ЖыгыщIэу мин 60-м нэблагъэ хасэнущ

Блашэ, бзииху, уэздыгъей, пхъэхуей, гъэм и сыт хуэдэ зэманми щхъуантIэу щыт туя жыгыщIэу мини 6-м нэблагъэ щыхасащ Къэбэрдей-Балъкъэрым и зыгъэпсэхупIэ хадэхэмрэ уэрамхэм къедза лъагъуэхэмрэ. 

Iуэху щхьэпэм ехьэлIауэ къызэрагъэпэща щIыхьэху нэхъ ин дыдэр щекIуэкIар Налшык къалэ зыгъэдахэ ТекIуэныгъэм и паркырщ. Абы щызэхуэсахэм яхэтащ Къэбэрдей-Балъкъэрым ЩIыуэпс хъугъуэфIыгъуэхэмрэ экологиемкIэ и министерствэмрэ абы егъэщIылIа IуэхущIапIэхэмрэ щылажьэхэр, Урысей гвардием и къулыкъущIапIэу КъБР-м щыIэм, Урысей реестрым республикэм щи!э и IуэхущIапIэм, «Урысей удзыфэ» («Зелёная Россия») урысейпсо экологие-жылагъуэ зэщIэхъееныгъэм, Суд приставхэм я федеральнэ IуэхущIапIэм щIыналъэм щиIэ и къудамэм, КъБР-м КадастрхэмкIэ и палатэм, Бдзэжьей гъэхъунымкIэ федеральнэ агентствэм Кавказ Ищхъэрэм щиIэ и IуэхущIапIэм, нэгъуэщIхэми я лIыкIуэхэр, Налшык къалэ дэт 9-нэ курыт еджапIэм щIэсхэмрэ абыхэм я гъэсакIуэхэмрэ, республикэм и Лъэпкъ музейм щылажьэхэр, хабзэхъумэ IэнатIэхэм Iутхэр, жылагъуэ зэгухьэныгъэхэм хэтхэр, волонтёрхэр, нэгъуэщIхэри.

ЦIыху 600-м нэблагъэм ТекIуэныгъэм и паркым щыхасащ кIей, блашэ, Iэней, жыгей, дэшхуей жыгыщIэу 300-м щIигъу. Ахэр къызыбгъэдэкIар Къэбэрдей-Балъкъэр мэз гъэкIыпIэрщ (питомник). 

ЩхъуантIагъэм зегъэубгъуным хуэгъэза Iуэхугъуэхэм щэкIуэгъуэм и кIэ хъуху пащэнущ, республикэм и щIыналъэ псори къызэщIиубыдэу. КъызэгъэпэщакIуэхэм зэрыжаIэмкIэ, щIыхьэхухэм хэтынухэм а зэманым къриубыдэу кIей, Iэней (блашэ), жыгей, дэшхуей жыгыщIэу, псори зэхэту, мин 60-м нэблагъэ хасэнущ.

Къэбэрдей-Балъкъэрым мы лэжьыгъэр зэрыщагъэзащIэмкIэ жэуап зыхьыр республикэм ЩIыуэпс хъугъуэфIыгъуэхэмрэ экологиемкIэ и министерствэрщ. Абы щылажьэхэм зэрыжаIэмкIэ, Iуэхугъуэм и къалэн нэхъыщхьэр Урысей Федерацэм и мэзхэр къызэщIэгъэувэжынымрэ беягъэу ябгъэдэлъым хэгъэхъуэнымрэ ехьэлIа лэжьыгъэхэм жылагъуэм гулъытэ хэIэтыкIа хуегъэщIынырщ. 

«Мы Iуэхум хэт псори жыггъэкI хъуами ярейщ, хэгъэгум и мэзхэр зэфIэгъэувэжыным хуэгъэзауэ ялэжьым ахэр апхуэдизу дихьэхащи. Иджырей щIыхьэхухэм къекIуалIэу жыгыщIэ зыгъэтIысхэр, къэкIуэну жыжьэм телажьэу аращ», - жиIащ республикэм щIыуэпс хъугъуэфIыгъуэхэмрэ экологиемкIэ и министр Шаваев Ильяс.