Гъуазджэмрэ щэнхабзэмрэ я цIыху

ДифI догъэлъапIэ

Мы махуэхэм илъэс бжыгъэ дахэ зэрырикъур егъэлъапIэ искусствовед, УФ-м и СурэтыщIхэм я зэгухьэныгъэм хэт, ТворчествэхэмкIэ Дунейпсо Академием и академик Сындыку Нелли. 

Къэбэрдей-Балъкъэрым и гъуазджэмрэ щэнхабзэмрэ я зыужьыныгъэм хэлъхьэныгъэфI хуэзыщIа Сындыку Нелли Украинэм и Радзивиов къалэм къыщалъхуащ. Хэку зауэшхуэм зи сабийгъуэр хиубыда дэтхэнэми хуэдэу, Нелли и гъащIэр, зэрыгурыIуэгъуэщи, тыншу къекIуэкIакъым. 
Илъэс 16 щыхъум, Нелли Бродовскэ педучилищэм и студент хъуащ. Ар икIи комсомол райкомым и лэжьакIуэти, сыткIи щапхъэу щытыным хущIэкъурт. 
КъБР-м щIыхь зиIэ и сурэтыщI Сындыку Анатолэ Украинэм къулыкъу щыщищIэ зэманым къицIыхуащ икIи 1952 гъэм щхьэгъусэ хуэхъуащ Нелли. Ар езыри художникти, Нелли абы чэнджэщэгъу хуэхъуащ, сыткIи и Iуэхур диIыгъащ.
Зэщхьэгъусэхэр Ленинград кIуэри, зы институт щIэтIысхьащ. Анатолэ - ЖивописымкIэ, скульптурэмрэ архитектурэмкIэ, Нелли - искусствоведенэмкIэ факультетхэм щеджащ.
Нелли СурэтыщI гъузаджэхэмкIэ музей Ткаченкэ Андрей цIэр зезыхьэм, илъэс зыбжанэкIэ щылэжьащ, КъБР-мм и СурэтыщIхэм я зэгухьэныгъэм жэуап зыхь и секретару ар щытащ зы зэманкIэ.
- Налшык къалэр, абы и уэрамхэр, утхэр, ухуэныгъэхэр, щIыуэпсыр зыхэслъхьэ щымыIэу фIыуэ солъагъу. Псом хуэмыду бгы, къурш уардэхэм я дахагъэм зыщызгъэнщIыркъым. Илъэс куэдкIэ сыкъыздекIуэкIа цIыхухэр, адыгэхэр, балъкъэрхэр, нэгъуэщI лъэпкъхэр, абы я хабзэхэр, бзэхэр, уэрэдхэр, усэхэр сфIэфIщ. НэгъуэщI щIыпIэ сыкъыщалъхуами, фIыуэ слъагъу Къэбэрдей-Балъкъэрыр хэку зэрысхуэхъуам зы мащIэкIи сыхущIегъуэжыркъым! - жеIэ Сындыку Нелли.
Сындыку Нелли къыхуагъэфэщащ УФ-м и СурэтыщIхэм я зэгухьэныгъэм и «Достоинство. Традиции. Мастерство» дыжьын медалыр, щIыхь, фIыщIэ тхылъхэр.
Къэбэрдей-Балъкъэрым и гъуазджэмрэ щэнхабзэмрэ я зыужьыныгъэм хэлъхьэныгъэфI хуэзыщIа Нелли узыншагъэ, гуфIэгъуэ, дэрэжэгъуэ и куэду псэуну ди гуапэщ.