Щолэхъу Къэрэщей (1615 – 1641)1616 гъэм шыщхьэуIум и 6-м тэрч дзэпщ П. Ф. Приклонскэм Посольскэ приказым итхащ кърым хъаныр Кавказ ИщхъэрэмкIэ кIуэцIрыкIыу Закавказьем поход кIуэнкIэ хъуну зызэригъэхьэзырымрэ Тэрч гарнизоныр хъаным пэувын папщIэ, хуэмыщIауэ зэрыщытымрэ. А тхыгъэм Приклонскэм щегъэлъагъуэ Къэбэрдеишхуэм тIасхъэщIэх игъэкIуа Афанасьев Андрей (чыристан диныр къэзыщта къэбэрдей адыгэщ) къихьа хъыбарымкIэ, Къазий и Къэбэрдейми (Алыджыкъуэ), Нэгъуей ЦIыкIуми (Уракъ Беймырзэ), къумыкъу СулътIан-Мыхьмуди, шаукал Нуцал-мырзи кърым хъаным и походым хэтыну къыхураджэу лIыкIуэ къыхуагъэкIуащ, хъаным и цIэкIэ тыгъэхэмрэ улахуэхэмрэ къыхуашэри. Кърым хъаным IущIэну Къэбэрдеишхуэм икIри кIуахэщ: СулътIан-Мыхьмуд и лIыкIуэ Албэч Къазий, Щоджэныкъуэ Алыджыкъуэ (пщы уэлийр), Щолэхъу Къэрэщей, Анзор Хьэмырзэ (Кро, т. I, с. 93). Документхэр зэрымащIэм къыхэкIкIэ Къэрэщей и пщыгъуэм теухуауэ тщIэри къыжытIэфынури куэд хъуркъым. 1615 гъэм щэкIуэгъуэм и 11-м Нэгъуеишхуэмрэ пщы Щолэхъу Къэрэщейрэ къызэрагъэпэщри, ПщыIэпщокъуэ Къазий яукIащ (Кро, т. I, с. 97, примеч. 208). Нэгъуеишхуэр абы и ужькIэ Сэтей йокIыжри Индыл и сэмэгурабгъумкIэ мэIэпхъуэ. 1641 гъэм накъыгъэм и 29-м Алыджыкъуэрэ ХьэтIохъущыкъуэрэ, нэгъуэщI пщы-уэркъхэри, Нэгъуей ЦIыкIури ящIыгъуу, Талъостэнейм теуэри зэхакъутащ, цIыху куэди яукIащ, гъэр куэди яубыдащ, Щолэхъу Къэрэщей и уэркъ 30 яукIащ, мэкъумэшыщIэ щитIи къаубыдащ, шыуэ 300, былымрэ мэлу 2000 яхуащ (Кро, т. I, с. 197 – 198). 1641 гъэм фокIадэм и 12-м тэрч дзэзешэ С. И. Шаховскэм Посольскэ приказым зэритхамкIэ, Елбэздыкъуэ Нартшу, Ибакъ Елдар, Къундет Чэлимэт сымэ пащтыхь Михаил Федоровичым тхылъ хуатхащ Щолэхъу Къэрэщей 1641 гъэм накъыгъэм и 31-м Алыджыкъуэ, ХьэтIохъущыкъуэ, Нэгъуей ЦIыкIум зэраукIам теухуауэ (Кро, т. I, с. 203, 204). А. И. Лобанов-Ростовскэм 1642 гъэм зэритхамкIэ, «Щолэхъу Къэрэщей пщы пIащэшхуэт, плIабгъуэт, къаруушхуэ зыхэлът, цIыхуфIт, зэтест, щIыхьышхуэ зыхуащIт, ар иукIащ Алъхъэс Мудар» (Кро, т. I, с. 386). Къэрэщей и укIыкIам и хъыбарыр тхыгъэхэм щызэтехуэркъым. Ар яукIар пэжщ. Ауэ зыукIар Алыджыкъуэ и гупыра хьэмэрэ Алъхъэс Мудар? Ар фIыуэ тхузэхэгъэкIакъым. Сэ къызэрыслъытамкIэ, пэжыр 1641 гъэм и майм и 31-м зэраукIарщ. С. И. Шаховскэм Алыджыкъуэ пщы уэлийм зэрыхуитхымкIэ, пащтыхьым и унафэкIэ Щолэхъу и Къэбэрдеймрэ Къундет Чэлимэтрэ я хэкур яхъумэн папщIэ, Шишмарев Артем дзэ и гъусэу игъэкIуащ. А зэманым Щолэхъу и Къэбэрдейм щызэIущIащ къумыкъу Адемир-шаукал, Нэгъуеишхуэм я СулътIанащ, Къэрэщей сымэ, нэгъуэщIхэри, Мудар ягъеящ, Мудар илъ ящIэжыну, Нэгъуей ЦIыкIур зэхакъутэну ежьащ, пащтыхьым игъэкIуа Шишмарев и гупри зыщIагъури. (Кро, т. I, с. 199). 1641 гъэм бадзэуэгъуэм и 25-м Балъкъ псыщхьэм щекIуэкIа зауэшхуэм хэкIуэдащ Къундет Чэлимэт, Ибакъ Елдар, Шишмарев Артем, нэгъуэщI куэди. Нэгумэ Шорэ Нэгъуеишхуэр Сэтей зэрырахуар хъыбархэмкIэ итхыжащ. ДокументхэмкIэ, а нэгъуейхэр Сэтей щикIыжар 1615 гъэм Къазий щаукIам къыщежьауэ лъытапхъэщ. Хъыбарым пэжу къыжеIэ: «Апхуэдэу тэтэр орда инхэр кIуэда хъуащ». А хъыбарым мы уэрэдыр щыхьэт тохъуэ: Тэтэртуп зауэ Чынтыдзэр Талъостэнейм кIэлъашэщ, Зэуэгъуэмэ ди Тэтэртуп ижьырабгъущ, А махуэм Аущыджэрджэр ди гъусэщ. МыдэкIэ ди уардэ Iэщхьэхъухэр зэдэгуэщIхэу зырасэхэм зырасщ, А махуэм ди фочауэ лъэсхэр дзэшхуэм къытфIаувыхьыр. Хахуэуэ фочауэ лъэщ! Талъостэн и къуэкIэ Къэрэщеипщым и пщыгъуэт, И жылэхэр губгъуэ унапIэм щиIыгът, Я мэлхэм Сэтеищхьэ пцIанэр я хъупIэт, ДиIэжкъыми, Жьэпкъ и унапкъэм фекIуэж. Шым къэшэсым, мэятэ, дзэшхуэр зэрешэри чынтыпщ. НэгъуеикIэри Чэлимэтыпщым емыпцI. Фейцей зыкъищIурэ къозауэр. Зэуэгъуэм куэкушаул дахэр зыгъэувыIэр пщы щауэ хахуэуэ Къэрэщеипщырт...
Поделиться:
Читать также:
26.04.2024 - 17:06 →
Тызылыкъуэр пэщIэдзэт
15.04.2024 - 14:52 →
Агуий и Iэхэлъахэм
29.03.2024 - 12:24 →
Бийм зы гупу пэщIигъэуват
20.03.2024 - 11:17 →
Къанжал зауэм и щхьэусыгъуэр
24.02.2024 - 12:05 →
КъикIуэт зымыщIэт Къардэн Сыхьэт-Джэрий
|