Гукъыдэжыр къэзыIэтхэр

Гъатхэпэм и 25-р Урысейм и щэнхабзэм и лэжьакIуэм и махуэщ

Щэнхабзэм и лэжьакIуэм и махуэр гъэлъэпIэныр къыхэзылъхьар, ар къэралым щагъэлъапIэ махуэшхуэ щIын хуейуэ япэу жызыIар УФ-м щэнхабзэмкIэ и министру щыта Соколов Александрщ. 2007 гъэм и гъатхэпэм зэIущIэ иригъэкIуэкIыу абы къыхигъэщауэ щытащ щэнхабзэм и къудамэ хэхахэм ехьэлIа махуэхэр (Фэеплъхэр хъумэным и махуэр, Театрым и махуэр, Печатым и махуэр, н.) ягъэлъапIэми, щэнхабзэ IуэхущIапIэхэм щылажьэхэми щхьэхуэу гулъытэ яхуэщIын зэрыхуейр. 

Щэнхабзэм и лэжьакIуэм и махуэр гъатхэпэм и 25-м гъэлъэпIэным теухуа унафэм 2007 гъэм шыщхьэуIум и 27-м Iэ щIидзауэ щытащ Урысей Федерацэм и Президент Путин Владимир.
Щэнхабзэм зиужьыныр елъытащ къэралым абы хуищI гулъытэм, ахъшэу а Iуэхум тригъэкIуадэм. IэщIагъэлI нэсхэр гъэхьэзырыныр, абыхэм мылъкукIэ защIэгъэкъуэныр, щэнхабзэм и лэжьакIуэхэм я псэукIэр егъэфIэкIуэныр къэралым зэпымыууэ и нэIэ зытригъэтыпхъэщ, сыту жыпIэмэ щэнхабзэр цIыхум зезыгъэужь Iэмал нэхъыщхьэхэм ящыщщ.
Кином, гъуазджэм, тхыдэм, нэгъуэщI IэнатIэхэми зи гъащIэр тезыухуахэр. Урысейм и щIыналъэ псоми гъатхэпэм и 25-м щагъэлъапIэ: щIыхь тхылъхэр, цIэ лъапIэхэр, нэгъуэщI саугъэтхэр зыхуагъэфэщахэм ахэр щратыж пшыхьхэр къызэрагъэпэщ, нэгузыужь программэхэр хузэхалъхьэри, я гукъыдэжыр къаIэт. 
Къэбэрдей-Балъкъэр Республикэр къулейщ ди щэнхабзэр утыкушхуэм изыхьэфа цIыху цIэрыIуэхэмкIэ. Абыхэм щэнхабзэм, гъуазджэм щызыIэрагъэхьа ехъулIэныгъэхэм ди къэралым гулъытэ къыщыхуащIащ, щIыхьрэ зэфIэкIрэ зэраIэм и щыхьэту цIэ лъапIэхэр къыфIащащ. 
Щэнхабзэм и лэжьакIуэм и махуэ къэс абыхэм къахэхъуэну, я щIыхьыцIэхэр бэгъуэну ди гуапэщ.