Шэшэн республикэм и цIыхубэ артист Апэнэс Астемыр

Мэкъуагъуэм и 25-м Шэшэн республикэм и къэрал филармонием щекIуэкIащ КъБР-м щыщ уэрэджыIакIуэ Апэнэс Астемыр хухэха концерт. Гъунэгъу республикэр гуапэу къызыIущIа ди лъэпкъэгъур ягъэгуфIащ «Шэшэн Республикэм и цIыхубэ артист» цIэ лъапIэр къызэрыфIащамкIэ. Абы щыхьэт техъуэ дэфтэрыр Апэнэсым къыIэщIилъхьащ Шэшэн республикэм щэнхабзэмкIэ и министр Кадыровэ Айшэт. 
Бзэ куэдкIэ уэрэд зыгъэзащIэ Апэнэс Астемыр Кавказ лъэпкъ псоми фIыуэ ялъагъу жыпIэмэ, ущыуэнукъым. ИнгушыбзэкIи, шэшэныбзэкIи, урымыбзэкIи, уеблэмэ къэзахъыбзэкIи зэхэтхащ Астемыр уэрэдхэр игъэзащIэу. Ахэр цIыхугум нэсынымкIэ сэбэп мэхъу жьы зыщIэт щIалэм и утыку ихьэкIэр, и хьэл-щэн зэтетыр, зи лъащIэм ущIэмыплъэ и гушыIэкIэр, цIыху хэтыкIэ екIур. А лъэныкъуэ псомкIи Астемыр къацIыхуну Iэмал яIащ шэшэн цIыхубэми. 
«Апэнэс Астемыр щIэх-щIэхыурэ къокIуэ ди республикэм, - ятхыж шэшэн газетхэм. – Абы шэшэныбзэкIи уэрэдхэр егъэзащIэ икIи хуэфащэу ди цIыхубэм фIыуэ ялъагъу. Иджы уэрэджыIакIуэр «дыдей дыдэ» хъуащ. Гурэ псэкIэ Астемыр дохъуэхъу «Шэшэн Республикэм и цIыхубэ артист» цIэ лъапIэр зэрыфIащамкIэ». 
КъыкIэлъыкIуэ махуэм Апэнэсыр ирагъэблэгъащ Шэшэн республикэм и музейм щрагъэкIуэкIа «Арт-пщэдджыжьышхэм». Шэшэн республикэм щIэуэ къыщыхалъхьа мыпхуэдэ зэхуэс цIыкIухэм цIыхухэм Iэмал щагъуэт щэнхабзэм щыцIэрыIуэ артистхэр нэхъ гъунэгъуу зрагъэцIыхуну. Абыи Астемыр бысым къыщыхуэхъуащ щэнхабзэмкIэ министр гуащэр. Езыгъэблэгъахэм Астемыр яжриIэжащ и адэр япэ продюсер зэрыхуэхъуар. ЩIалэ цIыкIур илъэсий фIэкIа хъуртэкъым хьэщIэщышхуэхэм щIэзу цIыхухэм къекIуэлIэн щыщIадзам. Апхуэдэ концертхэм я зым абы Димаев Алий зэхилъхьа «Нохчийн» уэрэдыр шэшэныбзэкIэ игъэзэщIэну игу къыщагъэкIащ. «Шэшэныбзэм и макъамэм сыдихьэхат, къикIыр къызгурымыIуэми», - игу къигъэкIыжырт адыгэ хьэщIэм. Пщэдджыжьышхэм и кIэм а уэрэдыр Астемыр и бысымхэм яжриIащ. 
Концертыр къызэзыгъэпэщахэми, абы къекIуэлIахэми, шэшэн лъэпкъым зэрыщытуи фIыщIэ щахуищI и телеграм напэкIуэцIым уэрэджыIакIуэм псалъэ гуапэхэмкIэ захуигъэзащ гуфIэгъуэм хэта дэтхэнэ зыми. 
«Грозный! ФIыщIэшхуэ пхузощI пхуэмыIуэтэну бысым гумащIэ укъызэрысхуэхъуам щхьэкIэ! Си гугъэмкIэ, ныбжьэгъугъэ нэхъ быдэр зэманым пхыкIаращ. Гъуэгуанэшхуэ къэзыкIуа ди зэныбжьэгъугъэр си сабиигъуэм къыщожьэ. Нобэ а ди зэкъуэшыныгъэм мыхъур тевгъэуэжыну мурад фщIыри, уэрэджыIакIуэ къэс игу хэзыгъахъуэ «Шэшэн Республикэм и цIыхубэ артист» цIэр къысхуэвгъэфэщащ. Нэхъ гуапэжт ар щэнхабзэмкIэ министр Кадыровэ Айшэт и IэкIэ къызэрызитар. Тхьэр арэзы къыфхухъу! Зэрышэшэн лъэпкъыу фIыщIэ хуэсщIыну сыхуейщ гур езыхьэжьэ концерт зэрыфхуэщIым, си гушыIэр гунэс зэрыфщыхъум, щымыхъуххэм дежи си жагъуэ фымыщIын папщIэ, фызэрыдыхьэшхым щхьэкIэ. Си къуэшхэ, си шыпхъухэ! Грозный! Сэ иджыри нытезгъэзэнущ!» 
КъызыхэкIа унагъуэри, республикэри, лъэпкъри зыгъэгушхуэ Апэнэс Астемыр дэри дохъуэхъу къыхуагъэфэща цIэ лъапIэр адэкIи иригъэфIэкIуэну. 
ЧЭРИМ Марианнэ.
Поделиться: