIыхуи I00-м зэуэ ядыжиIэну зэрыщIэхъуэпсым теухуа хъыбарыр.

- Быдэу си фIэщ мэхъу фIыр, гуапагъэр ем зэрытекIуэр. Захуагъэмрэ пэжыгъэмрэ дрателъхьэу дыпсэуну ди къалэнщ. Сыкъыщыхъуа щIыналъэр, сыкъызыхэкIа лъэпкъыр, абы и щэнхабзэр, хабзэхэр зыхэслъхьэ щымыIэу фIыуэ солъагъу, - жеIэ Амир. – «Кабардино-Балкария» уэрэдым и пэ къихуэу, сыщалъхуа къуажэм, сыщыпсэу къалэм, мамырыгъэмрэ лъэпкъ зэныбжьэгъугъэмрэ теухуахэр зэфIэкI зиIэ усакIуэ-уэрэдусхэм я гъусэу стхащ. Иджы къызэхъулIащ куэд щIауэ сигу щызгъафIэ хъуэпсапIэр, ди щIыналъэм и дахагъэмрэ абы хузиIэ лъагъуныгъэмрэ къызэрызгъэлъэгъуэн псалъэхэр сыхэщыпыхьу къыхэсхри. Уэрэдыр «Амикс» гупым япэу щагъэзэщIащ КъБКъУ-м и юбилей пшыхьым. Мызэ-мытIэу ар щыжаIащ къалэ, республикэ зэхыхьэхэм, зэпеуэхэмрэ фестивалхэмрэ. Дэнэ щIыпIэ щыпсэухэми узыншагъэ, мамырыгъэ, гуапагъэ, ехъулIэныгъэ яIэну!

 «Амикс» театрым и артистхэм республикэм и гуфIэгъуэ зэхыхьэхэмрэ махуэшхуэхэмрэ ягъэдахэ. Гупым къыхэкIащ республикэм и уэрэджыIакIуэ, къэфакIуэ цIэрыIуэхэу   Хъусин Анзор, ЦокIыл Азэмэт, Насып Астемыр, Жабоевэ Замирэ, нэгъуэщIхэри.

Къул Амиррэ абы  и щхьэгъусэ, КъБР-м щIыхь зиIэ и артисткэ Ланэрэ,   «Клуб за 30» проектым хыхьэу,  къызэрагъэпэщащ зи ныбжьыр илъэс 30-м щIигъуа, а IэщIагъэм хуемыджами, езыр-езыру уэрэд жызыIэну зыфIэфIхэм  папщIэ  зэхуэсыпIэ.   Клубым къекIуалIэхэр макъамэ гъуазджэм и щэхухэм хагъэгъуазэ, я зэфIэкIым зрагъэужь.

- Си щхьэкIэ уэрэд жыIэным теухуа си хъуэпсапIэр къызэхъулIакъым, ауэ абыкIэ   зэфIэкI  зиIэ сабийхэмрэ щIалэгъуалэмрэ, иджы балигъыпIэ иувахэми   садолажьэ, - жеIэ Амир. - НэгъуэщI IэнатIэ пэрыт си ныбжьэгъухэм, цIыхугъэхэм мызэ-мытIэу жаIэу зэхэсхат   утыку ихьэныр   я хъуэпсапIэу зэрыщытар, иджы караоке клубхэм уэрэд щыжаIэу зэрызытрагъэур. Аращ «Клуб за 30» проектыр къыщIыхэслъхьар.

Гупыр «Амикс» студием тхьэмахуэм щэ щызэхуос. Къул Амиррэ Ланэрэ нэмыщI ахэр сценэ итыкIэм, уэрэд жыIэкIэм хуагъасэ ЩоджэнцIыкIу Алий и цIэр зезыхьэ Къэбэрдей къэрал драмэ театрым и актёр Тэмазэ Лиуан, КъБР-м щIыхь зиIэ и артистхэу Дым Элдар, Шал Хъусен, КъБР-м щэнхабзэмкIэ  щIыхь зиIэ и лэжьакIуэ Романихинэ Иринэ сымэ.

КъБР-м и цIыхубэ тхакIуэ IутIыж Борис и «Нартхэм я дыгъэ» драмэ-поэмэм къытращIыкIа, ди лъэпкъым и блэкIар, и тхыдэр уи нэгу къыщIэзыгъэхьэ япэ адыгэ мюзиклыр Налшык и Музыкэ театрым, Черкесск къалэм ехъулIэныгъэхэр иIэу щагъэлъэгъуащ, тхакIуэ щэджащэр къызэралъхурэ илъэс 76-рэ щрикъум ирихьэлIэу. А лэжьыгъэ купщIафIэм и режиссёрыр икIи макъамэр хуэзытхар Къул Амирщ. Къыхэгъэщыпхъэщ, сыт хуэдэ зэманми цIыхур цIыхуу къэнэжын, нэхъ лъапIэ дыдэу Тхьэр къызэрыхуэупса гъащIэр хъумэжын зэрыхуейр гупсысэ нэхъыщхьэу щыпхыша мюзиклыр цIыхухэм хуабжьу ягу зэрыдыхьар.

- Мюзиклыр театреплъхэм ягу дыхьащ икIи я лъэIукIэ къытедгъэзэжурэ мызэ-мытIэу къэдгъэлъэгъуэжащ. IуэрыIуатэр зи лъабжьэ, цIыхубэр зэкъуэзыгъэувэ, гъэсэныгъэ мыхьэнэ зиIэ апхуэдэ лэжьыгъэ щIэщыгъуэм иджыри къыпытщэну ди мурадщ, - къыддогуашэ Амир.

Къул Амир иригушхуэ хъунущ и театрым хэт щIалэгъуалэм я зэфIэкIым. Ахэр гукъинэжу мюзиклым щыджэгуащ, я утыку итыкIэкIи я фащэкIи дагъуэншэу. КъыпхуэмыIуэтэным хуэдэу лэжьыгъэр удихьэхыу, узыIэпишэу ягъэуващ. Къул Амиррэ и гупымрэ къехъулIа адыгэ мюзиклыр лъэпкъ театр гъуазджэм, адыгэ щэнхабзэм  хэлъхьэныгъэфI яхуэхъуащ. Абы щыджэгуа щIалэгъуалэм я бзэм куэдкIэ зригъэужьащ, уеблэмэ адыгэбзэкIэ тха, ягъэува  лэжьыгъэхэм нэгъуэщI  зыхэщIыкI  яIэу  зыщегъэгъуэзэнымкIэ сэбэп   хъуащ. Япэ адыгэ мюзиклыр щхьэпэщ ди лъэпкъым и тхыдэр жыжьэ къызэрыщежьэр, ди адэжьхэм я гупсысэр зэрыкуур, тIурылъ адыгэбзэр зэрыдахэр зыщамыгъэгъупщэу, абы и IэфIыр зыхащIэу щIэблэр къэгъэхъунымкIэ..