Къэпщытэныгъэхэм пащэ

2009 гъэм Урысейм и Президентым и унафэкIэ къащтауэ щытащ  Кавказым мэз джэдухэм я бжыгъэр щызэфIэгъэувэжыным теухуа программэ щхьэхуэ. А зэманым къриубыдэу ар къалэн зыщащIа щIэныгъэлIхэм щомыщу 8 мэзхэм щIаутIыпщхьащ. Абыхэм ящыщу 4-р псэущ, я щхьэ хъарзынэу япIыж.  Гъэ кIуам и гугъу фхуэтщIат Осетие Ищхъэ – Аланием щаутIыпща леопардищыр Къэбэрдей -  Балъкъэрым и мэзхэм къызэрысам. Иджыблагъэ къытIэрыхьа хъыбархэм къызэрыхэщамкIэ,  мыгувэу иджыри 3 яутIыпщынущ.

Кавказым и мэзхэм леопардхэм я щхьэбжыгъэр щызэфIэгъэувэжыным телажьэ центр щхьэхуэ Сочэ щыIэщ. Аращ  иджы яутIыпщынухэри щапIар. А псэущхьэхэр дунейм къызэрытехьэ лъандэрэ ди мэзхэм я щIыуэпс щытыкIэм сыт и лъэныкъуэкIи хуагъэхьэзырауэ щытщ, зыкIи уащIытегузэвыхьыжын щымыIэу.

Лаурэ, Лео, Хостэ (зэрахьэ я цIэхэрщ) сымэ я узыншагъэр  мы зэманым къапщытэ. Дохутырхэм къызэрыхагъэщамкIэ, псэущхьэхэр узыншэу щытын хуейщ, цIыхухэм зэран яхуэхъун уз зэрыцIалэ хуамыхьын хуэдэу. Зыхуей хуэзэу къапщытэн папщIэ ахэр зэрагъэжей сыхьэт ныкъуэм къриубыдэу иращIапхъэ псори тыншу зэфIагъэкI, спутникым пыщIа пщэхъухэр иралъхьэ. Абы Iэмал къаритынущ псэущхьэхэм я псэупIэм,  я шхэкIэм, здэщыIэ щIыпIэм зэресэм щыуагъэншэу кIэлъыплъыну.

ЩIэныгъэлIхэр псом хуэмыдэу щогуфIыкI  нэгъуэщI къэралхэм кърашу щыта пщэхъухэр щIэх дыдэу ди дейхэмкIэ зэрызэрахъуэкIам.

- Е мыхъу фIы хъужыркъым жыхуаIэу, санкцэхэм я сэбэп къыдэкIащ. Ди къэралым щащIа Iэмэпсымэхэм фIагъ ин ябгъэдэлъщ икIи псэущхьэхэм куэдкIэ нэхъ къатепсынщIэн хуэдэу цIыкIущ. Сыхьэт къэс абы къыдегъащIэ щомыщхэр къыщыхутэ щIыпIэмрэ я узыншагъэр зыхуэдэмрэ,- жаIащ щIэныгъэлIхэм.

 Хэт ищIэрэ, мыгувэу Осетие Ищхъэрэм къыщежьэну азиат щомыщхэми, япэрейхэм хуэдэу, ди республикэм и гъунапкъэр щIэх дыдэу къызэпаупщIыну къыщIэкIынщ.