IэщIагъэм я нэхъ гугъуШормэн Алесэ Тэрч къалэм къыщыхъуащ, Сеченов И. М. и цIэр зезыхьэ Москва къэрал медицинэ университетыр къыщиухащ. Дохутыр IэщIагъэр къыхэзыха хъыджэбзыр 2020 гъэм щылэжьащ коронавирусым пэщIэтыным тегъэщIауэ Москва къалэм зауэм и ветеранхэм папщIэ къыщызэрагъэпэщауэ щыта сымаджэщым. Алесэ дыщигъэгъуэзащ и IэщIагъэр къызэрыхихами и мурадхэми. - СыщыцIыкIум IэщIагъэ куэдым сыдихьэхыу щытащ: хьэпIацIэщыгъэкIэ хьэпшыпхэр блэнми, сурэт щIынми, зыгуэрхэр зэIущэн хуейми, уеблэмэ шахматми, баскетболми, волейболми, - жеIэ Алесэ. - Ауэ нэхъыбэу сфIэгъэщIэгъуэныр медицинэрат. Адрей сабийхэми хуэдэу, сэри гуащэкIэ сыджэгуну сфIэфIти, мастэ яхэсIурт, «згъэхъужрт». ТIэкIу нэхъ сыкъыщыдэкIуэтейм, псэ зыIутым и Iэпкълъэпкъыр зэрызэхэлъыр «джыным» сыдихьэхащ. Шындырхъо хъуми, хьэндыркъуакъуэу щытми, ди къалэ жыг хадэм си нэм къыфIэнэр къэзубыдурэ зэIыспщIыкIырт. НыбжьыщIэ ныбжьым итыр апхуэдэ Iуэхум дихьэхын хуейт?! СщIэкъым. Алесэ дохутыр IэщIагъэм зэрыдихьэхар я фIыщIэу къелъытэ и анэмрэ (Анджелэ илъэс 30 хъуауэ медицинэ IэнатIэм пэрытщ, Дей къуажэм дэт амбулаторэм и лэжьакIуэщ) КъБР-м щIыхь зиIэ и дохутыр, сымаджэщ хирургиемкIэ кафедрэм и профессор, нейрохирург, и анэшхуэм и дэлъху Былымгъуэт Борисрэ. - Абыхэм я чэнджэщхэм сызэрысабийрэ сыщIодэIу, дяпэкIи сыхущIэкъунущ абыхэм яIэ пщIэм хуэдэ къэзлэжьыным, Iуэхум фIыуэ хэзыщIыкI дохутыр сэри сызэрыхъуным, - къыхегъэщ Алесэ. Шормэным еджапIэ нэхъыщхьэр ехъулIэныгъэкIэ къиухащ, къыхихари кардиологиеращ. 2020 гъэм дохутыру хъуар гъэунэхуныгъэ ин Iуигъэуауэ щытащ дуней псор зэщIэзыцIыла Covid-19 узыфэм. Алесэ медсестрам и къалэнхэр игъэзащIэу, мазэм къриубыдэу сымаджэщым щылэжьащ. - ЦIыхур гугъуехь щыпэщIэхуэкIэ, зыми и дэIэпыкъуныгъи лей хъуркъым, псом хуэмыдэу ар дохутырым и лэжьыгъэм теухуамэ. Абы щыгъуэм иджыри седжэрти, университетым и студентхэм апхуэдэ Iэмал къызэрыдатам папщIэ абы и унафэщIхэм фIыщIэ яхузощI, - жеIэ Алесэ. - Тхьэмахуэм щыщу махуи 5-м сыхьэти 8-кIэ дылэжьащ абы щыгъуэм. Узыфэр нэхъыбэу зыхуэмыхьыр зи ныбжь хэкIуэтахэрати, абыхэм уи гур яхуэмыузу къанэртэкъым, ауэ щхьэж и пщэ дэлъым елъытауэ тхузэфIэкI зыми къэдгъэнакъым. Апхуэдэ Iуэхум уеувэлIэну гугъут, шынагъуэт жыпIэмэ, дауи, ар шэч зыхэмылъщ. Ауэ сэ езым а IэщIагъэр къыхэсхауэ аращи, апхуэдэ гугъуехь дызэрыхэтынкIэ хъунури къызгуроIуэ. Алесэ IэщIагъэ нэхъ гугъу дыдэ икIи жэуаплыныгъэ зыпылъ къызэрыхихам шэч хэлъкъыми, ехъулIэныгъэ иIэну ди гуапэщ.
Поделиться:
Читать также:
04.03.2024 - 15:13 →
ЩIалэгъуалэм я зэхыхьэ ин
04.03.2024 - 12:45 →
IэщIагъэрылажьэхэм я пщIэр къаIэту
01.03.2024 - 12:52 →
ЩIэблэм гъуэгугъэлъагъуэ яхуохъу
26.02.2024 - 12:00 →
Хэкужьу дыщэ пхъуантэ
19.02.2024 - 14:30 →
ЩIым и бзэ лъахэбзэ
|