Ростов къалэм щыIэ онкоцентрым цIыхубз гуэрым килограмм 20 хъу шыкъыр къыщыкIуэцIахащ.
Лышх узыфэхэмкIэ Ростов щыIэ медицинэ къэхутакIуэ IуэхущIапIэм и хирургхэм иджыблагъэ лэжьыгъэшхуэ ирагъэкIуэкIащ. Ростов областым щыщ бзылъхугъэм килограмм 20 хъу шыкъыр къыкIуэцIахащ. Илъэс зыбжанэ ипэкIэ бзылъхугъэм и ныбэм шыкъыр къыщагъуэтат. Ауэ ар мышынагъуэу къыщищIэм цIыхубзыр и узым кIэлъымыплъурэ зэманышхуэ дигъэкIащ. И ныбэр хэхъуэурэ къимыкIухьыжыф хъуа нэужьщ абы дохутырхэр зыщригъэплъар.
КъызэрыщIэкIамкIи, шыкъырыр и ныбафэмрэ бынжэмрэ кIэрыпщIэжри, шын ихъухьыжауэ Iисрафт. Бзылъхугъэр псэууэ къызэтенэн папщIэ икIэщIыпIэкIэ операцэ ирагъэкIуэкIащ. Ар зыщIари онкоцентрым и унафэщI Кит Олегщ, хирург дэIэпыкъуэгъуиплI щIыгъуу.
- Шыкъырыр апхуэдизкIэ инти, бзылъхугъэм и ныбэм ерагъыу ихуэу арат, и кIуэцIфэцIыр зэрыщыту (ныбэ лынцIым деж къыщыщIэдзауэ гъутхьэпсылъэм нэсу) зэщигуат. Абы къыхэкIкIэ, цIыхубзым и лъхуалъэри, лъхуадэхэри, ныбафэм щыщи, бынжэри къидмыхыу хъуакъым. Мы псоми фIыуэ хэлъыр зыщ – шыкъырыр Iей хъужатэкъым, ар миомэ инышхуэу къыщIэкIащ. Зы мащIэ тIэкIу зыхуигъэшэчыжатэмэ, дауи, ар Iей хъужынут, абы иужькIэ сымаджэр къытхуемыгъэлынри хэлът. Иджыпсту псори хъарзынэщ, бзылъхугъэр щIэттхыкIыжащ, - жеIэ Олег.
Гу лъытапхъэщи, мы IуэхущIапIэм и хирургхэм апхуэдэ шыкъыр куэд ялъэгъуащ. Псалъэм папщIэ, килограмм 25, 35, 40 къызыкIуэцIаха щыIэщ. Ар къызыхэкIари цIыхубзхэм дохутыр зык1элъамыгъэплъурэ я узыр зэрыхэт1эсар.
