Къафэр зи псэм хэлъхэм ящыщщ дуней псом щыцIэрыIуэ «Кабардинка» къэрал академическэ къэфакIуэ гупым хэт, «Къэбэрдей-Балъкъэрым и пщащэ дахэ-2012» зэпеуэм и япэ вице-мисс хъуа ХьэIупэ Наирэ.
- Магнитофоныр щIигъанэу адыгэ макъамэрэ къафэрэ къызэреуэу, си анэм и ныбэм илъ сабийм зигъэхъеин щIидзэрт, къафэ пэлъытэу. КъызэрыщIэкIымкIэ, дунейм сыкъытехьэн и пэ къафэм сыдихьэхат. ЗэрысщIэжрэ, утыкум «зыщызгъэкIэрэхъуэн» сфIэфIщ. Илъэсибгъу сыщыхъум, си анэшхуэм дишащ зэдэлъхузэшыпхъухэр «Дети гор» ансамблым. Абы къыдэкIуэу, зэшыпхъуитIыр дэрбзэр IэщIагъэм щыхуагъасэ гупжьейми дритат. А гупхэм дыщыкIуэн хуей зэманхэр зэтехуэу къыщIэкIати, къафэр текIуащ! – жеIэ Наирэ.
Къафэм япэ лъэбакъуэхэр щыхича сабий ансамблыр, абы и унафэщIхэу Кушмэзокъуэхэ Рафаилрэ Иринэрэ зэпымыууэ гуапэу игу къегъэкIыж Наирэ. Репетицэхэм сыт щыгъуи пэплъэрт, щIэ гуэр къызэращIэным хуэпабгъэу. Зэщхьэгъусэхэм я щIалитIыр – Саламбекрэ Алимбекрэ – я дэIэпыкъуэгъут. Зы унагъуэшхуэм хуэдэу зэрыIыгъ гупым екIуалIэ ныбжьыщIэхэм къафэм къыдэкIуэу халъхьа гъэсэныгъэр уасэншэщ.
КъыкIэлъыкIуэу Наирэ къафэ гъуазджэм щиIэ зэфIэкIым щыхигъэхъуащ Налшык къалэм и лицей №2-м ШэджыхьэщIэ Руслан къафэмкIэ щыхуигъасэ гупжьейм. ЕджапIэм къыщызэрагъэпэщ зэхыхьэхэм зэпымыууэ зэрыхэтыным и ужь итт хъыджэбзыр, утыкум къыщыфэн папщIэ. Абы щыгъуэщ Наирэ еджапIэ нэужьым «Кабардинка» ансамблым хыхьэну мурад щищIар. И адэ-анэм и хъуэпсапIэр щажриIэм, ар хуагъэдэхатэкъым, ансамблыр зэпымыууэ хамэ къэралхэм кIуэурэ концертхэр зэрыщитым къыхэкIыу. Иужьым, Нэхущ Чэрим къызэригъэпэщ, Думэныщ Iэулэдин, Битокъу Оксанэ, Балъкъэр Аслъэн сымэ къафэм щыхуагъасэ ансамблым хыхьащ. И насып текIуэри, и анэшхуэмрэ адэ-анэмрэ арэзы хъури, 20I2 гъэм жэпуэгъуэм «Кабардинка» ансамблым хыхьащ.
- Ансамблыр си унагъуэ етIуанэ хъуащ. Нобэр къыздэсми апхуэдэщ. Арыншэу си гъащIэр си нэгу къысхущIэгъэхьэркъым, - жеIэ Наирэ.
