Инэмыкъуэ Феридэ и дунейр

Режиссёр, сурэтыщI Инэмыкъуэ Феридэ къызэригъэпэщауэ егъэлажьэ ныбжьхэм я театр «Розовые очки» зыфIищар.

Темыркъан Юрий и цIэр зезыхьэ Сабий музыкэ школ №1-р 2007 гъэм къиуха нэужь, Феридэ макъамэмкIэ иIэ щIэныгъэм хигъэхъуэну и мурадами, куэд щIауэ дэзыхьэх дизайн IэщIагъэм хуеджэну щIэтIысхьащ КъБКъУ-м дизайнымкIэ и колледжым. Ар фIы дыдэуи къиухащ.

Адэшхуэ-анэшхуэм я деж щыщIэдзауэ, гъуазджэм и лIэужьыгъуэ щхьэхуэхэм дахьэхыу къекIуэкI и унагъуэм зэрыхуэфэщэн IэщIагъэ зэзыгъэгъуэта хъыджэбзым и анэмкIэ и адэшхуэ Володя сурэт техыныр къехъулIэрт. Унагъуэм щыщ псоми яфIэфIщ абы и Iыхьлыхэмрэ ныбжьэгъухэмрэ ятрихауэ щыта сурэтхэм къетIысэкIыурэ еплъу зэхэсын.

Феридэ и анэ Къумыкъу ФатIимэ КъБР-м и Гуащэ театрыр къызэрызэIуахрэ артисту щылэжьащ, къызэщIэпкъуэжмэ, илъэс 30-м щIигъукIэ. ЗэфIэкI зиIэ, гуащэхэр IэкIуэлъакIуэу зезыгъакIуэ артистым и лэжьэгъухэм ящыгъупщэркъым абы и макъ гуапэр.

ЕджапIэ нэужьым Феридэ Гуащэ театрым художникыу лэжьэн щыщIидзащ. ПIалъэкIэ мыхъумэ, зэман кIыхькIэ абы щылэжьэну япэщIыкIэ мурад имыIами, театрым и дунейм зэуэ зыщIишащ ар икIи ар IэщIыб хуэщIыжакъым. Гуащэ театрым и артистхэм школхэм зыкъыщагъэлъагъуэкIэ я гъусэу кIуэм, семинархэм, мастер-классхэм хэтурэ, а лэжьыгъэм дихьэхыпащ. УФ-м и Театр лэжьакIуэхэм я зэгухьэныгъэм хыхьащ Феридэ, абы къыхуагъэфэщащ творческэ щIалэгъуалэм папщIэ ят стипендиер. АбыкIэ игъэуващ и япэ спектаклыр, езыр художникыу икIи режиссёру. Дизайным зэрыхуеджари куэдкIэ къыхуощхьэпэ, и спектаклхэм къыхэщ лIыхъужьхэм я теплъэмрэ абыхэм я фэилъхьэгъуэхэмрэ гъэхьэзырын хуей щыхъукIэ.

Зы пIэм имыту зэпымыууэ зиужьын, зынэса лъагапIэм хигъэхъуэн зэрыхуеймкIэ сыт щыгъуи акъылэгъу къыдэхъу и адэ-анэм и хъуэпсапIэр къыщыдаIыгъым, зэфIэкI зиIэ артистхэр иригъэблагъэри, Орлов В. И «Здравствуй, папочка» спектаклыр Феридэ игъэуващ. А лэжьыгъэм еплъахэм ар къехъулIауэ къызэралъытам зэригъэгушхуам шэч хэлъкъым.

КъБР-м и Гуащэ театрым и актрисэ Снегиревэ Викторие Экзюпери и «Маленький принц» таурыхъхэмкIэ спектакль ягъэувыну къыщыхилъхьэм, Феридэ ныбжьхэм я театрыр фIэгъэщIэгъуэн хъуащ. Ныбжьхэм я театрыр лIэщIыгъуэ куэд ипэкIэ къызэIуахами, а гъуазджэм ухэзыгъэгъуазэу щыIэр мащIэт. Тыркум щылажьэ ныбжьхэм я театрым Karagoz жыхуиIэм и артистхэм запищIэри, ечэнджэщащ. Илъэс зытIущ дэкIри, абы къызэIуихащ «Розовые очки» театрыр. КъыжыIапхъэщ, куэдым ар сабий театру къащыхъуми, балигъхэми зэрафIэгъэщIэгъуэныр. Псалъэм папщIэ, сабийхэми балигъхэми яхуэгъэзащ «Фон Барон Червякус Спиридон», «Дерево сказок» спектаклхэр.

НыбжьыщIэхэр театр гъуазджэм дегъэхьэхыным, гуащэхэм я дунейм ныбжьхэм я театрымкIэ хэшэным теухуауэ лэжьыгъэшхуи ирегъэкIуэкI Феридэ. Аращ абыхэм яхуэгъэза мастер-классхэр къыщIызэригъэпэщым и щхьэусыгъуэри. Къапщтэмэ, Ныбжьхэм я театрым иригъэкIуэкIыну и мурадщ «Сказки в темноте» мастер-классыр. КъыжыIапхъэщ, Инэмыкъуэм сабийхэр игъэгуфIэн зэрифIэфIыр. Мы мазэм Ныбжьхэм я театрым и артистхэм «Лэгъупыкъу» зыгъэпсэхупIэм зыкъыщагъэлъэгъуащ, Херсон Херсон областым къикIауэ абы щыIэ сабийхэм папщIэ.