А лъэхъэнэм нэчыхьытх ягъакIуэр лIы зыбгъупщIт. ПщыкIущым щIигъуамэ, емыкIущ апхуэдиз бгъэкIуэну, жаIэрт. Гъэмахуэмэ - шыгукIэ, шитI щIэщIауэ, щIымахуэмэ - шы IэжьэкIэ. Зытесыну мэкъур иралъхьэрт, щIакIуэхэр трагъэубгъуэжырти, я лъакъуэхэр ибгъумкIэ едзыхыжауэ, уэршэру е уэрэд къыхадзэурэ, и псалъэхэр зыщIэм «нокIуэ!» жраIэу, зэпадзыжурэ, гъуэгум «пкIэлъей» ирадзырт.
Сэри, си «чыш» тесыгъуэрэ сыщIалэ цIыкIуу апхуэдэ зы нэчыхьытх зэгуэр сыздашауэ щытащ. ФIы дыдэу сощIэж. Къаблэну щIалэ цIыкIу зытIущи здашэрт. Хабзэр арати, абыхэм дыху, сабын, бэлътоку, мажьэ хуэдэхэр я щыгъыным къыкIэращIэрт. КIуахэр къыщежьэжкIэ, нып бларэ мэл жьагъэрэ къратырт.
Мы хъыбарыр къызжезыIэжар сэ нэхърэ куэдкIэ нэхъыжь лIыжь гурыхуэт. КъызэриIуэтэжамкIэ, езыми чын гъэвуукIэ зригъэщIа къудейт, нэчыхьытх щыздашам.
Арати, моуэ бжэ къуагъымкIэ Iэнэ лъахъшэ цIыкIу хуагъэувауэ, IэфIыкIэ, псыIэфI-сытхэр тету, щхьэгъэрытми и нэIэ къытету, къадэгушыIэу, ягъэхьэщIэрт. ЗдэкIуар Бабыгуейт, иджы СэрмакъкIэ зэджэм. ЗдикIар Абзуанхьэблэт, иджы - Къулъкъужын Ипщэ.
Бжьэ ещанэм нэсу зэрыцIыхуа къудейуэ, «Уо-хьо, бэр зышхар къокIуэ! Алэхьэ, бэр зышхар къэсамэ!» жаIэу, псори зэщIотаджэ, нэхъыжьым фIэкIа къэмынэу. Арыххэу, зы лIыжь къуэгъу лъагэ, джэдыгу хужь щыгъыу къыщIохьэ.
- Уэ, гуп махуэ апщий! – и фIэхъусыр япэ итт къыщIыхьам.
- Уэ, бэм я щIасэ ухъуи! – иратыжащ жэуап джэдыгу хужьым.
- КъыкIэрыхуащи, евгъафэт Мысостей бжьищым! – унафэ ищIащ нэхъыжьым.
Абы иужь, бжьэ зытIущ зэдрафагъэни. Сытми, къыкIэрыхуу къыщIыхьам, зэдэууэ хагъэзыхьу, зыхуагъазэ: «Бэр зэрыпшхар къыджепIэркъэ?!» - жаIэри.
«ЖысIэмэ, жысIэщ», - кърегъажьэ и хъыбарыр лIыжь къуэгъум.
«Абы щыгъуэ си хьэв делэгъуэт, сыщIалэ танэфIт, си къарууфIагъэм сигъэгушхуауэ, куэдым ескурт, сыхьэкъувыкъуну къысхэхъыжьэрт.
Апхуэдэ зы бжьыхьэ махуэ гуэрым пхъэщхьэмыщхьэ, гъавэхэкI зиIэхэм хэти шыгукIэ, хэти выгукIэ Псыхуабэ яшэрти, ящэрт е яхъуэжырт.
Тамбукъан хыжьейм пэгъунэгъуу къыщылъ мэзым шууэ сыкъыхэжырти, гу закъуэтIакъуэ къэкIуэжхэр схъунщIэрт. Моуэ зы гуоугъуэкIэ фIэкIа нэхъ спэмыжыжьэу, зы шу цIыкIу йопсыхри, Iэдагъэ зрегъауэ. Фочыр згъэуэхукIэ, и щхьэр къеIэтри къоплъэ. Пшапэ зэхэуэгъуэ щыхъум, къэкIуэжхэр зэпыуати, шу цIыкIум изохулIэ. МакъыхъукIэ, «Уи шыр къызэти, зегъэхь!», сыщIогубжьэ.
- Ей, шынэхъыщIэ, лIырэ шырэ фэлъаджэщ жыпIэу, уатемыгушхуэ, иумыку, - щыжиIэм:
- Дауэ жыпIа? – си шыр жьэхызохуэ, шыбгъэкIэ сеуэ щIыкIэу.
- НтIэ, хьэ закъуэрэ лIы закъуэрэ щIыжаIэр уэзгъэщIэнщ! - зэрыжиIар сощIэж.
ЗыкъыщысщIэжам, си IитIри лъакъуитIри пхауэ, ныбэгукIэ сызэпрыууэ, уанэгум сытепхауэ, си шыр и шым кIэрищIауэ, ищхъэрэкIэ срихьэхырт.
Си ныбэр Iейуэ игъэузырти, сылъаIуэу щIызодзэ:
- Алыхь-билыхь, ягъэ кIынкъым, сыутIыпщ!
Си лъэIур зэхимых хуэдэт, щымт. Гузэвэгъуэм къыхэкIагъэнщ, нэхъыжьхэм я тхьэрыIуэкIэр къызощIэж. ЗэрыжаIэмкIэ, апхуэдэу Тхьэ пIуамэ, къэгъазэ щыIэжтэкъым.
- Уащхъуэу мыващхъуэ кIанэ! ДяпэкIэ уэ зэрыжыпIэу сыщытынмэ!
Ар зэрызэхихыу, Iэхуитлъэхуит сыкъещIыжри:
- УщIэпхъуэжыну жыпIэнщи, щIылъэм утетмэ, мы си шым уIэщIэкIынкъым! Уэгум уихьэжми, мы ержыбыжьым укъелынкъым!
- Уэ пщIыр си унафэщ, - щыжысIэм, сеутIыпщ.
ЛIы и жэщт, мазэхэт.
КIэщIу жысIэнщи, куэбжэшхуэ гуэрым докIуалIэ. Уанэгум йоувэри щхьэдох, шэщым шищ къыщIешри, шхуэмылакIэр къызет. Егъазэри, тыкуэнышхуэ дэтти, бжэр Iуех. ЩIохьэри, и куржы хъуржынышхуитIым ярыз ахъшэ, дыщэ – нэхъ уасэ зиIэхэр къехьри, шым къытрелъхьэ. Трегъазэри, щопщыкъукIэ щхьэгъубжэм тоуIуэри, мыжьыкъыбзэкIэ «УзыхъунщIар Уэзы Муратщ!» жеIэ.
Шищыр ди Iэдэжу, жэщ мазэхэу, «лIы и жэщщ!» зыхужаIэм хуэдэти, чыхум дыхыхьэжащ.
ДызэбгрыкIыжын хуей щыхъум, шищри хъуржынитIым ярылъхэм я ныкъуэри къызетри, мыри къыщIегъуж:
- Унэсыжмэ, шищыр бынунагъуэшхуэу щыт, шы зимыIэ хуэмыщIахэм ят. ЛIыр гуащIэмащIэм къыщхьэщожри, удэфам поув. УхъунщIэнумэ, бей зыхуэмышхыжынур хъунщIи, зимыIэм ет!
Нобэр къыздэсым зекIуэ сежьэу, бэр къэсхуу, батэр згъэша фи гугъэщ. Батэр зыгъэшари лIы уанэ къикIари а шу фэ зэзмыплъарщ».
Абдежым щеух зи гугъу сщIа лIы къуэгъум и хъыбарыр.
КIэ зимыIэ щыIэкъым. Шэсыжыбжьэм иужькIэ, КъалэжьымкIэ (Сэрмакъ щхьэщыт бгыщ) дыкъыдэжыжу, Абзуанхьэблэ дыкъыщысыжам, адыгэшхэр къызэщIэплъэри, джэгун щIадзакIэт.