Бэлагъы Любэ и гъащIэмрэ гуащIэмрэ траухуэ

Адыгэ усакIуэ, литературэдж, журналист, зэдзэкIакIуэ, кинопродюсер, филологие щIэныгъэхэм я доктор, ЩIэныгъэхэмкIэ Дунейпсо Адыгэ Академием, УФ-м и ТхакIуэхэм я зэгухьэныгъэм хэт, «СИФФА» урысей-британие международнэ кинофестивалыр къызэзыгъэпэща икIи абы и президент Бэлагъы-Къандур Любэ Хьэзрэталий и пхъур илъэс бжыгъэ дахэ зэрырикъум теухуа тхылъ гъэлъэгъуэныгъэ къыщызэрагъэпэщащ Мэлбахъуэ Тимборэ и цIэр зезыхьэ Лъэпкъ къэрал библиотекэм. Ар игъэхьэзыращ библиотекэм и лъахэхутэ къудамэм и лэжьакIуэ нэхъыжь Безыр Ленэ.

УсакIуэм и гъащIэмрэ гуащIэмрэ траухуа выставкэр купщIафIэщ. Дзэлыкъуэ районым хыхьэ Каменномост (Къармэхьэблэ) къуажэм 1968 гъэм къыщалъхуа усакIуэм и ныбжьыр илъэсий ирикъуауэ арат и усэхэр республикэм къыщыдэкI газетхэм къытехуэн щыщIидзам. КъБКъУ-м и тхыдэ-филологие факультетыр ехъулIэныгъэкIэ къиуха нэужь, ар Ломоносовым и цIэр зэрихьэу Москва дэт къэрал университетым журналистикэмкIэ и факультетым щеджащ икIи филологиемкIэ кандидат лэжьыгъэр абы щыпхигъэкIащ. И усэхэр урысыбзэкIи, хьэрыпыбзэкIи, инджылызыбзэкIи зэрадзэкIащ.

Тхылъ дапхъэм телъщ Бэлагъым и лэжьыгъэм къыпэкIуа саугъэтхэм ущызыгъэгъуазэ дэфтэрхэмрэ и тхылъхэмрэ: «Къудамэ закъуэ» (1991), «Мывэ сэрей» (1997 гъэ), «Дыгъэм и гъуэгу» (2000 гъэ), «Сэ Тхьэ сызэрелъэIур адыгэбзэщ» (2002 гъэ), «ГъэунэхупIэ» (2008 гъэ), «Гуащэнэ» (2005 гъэ), «Царская любовь» (Москва, 2007 гъэ), «Уиндзэр и уэшх щхъуафэхэр» (2015 гъэ) тхылъхэр, газетхэмрэ журналхэмрэ Любэ теухуауэ къытехуа щIэныгъэ,публицистикэ лэжьыгъэхэр.

Бэлагъым и тхылъхэр къыщыдэкIащ Америкэм и Штат Зэгуэтхэм, Великобританием, Чехием, Испанием, Тыркум, Иорданием, КъуэкIыпIэ Гъунэгъум хыхьэ къэралхэм. Любэ и усэхэм лъагъуныгъэри, философиери, лъэпкъ тхыдэри щызэхэухуэнащ.