Макъамэр зи псэм хэлъ

И ныбжьыр илъэс 12 щрикъум ФатIимэ курыт еджапIэм и концертхэм зыкъыщигъэлъагъуэ хъуат, ауэ абы щыгъуэ и пщIыхьэпIи къыхэхутэртэкъым зэгуэр уэрэд жыIэным хуеджэнуи, ар IэщIагъэ хуэхъунуи.

Курыт еджапIэм и ебгъуанэ классым къыщIэкIа нэужь, куэдрэ мыгупсысэу щIэтIысхьащ ГъуазджэхэмкIэ Кавказ Ищхъэрэ къэрал институтым Щэнхабзэмрэ гъуазджэмкIэ и колледжым . Къэбэрдей-Балъкъэр, Къэрэшей-Шэрджэс, Ингуш республикэхэм щIыхь зиIэ я артисткэ Даур Иринэ экзаменым къыщыщедэIуам, ФатIимэ къыжриIат къызэрымыкIуэ макъи зэфIэкIи иIэу гу зэрылъимытар, ауэ зэман дэкIмэ зыкъызэкъуихынкIэ зэрыхъунур. 

- Кавказым щыпсэухэм уэрэджыIакIуэ, артист IэщIагъэр къыщыхахкIэ я адэ-анэхэм яфIэфIкъым. Абы и лъэныкъуэкIэ фIыщIэ яхуэфащэщ си Iыхьлыхэу - си анэ Назирэт, си дэлъху Аслъэнбэч, си шыпхъу нэхъыжьхэу Сусаннэрэ Мадинэрэ, псом хуэмыдэу си адэ къуэш ДыщэкI Азрэт къыхэсха IэщIагъэр къызэрыздаIыгъам папщIэ. Концерт нэужьхэм си адэр зэпымыууэ къысщIоупщIэ ар зэрекIуэкIамкIэ, къыстреIуэ дуней псом зэ мыхъуми зэм цIэрыIуэ сыщыхъуну, - жеIэ ФатIимэ. – Си егъэджакIуэхэм сахуэарэзыщ Тхьэм къызита зэфIэкIым зэрызрагъэужьамкIэ.

ФатIимэ колледжым и япэ курсыр къехьэлъэкIами, Даур Иринэ зэрыжиIам хуэдэу, етIуанэ курсым щынэсым зыкъызэкъуихащ. Псори зи фIыщIэу къилъытэр и егъэджакIуэ Даур Иринэщ. ЯпэщIыкIэ эстрадэ уэрэдхэр нэхъ игу дыхьэу щытами, иужьым классикэм зритыжащ. 

Колледжыр диплом плъыжькIэ къиуха нэужь, ФатIимэ Москва е Санкт-Петербург консерваторием щIэтIысхьэну и мурадат, арщхьэкIэ темыгушхуэурэ ЕГЭ-м къыкIэрыхуащ. Апхуэдэу щыхъум, Даур Иринэ и лъэIукIэ, ГъуазджэхэмкIэ Кавказ Ищхъэрэ къэрал институтым и тхылъхэр иритри, абы и щIэныгъэм щыпищащ. 

УФ-м и цIыхубэ артисткэ, ГъуазджэхэмкIэ Кавказ Ищхъэрэ къэрал институтым и профессор Гъэсашэ Наталье и нэIэм щIэту, институтым илъэситхукIэ щеджащ ДыщэкIыр. Колледжымрэ институтымрэ щыщIэса зэманыр гукъинэж щыхъуащ абы. И гуапэуи къыхегъэщ Сочэ къалэм Паралимп джэгухэр къыщыщызэIуахым, студентхэм яхэту утыкушхуэм зэрызыкъигъэлъэгъуар. Даур Иринэ и гъусэу Италием щыIащ икIи ар зыхэта уэрэджыIакIуэхэм я «Note sul mаre» международнэ зэпеуэм Гран-при саугъэтыр къыщихьащ. КъищынэмыщIауэ, Образцовэ Еленэ и цIэкIэ Санкт-Петербург щекIуэкI зэхьэзэхуэм, Гъэсашэ Наталье и цIэкIэ екIуэкIа зэпеуэм, Лазаревск щыIа фестивалым щытекIуащ. Германием щыпсэу ди лъэпкъэгъухэм гъэ къэс ирагъэкIуэкI зэхуэсми ирагъэблагъэри хэтащ, адыгэ уэрэдхэр жиIэу. 

ДыщэкI ФатIимэ уэрэдхэр жеIэ адыгэбзэкIэ, урысыбзэкIэ, инджылызыбзэкIэ, итальяныбзэкIэ, франджыбзэкIэ, нэмыцэбзэкIэ. Итальян, урысей оперэр зыхилъхьэ щыIэкъым, псом хуэмыдэу композитор цIэрыIуэхэу Пуччини Джакомэ, Верди Джузеппе, Рахманинов Сергей, Шостакович Дмитрий, Масканьи Пьетро, Леонкаваллэ Руджерэ я IэдакъэщIэкIхэр.

Музыкэ къэрал театрым и уэрэджыIакIуэ нэхъыфIхэм ящыщщ ДыщэкI ФатIимэ. Абы къыдэкIуэу, Хьэсэней къуажэм и Музыкэ школым и гъэсэнхэр уэрэд жыIэным щыхуегъасэ. Классикэ макъамэм республикэм щиIэ щIэупщIэм зэрыхэхъуэм егъэгушхуэ ар. ФатIимэ щыджэгуащ Штраус и «Цыганский барон», Молэ Владимир и «Къамботрэ Лацэрэ» спектаклхэм. И репертуарым къызэщIеубыдэ оперэхэр, опереттэхэр, романсхэр, джаз, эстрадэ, зауэ уэрэдхэр, нэгъуэщIхэри. 

Фортепианэр къызэхъулIэ ФатIимэ и мурадщ гитарэми зыхуигъэсэну. Ар ящыщщ зы пIэм имыту зызыужьхэм, зи зэфIэкI хэзыгъахъуэ цIыху жыджэрхэм. НэгъуэщI къэралхэм я утыкушхуэхэм зыкъыщигъэлъэгъуэну, и хъуэпсапIэщи, къехъулIэну ди гуапэщ!