Сабиигъуэм и къарур

МЫСАЧЭ Мурат, сурэтыщI:

Сурэт щIын сысабийуэ щIэздзащ, ауэ ар IэщIагъэ схуэхъуну сегупсысауэ схужыIэнукъым. Абы сыкъыхуэзыгъэушауэ къысщыхъур Ленинград къикIа сурэтыщIым си адэм и портрет зэрищIыгъарщ. Арати, художественнэ школ сыщеджэн щIэздзащ, курыт еджапIэр къэзухри, Къэрэшей-Шэрджэс къэрал пединститутым и художественно-графикэ факультетым сыщIэтIысхьащ. ИужькIэ ди республикэм и театрхэм (къанэ щымыIэу псоми, жыпIэкIэ ущыуэнукъым) сыщылэжьащ, иджы къэзгъэзэжауэ ЩоджэнцIыкIу Алий и цIэр зезыхьэ Къэбэрдей къэрал драмэ театрым сыщыIэщ.

Бэлыхьлажьэ сщIэуэ схужыIэнукъым

СурэтыщIым махуэ къэс и IэмкIэ зыгуэр къигъэщIу аращи, телъыджэлажьэу зы бэлыхь солэжь схужыIэнукъым. Ауэ пщIэр цIыхум я гум щынэскIэ, ар щафIэгъэщIэгъуэнкIэ, узыхэтым пщIэ къыщыпхуащIкIэ уогушхуэ, уи къарури уи фIэщ зэрыхъужым пцIы хэлъкъым.

ЕджапIэр къэзухыу ди республикэм къыщызгъэзэжам, сабий журналым и художественнэ редактору лажьэ Къып Мухьэмэд иллюстрацэ гуэрхэр тщIыну къыдиту щытащ. ИужькIэ зыкъомрэ сабийхэм яхуэгъэза IэдакъэщIэкI сщIыну сыхунэмысурэ екIуэкIащ. Иджы, фи нэмыс нэхъ лъагэ ухъу, пхъурылъху цIыкIуитI сиIэщи, абыхэм гукъыдэж къызат нэхъ цIыкIухэм сахуэлэжьэну.

Куэд феджэ

СурэтыщI хъуну хуей цIыкIухэм ехъулIэныгъэ зэраIэнум зы мэскъалкIэ шэч къытесхьэркъым. ЯжесIэну сызыхуейр зыщ: фи Iэм ищIым нэмыщI тхыгъэ куэд фыкъеджэ. Нэхъыбэ щIэвджыкIыж, нэхъыбэ къэфщIэху псэкIэ нэхъ къулей фыхъунущ, фи IэдакъэщIэкIхэми нэхъ купщIэ яIэнущ.