Яхиханов Рустам Шэшэн республикэм щIыхь зиIэ и сурэтыщIщ, 1986 гъэм Грозный къалэм дунейм къыщытехьащ. гъэм Санкт-Петербург дэт къэрал академием сурэт щIыным ущыхурагъасэ и факультетым 2005 щIэтIысхьэри, «Адэжь щIыналъэ» зыфIища и диплом лэжьыгъэм щыщIэдзауэ, Урысейми Кавказми цIэрыIуэ щыхъуащ.
ЩIалэм и сурэтхэр Кавказым и тхыдэри и нобэри IупщIу зытеплъагъукI защIэщ. Санкт-Петербург щыпсэу щIалэм къызыхэкIар щымыгъупщам и закъуэкъым, и Iэпэр зэIуса псомкIи и Хэку цIыкIур къаригъэцIыхуну зэрыхуейр и лэжьыгъэхэм къыхощ. Дызэрыт зэманым щIалэм Репиным и цIэр зезыхьэ институтым сурэтыщI IэщIагъэм щыхурегъаджэ. Ауэ езыми сурэт щIыныр зэпигъэуркъым.
2017 гъэм Яхихановым Назрань къалэм къыщызэIуихащ «Гум къинахэр» гъэлэгъуэныгъэр. Ар теухуат шэшэнрэ ингушу цIыху мин 500 я хэкум ирашауэ зэрыщытам. Шэшэн сурэтыщIым апхуэдэ щIыкIэу тхыдэм и напэкIуэцIхэр къаригъэцIыхуащ. Яхихановым а гъэлъэгъуэныгъэм иришэлIат вайнаххэм я хабзи я псэукIи къызыхэщ сурэт 15, дэтхэнэ зыми нэщхъеягъэр къыхэщу.
«Си сабиигъуэр щекIуэкIар Шэшэнырщ, - жриIэжащ Яхихановым «Папахэ» ингуш журналым и корреспондентым. – Шэшэн зауитIми сыхиубыдащ. 2004 гъэ лъандэрэ Санкт-Петербург сыщопсэу. Си адэ-анэм зэрыжаIэмкIэ, илъэсищ лъандэрэ сурэт сощI. СыщыцIыкIуми ныбжьыщIэу сыщыщытами, си сурэтхэр зауэрт зытеухуар. Гуауэр, гужьеигъуэр, гузэвэгъуэр си къалэмыпэм гуэгъу хуэхъуауэ пхужыIэнущ. Нэхъ нэгузыужьу зыгуэр щIы къызжаIэ си адэ-анэм. Ауэ си хъуреягъкIэ щыслъагъур гуауэщи, си сурэтхэм сфIыхэувэ зэпытщ».
Рустам и сурэтыщI насыпри зыгуэркIэ зауэм епхауэ пхужыIэнущ. ЕтIуанэ шэшэн зауэр щиухам, Рустам школыр къиухагъащIэти, Грознэм щекIуэкI гъэлъэгъуэныгъэхэм я зым и лэжьыгъэхэр утыку къыщрихьащ. IэщIагъэлIхэм абдежым гу къыщылъатэри, Санкт-Петербург дэт академием щеджэну чэнджэщ къратауэ щытащ. 2011 - 2015 гъэхэм Рустам щылэжьащ Мыльниковэ Верэ и лъэщапIэм. 2012 гъэм щыщIэдзауэ, Урысейм и СурэтыщIхэм я союзым хэтщ. Яхихановым и лэжьыгъэхэр щигъэлъэгъуащ Финляндием, Китайм, Черногорием, нэгъуэщI къэралхэм.
Урысейм и сурэтыщI академием Яхихановым 2015 гъэм къыхуигъэфэщащ «И Iэзагъым папщIэ» дыжьын медалыр. 2015 гъэм Шэшэным щэнхабзэмкIэ и министерствэм щIыхь тхылъ къритащ, «Щэнхабзэхэр зопсалъэ» проектым зэрыхэтам щхьэкIэ.
«Кавказым и гъуазджэр Урысейм ейм зыгуэркIэ къыщхьэщокI, - жеIэ Рустам, и лэжьыгъэхэм щытепсэлъыхькIэ. - Осетиеми, Дагъыстэнми, Шэшэнми сурэтыщI Iэзэ куэд исщ. Совет зэманым сурэтыщIхэм лэжьыгъэ нэхъ яIэт, къэралым и унафэр игъэзащIэмэ, зыхэпсэукIын къыIэрыхьэрт. Иджыпсту зэманыр нэхъ гугъущ. Сурэт зэхуэзыхьэсхэр къэбгъуэтыну тыншкъым, цIыхухэр гъуазджэм хуэпабгъэуи щыткъым, езыр-езыру зыгуэрым и нэ укъыфIэмынэмэ. ИтIани, къыхэтха IэщIагъэм дызэрыхуэпэжыным иужь дитщ».
Гъуазджэм хэт цIыхум нэхърэ нэхъ шэрыуэу езым и IэдакъэщIэкIхэр мэпсалъэ. Рустами и Iэхэр нэхъ жьакIуэщ, и бзэгум нэхърэ. И сурэтхэм я зым узэрыIуплъэу, и гум илъыр сэтей мэхъу. ЦIыхухэр кIуэ пэтми нэхъ къыдэзыхьэх абы и лэжьыгъэхэм я щапхъэщ сурэтым щыфлъагъури.
