Гъуазджэм зэфIэкI щызиIэ ди хэкуэгъу

Макъамэри къафэри зи псэм хэлъ, республикэ, урысейпсо, дунейпсо фестивалхэм я лауреат, оперэ, эстрадэ уэрэджыIакIуэ цIэрыIуэ, бас-баритон лъэщ Молэ Артур ящыщщ республикэм исхэм гукъыдэжрэ дэрэжэгъуэрэ езыт, щэнхабзэмрэ гъуазджэмрэ хэлъхьэныгъэфIхэр хуэзыщI артистхэм.

Молэ Артур адыгэ цIыхубэ уэрэдхэри классикэ макъамэхэри къохъулIэ. Гуапэщ Москва щыпсэу икIи щылажьэ ди хэкуэгъу уэрэджыIакIуэм зэфIэкI зэриIэр, щэнхабзэр зэригъэбейр.

Молэ Артур псэкIэ къыхиха IэщIагъэм - уэрэд жыIэным – зэрыхуэпэжым, абы ехъулIэныгъэ къызэрыщихьым и щыхьэтщ и цIэр ди республикэм, гъунэгъу щIыналъэхэм къадэкIуэу, Москва, Санкт-Петербург зэрыщыIуар, цIыхухэм ягу зэрырихьыр. Дапщэщи хуэдэу, Iэмал къыщыхукъуэкIкIэ, Артур псапэ зыпылъ  Iуэхухэми жыджэру хэтщ. Къапщтэмэ, Сирием щекIуэкI зауэм и мафIэ лыгъейм зи щхьэ къыхэзыхыу къэIэпхъуэжа ди лъэпкъэгъухэм папщIэ мы гъэм Черкесск къыщызэрагъэпэща концертым и гуапэу хэтащ. ДяпэкIи апхуэдэхэм пищэну и мурадщ. Молэ Артур къехъулIахэм я гугъу щыпщIкIэ, къыхэгъэщыпхъэщ метр 5642-рэ зи лъагагъ Iуащхьэмахуэ дэкIыу куэдым фIыуэ ялъагъу «Андемыркъан» адыгэ цIыхубэ уэрэдыжьыр абы и щыгум зэрыщыжиIар.

Театр лэжьыгъэми и зэфIэкI щеплъыжащ икIи хэзэгъащ Молэр. Владикавказ Оперэмрэ балетымкIэ дэт театрым пIалъэкIэ щылэжьащ. А IэнатIэм щыпэрыта зэманым и щIэныгъэм хигъэхъуэным, и IэщIагъэм зригъэужьыным ехьэлIауэ иIа мурадхэр къехъулIащ. Театрым уэрэджыIакIуэ пашэу зэрыщыIа илъэсхэм абы   концертхэр итащ, партиешхуэ зыбжанэ игъэзэщIащ.  Апхуэдэхэщ Верди Джузеппе и «Травиата» оперэм, Верди и «Трубадур» оперэм, Молчанов Кирилл и «А зори здесь тихие», Чайковский Пётр и «Иоланта» оперэхэм щигъэзэщIахэр, нэгъуэщIхэри.   Доницетти Гаэтанэ и «Колокольчик» оперэм щыщ Энрикэ и партиер нэхъ гугъухэм ящыщу къалъытэ.  Абыи Артур пэлъэщащ.   КъищынэмыщIауэ, спектакль, оперэ, опереттэ куэд щагъэув, Урысейм и нэгъуэщI къалэхэм, хамэ къэралхэм къикIа артист куэд здэщыIа, Владикавказ Оперэмрэ балетымкIэ дэт театрым зэрыщылэжьари къыхуэщхьэпащ.

Ди цIыхубэ уэрэдыжьхэри классикэ макъамэхэри фIыуэ къызэхъулIэ, ахэр цIыхубэм ягу дыхьэу зыгъэзащIэ, зэпымыууэ зи зэфIэкIымрэ щIэныгъэмрэ хэзыгъахъуэ, щIэм тегушхуэ уэрэджыIакIуэр гъуазджэ лъагапIэщIэхэм нэсыну дохъуэхъу.